Paippalāda-Saṃhitā · Chapter 1.26
suparṇo jātaḥ prathamas
tasya tvaṃ pittam āsitha |
tad āsurī yudhā jītā
rūpaṃ cakre vanaspatīn ||
āsurī cakre prathamā-
-idaṃ kilāsabheṣajam
idaṃ kilāsanāśanam |
anīnaśat kilāsaṃ
sarūpām akarat tvacam ||
sarūpā nāma te mātā
sarūpo nāma te pitā |
sarūpakṛt tvam oṣadhe
sā sarūpam idaṃ kṛdhi ||
yat tanūjaṃ yad agnijaṃ
citraṃ kilāsaṃ jajñiṣe |
tad astu sutvak tanvo
yatas tvāpanayāmasi ||
śyāmā sarūpaṃkaraṇī
pṛthivyā adhy udbhṛtā |
idam ū ṣu pra sādhaya
punā rūpāṇi kalpaya ||
Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0