Padma Purana · Chapter 7.14

vyāsa uvāca-
mārgaśīrṣe dvijaśreṣṭha mahālakṣmyā samanvitam /
pūjayedavyayaṃ viṣṇuṃ bhaktibhāvena vaiṣṇavaḥ

mlecchadeśe ca vipreṃdra tathaiva patitālaye /
durgaṃdhaiśca parivyāpte sthāne viṣṇuṃ na pūjyet

pākhaṃḍānāṃ samīpe ca mahāpātakināṃ tathā /
asatyabhāṣiṇāṃ caiva na kuryādviṣṇupūjanam

kraṃdatāṃ sannidhau cāpi kalahānapi kurvatām /
tathopahasatāṃ sthāne na kuryātpūjanaṃ hareḥ

pratigraharatānāṃ ca sthāne viṣṇuṃ na pūjayet /
kṛpaṇānāṃ gṛhe caiva paravittābhilāṣiṇām

tathā kapaṭavṛttīnāṃ na kuryādviṣṇupūjanam /
nārāyaṇārcane vipra paraṃ bhaktiparāyaṇaḥ

anyacittaṃ parityajya haridhyānaparo bhavet /
hāhākāraṃ ca niśvāsaṃ vismayaṃ sa dvijottama

pākhaṃḍajanasaṃbhāṣaṃ na kuryāddharipūjanam /
ananyamānaso bhūtvā devadevaṃ jagadgurum

bhasmanyapi ca yatpuṣpaṃ dīyate labhate harau /
ciṃtāgamaśataśrāṃtaḥ śilācakreṣvapi dvija

puṣpaṃ dadāti yanmartyo na labhedatha tatprabhuḥ /
ananyamānaso bhūtvā bhaktyā viṣṇuṃ yajedbudhaḥ

bhrāṃtacittena yatkarma kriyate tacca niṣphalam /
sarvakarma manodhīnaṃ manodhīnaṃ jagattrayam

tasmānmano dṛḍhīkṛtya pūjayetkamalāpatim /
pūjānyatra mano'nyatra bhavedyasya dvijottama

na ca tasya phaletkāryaṃ kalpakoṭiśatairapi /
yatnādvihitaśauco'pi viṣṇupūjāparo'pi ca

manaḥśuddhivihīnaśceccāṃḍāla iva gamyate /
abhaktyā yattapastaptaṃ suciraṃ vidhinā dvija

bhavennirarthakaṃ sarvaṃ kevalaṃ kāyaśodhanam /
merupramāṇakaṃ svarṇaṃ brāhmaṇāya kuṭuṃbine

dattamabhyarthanāśāya abhaktyā śreyase'pi ca /
tasmādekamanā bhūtvā bhaktiśraddhāsamanvitaḥ

savāstukādi śākaṃ ca dadyātsadasi vaiṣṇave /
nāraṃgasya phalaṃ divyaṃ supakvaṃ yastu yacchati

keśavāya dvijaśreṣṭha so'smābhirabhipūjyate /
yatnena nūtanaṃ vastu priyaṃ bhagavato hareḥ

tadevāgrayaṇe māsi bhaktyā dadyānmurāraye /
pauṣe māsi samāyāte śrīkṛṣṇaṃ varadaṃ prabhum

devamikṣurasairdivyaiḥ snāpayedvaiṣṇavo janaḥ /
yaḥ snāpayati viprendra viṣṇumikṣurasaiḥ prabhum

iha bhuṃkte sukhaṃ sarvaṃ mṛto yātīkṣusāgaram /
yo dadyādikṣunaivedyaṃ devadevāya viṣṇave

so'pi tatphalamāpnoti kimanyairbahubhāṣitaiḥ /
sudugdhapṛthukaṃ pauṣe dadhibhirvā samanvitam

datvā murāraye martyaḥ sarvānkāmānavāpnuyāt /
sarvaiḥ purātanaṃ vastraṃ dūrīkṛtya murāraye

śītasya vāraṇārthāya dadyādvastraṃ ca nūtanam /
pauṣasaṃkramaṇe vipra salakṣmīkāya viṣṇave

dadyānmumukṣurmanujo daśavarṇaṃ ca pīṭhakam /
yastu śaṅkhadhvaniṃ kuryātsaṃpūjya kamalāpatim

tasya puṇyaphalaṃ vacmi śṛṇu vatsa samāhitaḥ /
agamyāgamanādyaiśca vimuktaḥ sarvapātakaiḥ

aṃte viṣṇupuraṃ gatvā viṣṇunā saha modate /
vainateyāṃkitāṃ ghaṃṇṭāṃ yastu vādayate hareḥ

pūjākāle dvijaśreṣṭha tasya puṇyaṃ vadāmyaham /
abhakṣyabhakṣaṇādyaiśca vimuktaḥ sarvapātakaiḥ

prayāti maṃdiraṃ viṣṇo rathamāruhya śobhanam /
tatra bhuktvākhilānkāmānkalpakoṭiśatāvadhi

punarāgatya dharaṇīṃ caturvedī dvijottamaḥ /
tatra bhuktvākhilānkāmānkalpakoṭiśatāvadhi

punarviṣṇupuraṃ gatvā mokṣaṃ prāpnotyanuttamam /
vīṇāṃ vādayate yastu pūjākāle jagatpateḥ

paṃḍitānāmagraṇīḥ syātsa martyaḥ pratijanmani /
mṛdaṃgavādyakṛdyastu pūjāyāṃ kaiṭabhadviṣaḥ

tasya prasanno bhagavāndadātyabhimataṃ phalam /
ḍamaruṃ ḍiḍimaṃ caiva jharjharīṃ madhurīṃ tathā

paṭahaṃ duṃdubhiṃ caiva kāhalaṃ siṃdhuvārakam /
kāṃsyaṃ ca karatālaṃ ca veṇuṃ vādayate tu yaḥ

pūjākāle mahāviṣṇostasya puṇyaṃ niśāmaya /
steyārthaiḥ pātakairmukto maṃdiraṃ yāti cakriṇaḥ

paramaṃ jñānamāsādya tatraiva parimucyate /
kalaśabdaṃ ca yaḥ kuryātpūjākāle jagadguroḥ

mukhavādyaṃ ca viprendra tasya puṇyaṃ mayocyate /
koṭikoṭikulairyuktaḥ prayāti mandiraṃ hareḥ

jñānamāsādya tatraiva mokṣamakṣayyamāpnuyāt /
viṣṇorāyatane yastu bhaktiyuktaḥ pranṛtyati

sa yāti brāhmaṇaśreṣṭha tadviṣṇoḥ paramaṃ padam /
yastu gāyati gītāni bhaktyā nārāyaṇāgrataḥ

sa nṛpatvamavāpnoti gandharvāṇāṃ pureṣu ca /
stauti stotrairjagannāthaṃ bhaktyā ca vaiṣṇavo janaḥ

tasya prasanno bhagavānsarvānkāmānprayacchati /
māsemāse hariṃ yastu vidhinānena pūjayet

acireṇaiva viprarṣe prasādayati so'cyutaḥ

jagadudadhimimaṃ ye tartumicchaṃti martyāḥ pracurataragabhīraṃ sarvaduḥkhapradaṃ ca /
paramapuruṣapādāṃbhojayugmaṃ manojñaṃ tridaśanivaha sevyaṃte ca sarve yajaṃtu

iti śrīpadmapurāṇe kriyāyogasāre bhagavatpūjāmāhātmyaṃnāma caturdaśo'dhyāyaḥ