Paippalāda-Saṃhitā · Chapter 11.1

vṛṣā te 'haṃ vṛṣaṇyantyai
garbhaṃ dadhāmi yonyām |
yadi devapariṣṭhitā
prajāṃ tokaṃ na vindase ||

dhātā te taṃ sinīvālī
varuṇānī pra yacchatu |
pumāṃsaṃ putram indrāṇī
śatadāyaṃ dadhātu te ||

saṃvṛtas te vakṣaṇāsu
garbhaḥ puṃsā pumān kṛtaḥ |
sarvāṅgas tanvor jāyatām
agnir ivāraṇyor adhi ||

dhatsva vīraṃ karmaṇyaṃ
prasvaṃ tvāvadhrim avaśāṃ kṛṇomi |
ātmanas te lohitād
garbhaḥ saṃvartatāṃ vṛṣā ||

tvaṣṭā piṃśatu te prajāṃ
dhātā tokaṃ dadhātu te |
rākā sīvyatu sūcyā
bhūtasyeśānā bhuvanasya devī ||

sinīvālīm anumatiṃ
rākāṃ guṅguṃ sarasvatīm |
devānāṃ patnīr yā devīr
indrāṇīm avase huve ||

abhinnāṇḍā vṛddhagarbhā-
-ariṣṭā vīrasūr iyam |
vi jāyatāṃ pra jāyatāṃ
bahvī bhavatu putriṇī ||

pari sṛja garbhaṃ dhehi
māśāḥ pra cyoṣṭa lohitam |
anūnaḥ pūrṇo jāyatām
aśrāmoranvo apiśācadhītaḥ ||

tvaṃ dadhāsi dvipade catuṣpade
garbhaṃ prajām ejate viśvarūpām |
kanikradad vṛṣabho vīḍuśepāḥ
prajāpate tanvāṃ dhehi garbham ||

abhikrandaṃ stanayaṃ dhehi garbhaṃ
vidyotamānaḥ pavamāno vīrudbhiḥ |
parjanyemāṃ pṛthivī retasāvata-
-apāṃ rasair oṣadhīnāṃ paśūnām ||

ā te nayāmi vṛṣaṇaṃ
yaḥ prajānāṃ prajāpatiḥ |
sa te dadhātv ṛtviyaṃ
garbhaṃ yonyāṃ vijāṃ prajām ||

ye vṛṣāṇo garbhakṛta
ṛtviyānāṃ samenasaḥ |
tāṃs te hvayāmi
tad u te sam ṛdhyatām ||

agneṣ ṭe tvaṣṭur varuṇād
indrāt somād bṛhaspateḥ |
putraṃ te putrakāmāyai
devebhyo nir mame prajām ||

aṅgād aṅgāt saṃ sravatu
tad yonau prati tiṣṭhatu |
prajā te vakṣaṇāśayā
tat te bījaṃ vi rohatu ||