Padma Purana · Chapter 6.58

yudhiṣṭhira uvāca-
kathayasva prasādena mamāgre madhusūdana /
iṣasya kṛṣṇapakṣe tu kiṃnāmaikādaśībhavet

śrīkṛṣṇa uvāca-
āśvine kṛṣṇapakṣe tu iṃdirā nāma nāmataḥ /
tasyā vrataprabhāvena mahāpāpaṃ praṇaśyati

adhoyoni gatānāṃ ca pitṝṇāṃ gatidāyinī /
śṛṇuṣvāvahito rājankathāṃ pāpaharāṃ parām

yasyāḥ śravaṇamātreṇa vājapeyaphalaṃ labhet /
purā kṛtayuge rājanbabhūva nṛpanaṃdanaḥ

iṃdrasena iti khyātaḥ purā māhiṣmatīpatiḥ /
sa rājā pālayāmāsa dharmeṇa yaśasānvitaḥ

putrapautrasamāyukto dhanadhānyasamanvitaḥ /
māhiṣmatyadhipo rājā viṣṇubhaktiparāyaṇaḥ

japangoviṃdanāmāni muktidāni narādhipaḥ /
kālaṃ nayati vidhivadadhyātmadhyānaciṃtakaḥ

ekasmindivase rājñi sukhāsīne sado gate /
avatīryāgamattatra hyaṃbarānnārado muniḥ

tamāgatamabhiprekṣya pratyutthāya kṛtāṃjali /
pūjayitvātha vidhinā cāsane saṃnyaveśayat

sukhopaviṣṭaṃ sa muniṃ pratyuvāca nṛpottamaḥ /
rājovāca-/
tvatprasādānmuniśreṣṭha sarvaṃ ca kuśalaṃ mama

adya kratukriyāḥ sarvāḥ saphalāstava darśanāt /
prasādaṃ kuru devarṣe brūhyāgamanakāraṇam

nārada uvāca-
śrūyatāṃ nṛpaśārdūla madvaco vismayapradam /
brahmalokādahaṃ prāpto yamalokaṃ nṛpottama

śamanenārcito bhaktyā upaviṣṭo varāsane /
dharmaśīlaḥ satyavāṃstu bhāskariṃ samupāsate

bahupuṇyaprakarttā ca vratavaikalyadoṣataḥ /
sabhāyāṃ śrāddhadevasya mayā dṛṣṭaḥ pitā tava

kathitastena saṃdeśastaṃ nibodha janeśvara /
iṃdrasena iti khyāto rājā māhiṣmatīpatiḥ

tasyāgre kathayabrahmansthitaṃ māṃ yamasaṃnidhau /
kenāpi cāṃtarāyeṇa pūrvajanmodbhavena ca

svargaṃ preṣaya māṃ putra iṃdirā puṇya dānataḥ /
ityukto'haṃ samāyātaḥ samīpaṃ tava pārthiva

pituḥ svargakṛte rājanniṃdirā vratamācara /
tena vrataprabhāvena svargaṃ yāsyati te pitā

rājovāca-
kathayasva prasādena bhagavanniṃdirā vratam /
vidhinā kena karttavyaṃ kasminpakṣe tithau tathā

nāradauvāca-
śṛṇu rājeṃdra te vacmi vratasyāsya vidhiṃ śubham /
āśvinasyāsite pakṣe daśamī divase śubhe

prātaḥsnānaṃ prakurvīta śraddhāyuktena cetasā /
tato madhyāhnasamaye snānaṃ kṛtvā samāhitaḥ

pitṝṇāṃ prītaye śrāddhaṃ kuryācchraddhā samanvitaḥ /
ekabhaktaṃ tataḥ kṛtvā rātrau bhūmau śayīta ca /
prabhāte vimale jāte prāpte caikādaśī dine

mukha prakṣālanaṃ kuryāddaṃtadhāvana varjitam /
upavāsasya niyamaṃ gṛhṇīyādbhaktibhāvataḥ

adyasthitvā nirāhāraḥ sarvabhoga vivarjitaḥ /
śvo bhokṣye puṃḍarīkākṣa śaraṇaṃ me bhavācyuta

ityevaṃ niyamaṃ kṛtvā madhyāhna samaye tathā /
śālagrāma śilāgre tu snānaṃ kuryādyathāvidhi

pūjayitvā hṛṣīkeśaṃ dhūpa gaṃdhādibhistathā /
rātrau jāgaraṇaṃ kuryātkeśavasya samīpataḥ

tataḥ prabhātasamaye prāpte vai dvādaśī dine /
arcayitvā hariṃ bhaktyā śrāddhaṃ kuryādyathāvidhi

pitṝṇāṃ prītaye śrāddhaṃ kuryācchraddhā samanvitaḥ /
godhūma cūrṇairyachrāddhaṃ kṛtaṃ medhyakṛtaṃ bhavet

yavairvrīhitilairmāṣairgodhūmaiścaṇakaistathā /
brāhmaṇānbhojayedrājan dakṣiṇābhiḥ prapūjitān

baṃdhu dauhitra putrādyaiḥ svayaṃ bhuṃjīta vāgyataḥ /
anena vidhinā rājankuruvratamataṃdritaḥ

viṣṇulokaṃ prayāsyaṃti pitarastava bhūpate /
ityuktvā nṛpatiṃ rājanmuniraṃtaradhīyata

yathokta vidhinā rājā cakāra vratamuttamam /
aṃtaḥpureṇa sahitaḥ putrabhṛtya samanvitaḥ

kṛte vrate tu kauṃteya puṣpavṛṣṭirabhūddivaḥ /
tatpitā garuḍārūḍho jagāma harimaṃdiram

iṃdraseno'pirājarṣiḥ kṛtvā rājyamakaṃṭakam /
rājye niveśya tanayaṃ jagāma tridivaṃ svayam

iṃdirā vrata māhātmyaṃ tavāgre kathitaṃ mayā /
paṭhanācchravaṇādrājan sarvapāpaiḥ pramucyate

bhuktveha nikhilānbhogān viṣṇuloke vasecciram

iti śrīpādmemahāpurāṇe paṃcapaṃcāśatsāhasryāṃsaṃhitāyām uttarakhaṃḍe /
umāpatināradasaṃvāde āśvinakṛṣṇeṃdiraikādaśīnāmāṣṭapaṃcāśattamo'dhyāyaḥ