Paippalāda-Saṃhitā · Chapter 16.10

paraḥ so astu tanvā tanā ca
tisraḥ pṛthivīr adho astu viśvāḥ |
prati śuṣyati yaśo asya devā
yo mā divā dipsati yaś ca naktam ||

suvijñānaṃ cikituṣe janāya
sac cāsac ca vacasī paspṛśāte |
tayor yat satyaṃ yatarad ṛjīyas
tad it somo 'vati hanty āsat ||

na vā u somo vṛjinaṃ hinoti
na kṣatriyaṃ mithuyā dhārayantam |
hanti rakṣo hanty āsad vadantam
ubhāv indrasya prasitau śayāte ||

yadi vāham anṛtadevo asmi
moghaṃ vā devām̐ apyūhe agne |
kim asmabhyaṃ jātavedo hṛṇīṣe
droghavācas te nirṛthaṃ sacantām ||

adyā murīya yadi yātudhāno asmi
yadi vāyus tatapa pūruṣasya |
adhā sa vīrair daśabhir vi yūyā
yo mā moghaṃ yātudhānety aha ||

yo māyātuṃ yātudhānety āha
yo mā rakṣāḥ śucir asmīty āha |
indras taṃ hantu mahatā vadhena
viśvasya jantor adhamas padīṣṭa ||

pra yā jigāti khargaleva naktam
apa druhus tanvaṃ gūhamānā |
vavrām̐ anantām̐ ava sā padīṣṭa
grāvāṇo ghnantu rakṣasa upabdaiḥ ||

vi tiṣṭhadhvaṃ maruto vikṣv icchata
gṛbhāyata rakṣasaḥ saṃ pinaṣṭana |
vayo ye bhūtvā patayanti naktabhir
ye vā ripo dadhire deve adhvare ||

eta u tye patayanti śvayātava
indraṃ dipsanti dipsavo 'dābhyam |
śiśīte śakraḥ piśunebhyo vadhaṃ
nūnaṃ sṛjad aśaniṃ yātumadbhyaḥ ||

pra vartaya divo aśmānam
indra somaśitaṃ maghavan saṃ śiśādhi |
prākto apākto adharād udakto
abhi jahi rakṣasaḥ parvatena ||