Scripture Library

Padma Purana · Chapter 6.85

6.85.1

mahādeva uvāca-
vaiśākhyāṃ pūrṇamāsyāṃ vai jalasthaṃ jagadīśvaram /
pūjayedvaiṣṇavo bhaktyā kṛtotsāho mudānvitaḥ

6.85.2

gītaṃ vādyaṃ tathā nṛtyaṃ kṛtvā puṇyaṃ mahotsavam /
ekādaśyāṃ suraśreṣṭhaṃ paśyedvātha praharṣitaḥ

6.85.3

gītaṃ gāyanharerbhaktyā karttavyaḥ sotsavaḥ śubhaḥ /
śayanaṃ kuru deveśa jale'sminvai sureśvara

6.85.4

tvayi supte jagatsuptaṃ bhavatyeva na saṃśayaḥ /
ghanāgame prakurvaṃti jalastha vai janārdanam

6.85.5

ye narāstu suraśreṣṭhe na dāho narake bhavet /
svarṇapātre tathā raupye tāmre vā ca sureśvari

6.85.6

mṛnmaye vātha karttavyaṃ śayanaṃ viṣṇusaṃjñakam /
tatra toyaṃ ca saṃsthāpya śītalaṃ gaṃdhavāsitam

6.85.7

tasmiṃstoye tato viṣṇoḥ sthāpanaṃ kārayedbudhaḥ /
gopālanāmnī mūrttiśca rāmanāmnī tathāpi vā

6.85.8

śālagrāma śilā vāpi sthāpanīyā viśeṣataḥ /
pratimāṃ vā mahābhāga tasya puṇyamanaṃtakam

6.85.9

yāvaddharādharālokā yāvaccaṃdra divākarau /
tāvattasya kule kaścinna bhaveddevi nārakī

6.85.10

tasmājjyeṣṭhe mahādevi toyasthaṃ pūjayeddharim /
vītatāpo narastiṣṭhedyāvadābhūtasaṃplavam

6.85.11

suśītale tathā toye tulasīdalavāsitam /
śuciśukragate kāle pūjayeddharaṇīdharam

6.85.12

śuciśukragate kāle ye'rcayiṣyaṃti keśavam /
jalasthaṃ vividhaiḥ puṣpairmucyaṃte yamapīḍanāt

6.85.13

jalapreṣṭho yato viṣṇurjalaśāyī jalapriyaḥ /
tasmādgrīṣme viśeṣeṇa jalasthaṃ pūjayeddharim

6.85.14

nīramadhye sthitaṃ kṛtvā śālagrāmasamudbhavam /
yenārcito mahābhaktyā sa bhavetkulapāvanaḥ

6.85.15

karkarāśi gate sūrye mithunasthe viśeṣataḥ /
yenārcito harirbhaktyā jalamadhye tu suṃdari

6.85.16

dvādaśyāṃ tu viśeṣeṇa jalastha jalaśāyinaḥ /
yenārcanaṃ kṛtaṃ tena koṭiyajñaśataṃ kṛtam

6.85.17

nikṣipya jalapātre tu māse mādhavasaṃjñake /
mādhavaṃ ye'rcayiṣyaṃti devāste tu narā bhuvi

6.85.18

pātre gaṃdhodakaṃ kṛtvā yaḥ kṣipedgaruḍadhvajam /
dvādaśyāṃ pūjayedrātrau muktibhāgī bhavettu saḥ

6.85.19

aśraddadhānaḥ pāpātmā nāstiko'cchinnasaṃśayaḥ /
hetuniṣṭhaśca paṃcaite na pūjāphala bhāginaḥ

6.85.20

tathā mahādevi prabhuṃ jalasthaṃ jagadīśvaram /
pūjayedyo naro nityaṃ mahāpāpaiḥ pramucyate

6.85.21

ॐhrī hrīṃ rāmāya namaḥ /
iti maṃtreṇa deveśi pūjanaṃ tatra vai smṛtam /
ॐ klīṃ kṛṣṇāya goviṃdāya gopījanavallabhāya namaḥ /
iti maṃtreṇa girije udakaṃ cābhimaṃtrayet /
devadeva mahābhāga śrīvatsakṛta lāṃchana

6.85.22

mahādeva namaste'stu namaste viśvabhāvana /
arghaṃ gṛhāṇa bho deva muktiṃ me dehi sarvadā

6.85.23

nānāvidhaiḥ supuṣpaiśca pūjayedgaruḍāsanam /
sarvabādhāvinirmukto viṣṇoḥ sāyujyatāmiyāt

6.85.24

rātrau jāgaraṇaṃ tatra dvādaśyāṃ susamāhitaḥ /
bhaktipūrvaṃ bhajeddevaṃ viṣṇumavyayamakṣayam

6.85.25

evaṃ vaiśākha saṃbaṃdhī bhaktibhāvena tatparaiḥ /
utsavo viṣṇusaṃjñastu karttavyo bhaktimicchubhiḥ

6.85.26

āgamoktena maṃtreṇa vidhiṃ tatra prakārayet /
kṛte sati mahādevi koṭiyajñasamaṃ phalam

6.85.27

rāgadveṣavinirmukto mahāmohanivarttakaḥ /
ihaloke sukhaṃ bhuktvā yāti viṣṇoḥ sanātanam

6.85.28

brāhmaṇo bhaktibhāvena yaḥ karotyutsavaṃ bhuvi /
sarvapāpavinirmukto vaikuṃṭhaṃ gacchate dhruvam

6.85.29

vedādhyayanahīno'pi śāstrādhyayanavarjitaḥ /
haribhaktiṃ tu saṃprāpya labhate vaiṣṇavaṃ padam

6.85.30

ātmārāmaḥ sadā mukto vijitātmā bhavettu saḥ /
sa vai viṣṇupadaṃ yāti yāvaccaṃdra divākarau

6.85.85

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāmaheśvarasaṃvāde śayanamahotsavonāma pañcāśītitamo'dhyāyaḥ

Original text: padmapurāṇam · Sanskrit Wikisource contributors · Sanskrit Wikisource · CC BY-SA 4.0