Paippalāda-Saṃhitā · Chapter 15.10

jīmūtasyeva bhavati pratīkaṃ
yad varmī yāti samadām upasthe |
anāviddhayā tanvā jaya tvaṃ
sa tvā varmaṇo mahimā pipartu ||

dhanvanā gā dhanvanājiṃ jayema
dhanvanā tīvrāḥ samado jayema |
dhanuḥ śatror apakāmaṃ kṛṇotu
dhanvanā sarvāḥ pṛtanā jayema ||

vakṣyantīved ā ganīganti karṇaṃ
priyaṃ sakhāyaṃ pariṣasvajānā |
yoṣeva śiṅkte vitatādhi dhanvañ
jyā iyaṃ samiti pārayantī ||

te ācarantī samaneva yoṣā
māteva putraṃ pipṛtām upasthe |
apa śatrūn vidhyatāṃ saṃvidāne
ārtnī ime visphurantī amitrān ||

bahvīnāṃ pitā bahur asya putro
vyacaḥ kṛṇoti samado 'vagatya |
iṣudhiḥ saṅkāḥ pṛtanāś ca sarvāḥ
pṛṣṭhe ninaddho jayati prasūtaḥ ||

rathe tiṣṭhan nayati vājinaḥ puro
yatrayatra kāmayate suṣārathiḥ |
abhīśūnāṃ mahimānaṃ panāyata
manaḥ paścād anu yacchanti raśmayaḥ ||

tīvrān ghoṣān kṛṇvatāṃ vṛṣapāṇayo
'śvā rathebhiḥ saha vājayantaḥ |
apakrāmantaḥ prapadair amitrān
kṣiṇanti śatrūṃr anapavyayantaḥ ||

rathavāhanaṃ havir asya nāma
yatrāyudhaṃ nihitam asya varma |
tatrā ratham upa śagmaṃ sadema
viśvāhā vayaṃ sumanasyamānāḥ ||

svāduṣaṃsadaḥ pitaro vayodhāḥ
kṛcchreśritaḥ śaktīvanto gabhīrāḥ |
citrasenā iṣubalā amṛdhrāḥ
satovīrā uravo vrātasāhāḥ ||

brahmaṇāsaḥ pitaraḥ somyāsaḥ
śive no dyāvāpṛthivī anehasā |
pūṣā naḥ pātu dūritād ṛtāvṛdho
rakṣā mākir ṇo aghaśaṃsa īśata ||