પૈપ્પલાદ-સંહિતા · અધ્યાય 11.1

વૃષા તે ઽહં વૃષણ્યન્ત્યૈ
ગર્ભં દધામિ યોન્યામ્ ।
યદિ દેવપરિષ્ઠિતા
પ્રજાં તોકં ન વિન્દસે ॥

ધાતા તે તં સિનીવાલી
વરુણાની પ્ર યચ્છતુ ।
પુમાંસં પુત્રમ્ ઇન્દ્રાણી
શતદાયં દધાતુ તે ॥

સંવૃતસ્ તે વક્ષણાસુ
ગર્ભઃ પુંસા પુમાન્ કૃતઃ ।
સર્વાઙ્ગસ્ તન્વોર્ જાયતામ્
અગ્નિર્ ઇવારણ્યોર્ અધિ ॥

ધત્સ્વ વીરં કર્મણ્યં
પ્રસ્વં ત્વાવધ્રિમ્ અવશાં કૃણોમિ ।
આત્મનસ્ તે લોહિતાદ્
ગર્ભઃ સંવર્તતાં વૃષા ॥

ત્વષ્ટા પિંશતુ તે પ્રજાં
ધાતા તોકં દધાતુ તે ।
રાકા સીવ્યતુ સૂચ્યા
ભૂતસ્યેશાના ભુવનસ્ય દેવી ॥

સિનીવાલીમ્ અનુમતિં
રાકાં ગુઙ્ગું સરસ્વતીમ્ ।
દેવાનાં પત્નીર્ યા દેવીર્
ઇન્દ્રાણીમ્ અવસે હુવે ॥

અભિન્નાણ્ડા વૃદ્ધગર્ભા-
-અરિષ્ટા વીરસૂર્ ઇયમ્ ।
વિ જાયતાં પ્ર જાયતાં
બહ્વી ભવતુ પુત્રિણી ॥

પરિ સૃજ ગર્ભં ધેહિ
માશાઃ પ્ર ચ્યોષ્ટ લોહિતમ્ ।
અનૂનઃ પૂર્ણો જાયતામ્
અશ્રામોરન્વો અપિશાચધીતઃ ॥

ત્વં દધાસિ દ્વિપદે ચતુષ્પદે
ગર્ભં પ્રજામ્ એજતે વિશ્વરૂપામ્ ।
કનિક્રદદ્ વૃષભો વીડુશેપાઃ
પ્રજાપતે તન્વાં ધેહિ ગર્ભમ્ ॥

અભિક્રન્દં સ્તનયં ધેહિ ગર્ભં
વિદ્યોતમાનઃ પવમાનો વીરુદ્ભિઃ ।
પર્જન્યેમાં પૃથિવી રેતસાવત-
-અપાં રસૈર્ ઓષધીનાં પશૂનામ્ ॥

આ તે નયામિ વૃષણં
યઃ પ્રજાનાં પ્રજાપતિઃ ।
સ તે દધાત્વ્ ઋત્વિયં
ગર્ભં યોન્યાં વિજાં પ્રજામ્ ॥

યે વૃષાણો ગર્ભકૃત
ઋત્વિયાનાં સમેનસઃ ।
તાંસ્ તે હ્વયામિ
તદ્ ઉ તે સમ્ ઋધ્યતામ્ ॥

અગ્નેષ્ ટે ત્વષ્ટુર્ વરુણાદ્
ઇન્દ્રાત્ સોમાદ્ બૃહસ્પતેઃ ।
પુત્રં તે પુત્રકામાયૈ
દેવેભ્યો નિર્ મમે પ્રજામ્ ॥

અઙ્ગાદ્ અઙ્ગાત્ સં સ્રવતુ
તદ્ યોનૌ પ્રતિ તિષ્ઠતુ ।
પ્રજા તે વક્ષણાશયા
તત્ તે બીજં વિ રોહતુ ॥