Padma Purana · Chapter 6.60

yudhiṣṭhira uvāca-
kathayasva prasādena mayi snehājjanārdana /
kārttikasyāsite pakṣe kiṃnāmaikādaśī bhavet

śrīkṛṣṇa uvāca-
śrūyatāṃ rājaśārdūla kathayāmi tavāgrataḥ /
kārttike kṛṣṇapakṣe tu ramā nāma suśobhanā

ekādaśī samākhyātā mahāpāpaharā parā /
asyāḥ prasaṃgato rājanmāhātmyaṃ pravadāmi te

mucukuṃda iti khyāto babhūva nṛpatiḥ purā /
deveṃdreṇa samaṃ tasya mitratvamabhavannṛpa

yamena varuṇenaiva kubereṇāpi sarvathā /
vibhīṣaṇena yasyaiva sakhitvamabhavannṛpa

viṣṇubhaktaḥ satyasaṃdho babhūva nṛpatiḥ paraḥ /
tasyaivaṃ śāsato rājanrājyaṃ nihatakaṃṭakam

babhūva duhitā gehe caṃdrabhāgā saridvarā /
śobhanāya ca sā dattā caṃdrasenasutāya vai

sa kadācitsamāyātaḥ śvaśurasya gṛhe nṛpa /
ekādaśīvratadinaṃ samāyātaṃ supuṇyadam

samāgate vratadine caṃdrabhāgā tvaciṃtayat /
kiṃ bhaviṣyati deveśa mama bharttātidurbalaḥ

kṣudhāṃ na kṣamate soḍhuṃ pitā caivograśāsanaḥ /
paṭahastāḍyate yasya saṃprāpte daśamīdine

na bhoktavyaṃ na bhoktavyaṃ na bhoktavyaṃ harerdine /
śrutvā paṭahanirghoṣaṃ śobhanastvabravītpriyām

kiṃ karttavyaṃ mayā kāṃte dehi śikṣāṃ varānane /
caṃdrabhāgovāca -
matpiturveśmani prabho bhoktavyaṃ nādya kenacit

gajairaśvaiśca kalabhairanyaiḥ paśubhireva ca /
tṛṇamannaṃ tathā vāri na bhoktavyaṃ harerdine

mānavaiśca kutaḥ kāṃta bhujyate harivāsare /
yadi tvaṃ bhokṣyase kāṃta tato garhāṃ prayāsyasi

evaṃ vicārya manasā sudṛḍhaṃ mānasaṃ kuru /
śobhana uvāca-
satyametatpriye vākyaṃ kariṣye'hamupoṣaṇam

daivena vihitaṃ yaddhi tattathaiva bhaviṣyati /
iti dṛḍhāṃ matiṃ kṛtvā cakāra niyamaṃ vrate

kṣudhayā pīḍitatanuḥ sa babhūvātiduḥkhitaḥ /
iti ciṃtayatastasya ādityo'stamagādgirim

vaiṣṇavānāṃ narāṇāṃ sā niśā harṣavivarddhanī /
haripūjāratānāṃ ca jāgarāsaktacetasām

babhūva nṛpaśārdūla śobhanasyātiduḥkhadā /
raverudayavelāyāṃ śobhanaḥ paṃcatāṃ gataḥ

dāhayāmāsa rājā taṃ rājayogyaiśca dārubhiḥ /
caṃdrabhāgā nātmadehaṃ dadāha patinā saha

kṛtvaurddhvadaihikaṃ tasya tasthau janakaveśmani /
śobhanaśca nṛpaśreṣṭha ramāvrataprabhāvataḥ

prāpto devapuraṃ ramyaṃ maṃdarācalasānuni /
anuttamamanādhṛṣyamasaṃkhyeyaguṇānvitam

hemastaṃbhamayaisaudhai ratnavaiḍūryamaṃḍitaiḥ /
sphāṭikairvividhākārairvicitrairupaśobhitaiḥ

siṃhāsanasamārūḍhaḥ suśvetacchatracāmaraḥ /
kirīṭakuṃḍalayuto hārakeyūrabhūṣitaḥ /
stūyamānaśca gaṃdharvairapsarogaṇasevitaḥ

śobhanaḥ śobhate yatra rājarājoparo yathā /
somaśarmeti vikhyāto mucukuṃdapure'bhavat

tīrthayātrāprasaṃgena bhramanvipro dadarśa tam /
nṛpajāmātaraṃ jñātvā tatsamīpaṃ jagāma saḥ

śobhano'pi tadā jñātvā somaśarmāṇamāgatam /
āsanādutthitaḥ śīghraṃ namaścakre dvijottamam

cakāra kuśalapraśnaṃ śvaśurasya nṛpasya ca /
kāṃtāyāścaṃdrabhāgāyāstathaiva nagarasya ca

somaśarmovāca-
kuśalaṃ varttate rājanśvaśurasya gṛhe tava /
caṃdrabhāgā kuśalinī sarvataḥ kuśalaṃ pure

svavṛttaṃ kathyatāṃ rājannāścaryaṃ vidyate'dbhutam /
puraṃ vicitraṃ ruciraṃ na dṛṣṭaṃ kenacitkvacit

etadācakṣva nṛpate kutaḥ prāptamidaṃ tvayā /
śobhana uvāca-
kārtikasyāsite pakṣe yā nāmaikādaśī ramā

tāmupoṣya mayā prāptaṃ dvijeṃdra puramadhruvam /
dhruvaṃ bhavati yenaiva tatkuruṣva dvijottamaḥ

dvija uvāca-
kathamadhruvametaddhi kathaṃ hi bhavati dhruvam /
tattvaṃ kathaya rājeṃdra tatkariṣyāmi nānyathā

śobhana uvāca-
mayaitadvihitaṃ vipra śraddhāhīnaṃ vratottamam /
tenāhamadhruvaṃ manye dhruvaṃ bhavati tacchṛṇu

mucukuṃdasya duhitā caṃdrabhāgā suśobhanā /
tasyai kathaya vṛttāṃtaṃ dhruvametadbhaviṣyati

kṛṣṇa uvāca-
sa śrutvā vacanaṃ tasya mucukuṃdapuraṃ gataḥ /
uvāca sarvaṃ vṛttāṃttaṃ caṃdrabhāgāgrato dvijaḥ

somaśarmovāca -
pratyakṣaṃ dayitaḥ kāṃtastava dṛṣṭo mayā śubhe /
iṃdratulyamanādhṛṣyaṃ dṛṣṭaṃ tasya puraṃ mayā /
adhruvaṃ tena tatproktaṃ dhruvaṃ bhavati tatkuru

caṃdrabhāgovāca-
tatra māṃ naya viprarṣe patidarśanalālasām /
ātmano vratapuṇyena kariṣyāmi puraṃ dhruvam

āvayordvijasaṃyogo yathā bhavati tatkuru /
prāpyate hi mahatpuṇyaṃ kṛtvā yogaṃ viyuktayoḥ

iti śrutvā saha tayā somaśarmā jagāma ha /
āśramaṃ vāmadevasya maṃdarācalasaṃnidhau

vāmadevo'śṛṇotsarvaṃ vṛttāṃtaṃ kathitaṃ tayoḥ /
abhyaṣiñcaccandrabhāgāṃ vedamaṃtrairathojjvalām

ṛṣimaṃtraprabhāvena viṣṇuvāsarasevanāt /
divyadehā babhūvāsau divyāṃ gatimavāpa ha

patyuḥ samīpamagamatpraharṣotphullalocanā /
jaharṣa śobhano'tīva dṛṣṭvā kāṃtāṃ samāgatām

samāhūya svake vāme pārśvetāṃ saṃnyaveśayat /
athovāca priyaṃ harṣāccaṃdrabhāgā priyaṃ vacaḥ

śṛṇu kāṃta hitaṃ vākyaṃ yatpuṇyaṃ vidyate mayi /
aṣṭavarṣādhikā jātā yadāhaṃ pitṛveśmani

tataḥ prabhṛti yaccīrṇaṃ mayā caikādaśīvratam /
yathoktavidhisaṃyuktaṃ śraddhāyuktena cetasā /
tena puṇyaprabhāvena bhaviṣyati puraṃ dhruvam

sarvakāmasamṛddhaṃ ca yāvadābhūtasaṃplavam /
evaṃ sā nṛpaśārdūla ramate patinā saha

divyabhogā divyarūpā divyābharaṇabhūṣitā /
śobhano'pi tayā sārddhaṃ ramate divyavigrahaḥ

ramāvrataprabhāvena maṃdarācalasānuni /
ciṃtāmaṇisamā hyeṣā kāmadhenusamātha vā

ramābhidhānā nṛpate tavāgre kathitā mayā /
tasyā māhātmyamanagha śrutaṃ sarvaṃ tvayā nṛpa

mayā tavāgre kathitaṃ māhātmyaṃ pāpanāśanam /
ekādaśīvratānāṃ ca pakṣayorubhayorapi

yathā kṛṣṇā tathā śuklā vibhedaṃ naiva kārayet /
sevitaikādaśī nṝṇāṃ bhuktimuktipradāyinī

dhenuḥ śvetā yathā kṛṣṇā ubhayoḥ sadṛśaṃ payaḥ /
tathaiva tulyaphaladaṃ smṛtamekādaśīdvayam

ekādaśīvratānāṃ yo māhātmyaṃ śṛṇute naraḥ /
sarvapāpavinirmukto viṣṇuloke mahīyate

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāpatināradasaṃvāde kārtika kṛṣṇā ramaikādaśīnāma ṣaṣṭitamo'dhyāyaḥ