Paippalāda-Saṃhitā · Chapter 11.5

prati gṛhāṇa pṛthivī nītam
etad ājyasya mathitaṃ śarīram |
imāṃ dhenum asya dātus
tvaṃ rakṣa barhiṣy ā yathāsat ||

uta tvāhur varuṇasya patnīm
atho tvāhur aditiṃ viśvarūpām |
adhi jarāyum āghāre havyavāham
agnāv asyā mahimānaṃ juhomi ||

sa sāhasraṃ tantum anv ā tatāna
so agniṣṭomān daśataṃ sam āpa |
adhijarāyuṃ savatsāṃ yo dadāti
taṃ vai devāḥ svar ā rohayanti ||

adhijarāyuḥ svar ā rohayanty
anena dattā sudughā vayodhāḥ |
sāsmai duhāṃ śatadhāram akṣitaṃ
yam asya loke parame vyoman ||

pūrvavatsena saha vatsinī gaur
yo 'syā vatso aparo jarāyu tat |
tṛtīyaṃ māṃsaṃ parinirmitaṃ
yat tasmād devā adhijarāyum āhuḥ ||

ā dhāvaya śavasā vāvṛdhāna-
-uttarāva śrava ādhehy asmai |
imam indra mahatāmena rakṣa
saṃ prajayā tanvā saṃ balena ||

durvedāvastād bahudhā parastād
viśve devāḥ prati paśyanty āyatīm |
yā bhadrā yā sarvataḥ samīcī
sed āhutir bhavatu me tarājyā ||

gṛṣṭiṃ dhenum adhijarāyuṃ svadhāṃ
kṛṇvānaḥ pra dadāti brahmaṇe |
sāsmai duhāṃ śatadhāram akṣitam
amuṣmim̐l loke yuga uttarasmin ||

vatsaṃ jarāyu pratidhuk pīyūṣaṃ
yo no dadāti sudughāmadhenum |
tasya devāḥ pra tirantv āyuḥ
sa ā rohatu sukṛtām ulokam ||

parivālām adhijarāyuṃ yudhā
jīvo adadāgra etām |
syonā naḥ śagmā śivā viśeha
mā no hiṃsīr harasā daivyena ||

bhadrakṛtaṃ sukṛtamādu śaṃbhuvam
araṃ bhuvaṃ prati gṛhṇāmy āyatīm |
ghṛtaśriyaṃ nabhasī saṃvasānāṃ
devān manuṣyām̐ asurān utarṣīn ||

pañca devāḥ pra pibanta etām
indras tvaṣṭā varuṇo mitro agniḥ |
te sarve sam adur mahyam etāṃ
tayeha jīvan pra tirasvāyuḥ ||

kaśyapo 'yaṃ jamadagnir vasiṣṭha
ṛṣayo naḥ sasanur agra etām |
bharadvājo gotamo atrir naḥ syonāṃ
viśvāmitro daduṣaḥ pra tirāty āyuḥ ||

ūrjaṃ devebhyaḥ subhaga
ūrjaṃ manuṣyebhyaḥ |
ūrjaṃ pitṛbhyo aghnya
ūrjā dadata mā viśa ||