Padma Purana · Chapter 6.62

yudhiṣṭhira uvāca -
bhagavañchrotumicchāmi vratānāmuttamaṃ vratam /
sarvapāpaharaṃ viṣṇoḥ phaladaṃ vratināṃ ca yat

puruṣottamamāsasya kathāṃ brūhi janārdana /
ko vidhiḥ kiṃ phalaṃ tasya ko devastatra pūjyate

adhimāse ca saṃprāpte vrataṃ brūhi janārdana /
kasya dānasya kiṃ puṇyaṃ kiṃ karttavyaṃ nṛbhiḥ prabho

kathaṃ snānaṃ ca kiṃ jāpyaṃ kathaṃ pūjāvidhiḥ smṛtaḥ /
kiṃ bhojyamuttamaṃ cānnaṃ māse'sminpuruṣottame

śrīkṛṣṇa uvāca-
kathayiṣyāmi rājeṃdra bhavataḥ snehakāraṇāt /
puruṣottamamāsasya māhātmyaṃ pāpanāśanam

adhimāse tu saṃprāpte bhavedekādaśī tu yā /
kamalā nāma sā nāmnā tithīnāmuttamā tithiḥ

tasyā vrataprabhāvena kamalābhimukhī bhavet /
brāhme muhūrtte cotthāya saṃsmṛtya puruṣottamam

snātvā caiva vidhānena niyamaṃ kārayedvratī /
gṛhe tvekaguṇaṃ jāpyaṃ nadyāṃ tu dviguṇaṃ smṛtam

gavāṃ goṣṭhe sahasrordhvamagnyāgāre śatānvitam /
śivakṣetreṣu tīrtheṣu devatānāṃ ca sannidhau

lakṣaṃ tulasyāḥ sāṃnidhye hyanaṃtaṃ viṣṇusannidhau /
avaṃtyāmabhavatkaścicchivaśarmā dvijottamaḥ

tasyātmajāstu paṃcāsankaniṣṭho doṣavānabhūt /
tadā pitrā parityaktastyaktaḥ svajanabāṃdhavaiḥ

kukarmaṇaḥ prabhāvena gato dūrataraṃ vanam /
ekadā daivayogena tīrtharājaṃ samāgataḥ

kṣutkṣāmo dīnavadanastriveṇyāṃ snānamācarat /
munīnāmāśramāṃstatra vicinvankṣudhayārditaḥ

harimitramunestatra dadarśāśramamuttamam /
puruṣottamamāse vai janānāṃ ca samāgame

tatrāśrame kathayatāṃ kathāṃ kalmaṣanāśinīm /
brāhmaṇānāṃ mukhāttena śraddhayā kamalā śrutā

ekādaśī puṇyatamā bhuktimuktipradāyinī /
jayaśarmā vidhānena śrutvemāṃ kamalā tithim

ekādaśīpuṇyatamā bhuktimuktipradāyinī /
vrataṃ kṛtaṃ ca taiḥ sārddhaṃ sthitvā śūnyālaye tadā

niśīthe samanuprāpte lakṣmīstatra samāgatā /
varaṃ dadāmi bho vipra kamalāyāḥ prabhāvataḥ

jayaśarmovāca -
kā tvaṃ kasyāsi raṃbhoru prasannā ca kathaṃ mama /
iṃdrāṇī suranāthasya bhavānī śaṃkarasya vā

gaṃdharvī kinnarī vātha vadhūrvā caṃdrasūryayoḥ /
tvatsadṛkṣā na dṛṣṭā ca na śrutā ca śubhānane

lakṣmīruvāca-
prasannā sāṃprataṃ jātā vaikuṃṭhādahamāgatā /
preritā devadevena kamalāyāḥ prabhāvataḥ

puruṣottamamāsasya yā pakṣe prathame bhavet /
tasyā vrataṃ tvayā cīrṇaṃ prayāge munisaṃnidhau

vratasyāsya prabhāvena vaśagāhaṃ na saṃśayaḥ /
tavavaṃśe bhaviṣyaṃti mānavā dvijasattama

matprasādādavāpsyaṃti satyaṃ te vyāhṛtaṃ mayā /
brāhmaṇa uvāca-
prasannā yadi me padme vrataṃ vistarato vada

yatkathāsu pravartaṃte sādhavo ye janā dvijāḥ /
lakṣmīruvāca-
śrotṝṇāṃ paramaṃ śrāvyaṃ pavitrāṇāmanuttamam

duḥsvapnanāśanaṃ puṇyaṃ śrotavyaṃ yatnatastataḥ /
uttamaḥ śraddhayā yuktaḥ ślokaṃ ślokārddhameva vā

paṭhitvā mucyate sadyo mahāpātakakoṭibhiḥ /
māsānāṃ paramo māsaḥ pakṣiṇāṃ garuḍo yathā

nadīnāṃ ca yathā gaṃgā tithīnāṃ dvādaśī tithiḥ /
adyāpi nirjarāḥ sarve bhārate janmalipsavaḥ

tamarcayaṃti vividhā nārāyaṇamanāmayam /
ye yajaṃti sadā bhaktyā devaṃ nārāyaṇaṃ prabhum

tānarcayaṃti satataṃ brahmādyā devatāgaṇāḥ /
ye'pi nāmaparā ye ca harikīrttanatatparāḥ

haripūjāparā ye ca te kṛtārthāḥ kalau yugeḥ /
śukle vā yadi vā kṛṣṇe bhavedekādaśī dvayam

gṛhasthānāṃ bhavetpūrvā yatīnāmuttarā smṛtā /
ekādaśī dvādaśī ca rātriśeṣe trayodaśī /
tatra kratuśataṃ puṇyaṃ trayodaśyāṃ tu pāraṇe

ekādaśyāṃ nirāhāraḥ sthitvāhamapare'haṃni /
bhokṣyāmi puṃḍarīkākṣa śaraṇaṃ me bhavācyuta

amuṃ maṃtraṃ samuccārya devadevasya cakriṇaḥ /
bhaktibhāvena tuṣṭātmā upavāsaṃ samācaret

kuryāddevasya purato jāgaraṃ niyato vratī /
gītairvādyaiśca nṛtyaiśca purāṇapaṭhanādibhiḥ

tataḥ prātaḥ samutthāya dvādaśīdivase vratī /
snātvā viṣṇuṃ samabhyarcya vidhivatprayateṃdriyaḥ

paṃcāmṛtena saṃsnāpya ekādaśyāṃ janārdanaḥ /
dvādaśyāṃ ca payaḥsnānāddhareḥ sārūpyamaśnute

ajñānatimirāṃdhasya vratenānena keśava /
prasīda sanmukho bhūtvā jñānadṛṣṭiprado bhava

evaṃ vijñāpya deveśaṃ devadevaṃ gadādharam /
brāhmaṇānbhojayedbhaktyā tebhyo dadyācca dakṣiṇām

tataḥ svabaṃdhubhiḥ sārddhaṃ nārāyaṇaparāyaṇaḥ /
kṛtvā paṃcamahāyajñānsvayaṃ bhuṃjīta vāgyataḥ

evaṃ yaḥ prayataḥ kuryātpuṇyamekādaśīvratam /
sa yāti viṣṇubhavanaṃ punarāvṛttidurllabham

ityuktvā kamalā tasmai varaṃ dattvā tirodadhe /
so'pi vipro dhanī bhūtvā piturgehaṃ samāgataḥ

śrīkṛṣṇa uvāca-
evaṃ yaḥ kurute rājankamalāvratamuttamam /
śṛṇuyādvāsare viṣṇoḥ sarvapāpaiḥ pramucyate

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāpatināradasaṃvāde puruṣottamamāsasya kṛṣṇā kamalānāmaikādaśīnāma dviṣaṣṭimo'dhyāyaḥ