Paippalāda-Saṃhitā · Chapter 1.80
saṃpaśyamānā amṛtāya āyan
śuddhā yonibhyas pari jāyamānāḥ |
śivaṃ kṛṇvānā upa jighratemaṃ
vīraṃ vīreṣv apy ā kṛṇudhvam ||
śivo vo vīra iha jāto astu
śuddho yonibhyas pari jāyamānaḥ |
ariṣṭo 'yaṃ vardhatāṃ sarvam āyur
varma jyāyobhyo haviṣā kṛṇotu ||
jarāṃ mṛtyuṃ prepsatu jīva eṣa
nāsya krimir īśāto nota jambhaḥ |
saṃrabhya jīva śaradaḥ suvarcā
agniṣ ṭe gopā adhipā vasiṣṭhaḥ ||
jarāmṛtyur jarāyur jarācakṣur jarāsvaḥ |
jarase tvā jaradaṣṭiṃ pari dadāmi ||
dyauṣ ṭe pitā pṛthivī mātāntarikṣam ātmā |
vātaḥ prāṇaḥ sūryaś cakṣur divas payaḥ |
suparṇas tvābhy ava paśyād āyuṣe varcase
'yam annasyānnapatir astu vīraḥ ||
Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0