Padma Purana · Chapter 6.34

nārada uvāca-
trispṛśākhyaṃ vrataṃ brūhi sarveśvara viśeṣataḥ /
yacchrutvā mucyate lokaḥ karmabaṃdhanataḥ kṣaṇāt

mahādeva uvāca-
sarvapāpaughaśamanaṃ mahāduḥkhavināśanam /
śṛṇu kṛṣṇāvatāraṃ tvaṃ trispṛśākhyaṃ mahāvratam

kāmadaṃ saspṛhāṇāṃ tu nispṛhāṇāṃ tu mokṣadam /
trispṛśākhyaṃ vrataṃ vipra śṛṇuṣva gadato mama

pratyakṣamarcitastena kalikāle ca keśavaḥ /
trispṛśā kīrtanaṃ nityaṃ yaḥ karoti mahāmune

na puraścaraṇe cīrṇe sarvapāpakṣayo bhavet /
trispṛśā nāmamātreṇa kṣīyate nātra saṃśayaḥ

nāgamairna purāṇādyairna makhaistīrthakoṭibhiḥ /
bahubhirvratasaṃghaiśca pūjitaistridaśairapi

mokṣo bhavati viprendra trispṛśā na kṛtā yadi /
mokṣārthe devadevena dṛṣṭā vai vaiṣṇavī tithiḥ

dvijānāṃ durvidaṃ sāṃkhyaṃ kalikāle viśeṣataḥ /
anigrahaśceṃdriyāṇāṃ sthiratvaṃ manaso nahi

viṣayairviprayuktānāṃ dhyānadhāraṇavarjinām /
kāmabhogaprasaktānāṃ trispṛśā mokṣadāyinī

mahyaṃ caiva purā proktā caturvaktrasya sāgare /
kṣīrode praṇatānāṃ tu matsyarūpeṇa cakriṇā

trispṛśāṃ ye kariṣyaṃti viṣayairapi saṃyutāḥ /
teṣāmapi mayā datto mokṣaḥ sāṃkhyavivarjinām

kāmabhogaprasaktānāṃ trispṛśā mokṣadāyinī /
bahubhirmunisaṃghaiśca kṛteyaṃ ca mahāmune

kārttike śuklapakṣe tu trispṛśā jāyate yadi /
somena somajenāpi pāpakoṭivināśinī

yasyā upoṣaṇakṛto hatyāyukta maheśituḥ /
hastādbrahmakapālaṃ tu tatkṣaṇātpatitaṃ bhuvi

kalikalmaṣakoṭyaughairmuktā devī trimārgagā /
upadeśānmādhavasya trispṛśā samupoṣaṇāt

hatyāṣṭau bāhuvīryasya pūrvajātā mahāmune /
gatā bhṛgūpadeśena trispṛśā samupoṣaṇāt

śatāyudhena vipreṃdra nihato brāhmaṇo vane /
brahmahatyāvinirmuktaḥ trispṛśā samupoṣaṇāt

jīvopadeśācchakrasya hatyā namucisaṃbhavā /
vinaṣṭā munimukhyendra trispṛśā samupoṣaṇāt

brahmahatyādi pāpāni trispṛśāsamupoṣaṇāt /
vilayaṃ yāṃti vipreṃdra pāpeṣvanyeṣu kā kathā

na prayāge na kāśyāṃ tu gomatyāṃ kṛṣṇasaṃnidhau /
mokṣo bhavati vipreṃdra trispṛśā yadi no kṛtā

maraṇācca prayāge tu gomatyāṃ kṛṣṇasannidhau /
snānamātreṇa gomatyāṃ muktirbhavati śāśvatī

gṛhepi jāyate muktistrispṛśā samupoṣaṇāt /
viṣaye varttamānasya kāmabhogānvitasya ca

nivṛttaviṣayasyāpi muktiḥ sāṃkhyena durllabhā /
tasmātkuruṣva vipreṃdra trispṛśāṃ mokṣadāyinīm

nārada uvāca-
kīdṛśaṃ tatsuraśreṣṭha trispṛśākhyaṃ mahāvratam /
muktidaṃ yad dvijātīnāṃ tvayā proktaṃ mamādhunā

mahādeva uvāca-
jāhnavyai sā purā vipra trispṛśā mādhavena tu /
prācī sarasvatī tīre kathitā tvanukaṃpayā

jāhnavyuvāca-
kalikalmaṣa koṭyaughairbrahmahatyādikairyutāḥ /
kalikāle hṛṣīkeśa snānaṃ kurvaṃti majjale

teṣāṃ pāpaśatairdoṣairdeho me kaluṣī kṛtaḥ /
kathaṃ yāsyati me deva pātakaṃ garuḍadhvaja

prācīmādhava uvāca-/
kathayāmi na saṃdeho mā putri rodanaṃkuru /
śyāmovaṭastu me sthānaṃ prācīdevī mamāgrataḥ

vahate brahmatanayā dṛṣṭvāgre ca sureśvarīm /
snānaṃ kuruṣva nityaṃ tvaṃ tvatra pūtā bhaviṣyasi

yatra brahmasutā prācī tatrāhaṃ nātra saṃśayaḥ /
tīrthakoṭiśatairyuktaḥ suraiḥ saha vasāmyaham

pavitraṃ matpriyaṃ sthānaṃ hatyākoṭivināśanam /
saṃtuṣṭena mayā dattaṃ yasmātprāṇādhikāsi me

tīrthakoṭisahasrāṇi nityaṃ tiṣṭhaṃti jāhnavi /
prācīsarasvatī toye sarvadaiva mamājñayā

brahmavadhātsurāpānātgodhavādvṛṣalīvadhāt /
brahmasvaharaṇādeva mātāpitrostvapūjanāt

cakriyānādgurudrohādabhakṣyasya ca bhakṣaṇāt /
sarvapāpasya karaṇātprācī brahmasutā sute

vyapohayati pāpāni sakṛtsnānena me'grataḥ /
kuru snānaṃ saricchreṣṭhe vipāpā tvaṃ bhaviṣyasi

jāhnavyuvāca-
nāhaṃ śaknomi deveśa āgaṃtuṃ nityameva hi /
kathaṃ naśyaṃti pāpāni kathayasveha mādhava

prācīmādhava uvāca-
na śaknoṣi yadāgaṃtuṃ nityameva hi jāhnavi /
tadānyatsaṃpravakṣyāmi yasmānmatpādasaṃbhavā

sarasvatyadhikā yā ca tīrthakoṭiśatādhikā /
makhakoṭyadhikā vāpi vratadānādhikā ca yā

japahomādhikā yā ca caturvargaphalapradā /
sāṃkhyayogādhikā yā ca trispṛśā kriyatāṃ śubhā

yasminmāse samāyāti sitā ca yadi vāsitā /
kartavyā sā saricchreṣṭhe kṛte pāpātpramucyate

jāhnavyuvāca-/
kīdṛśī trispṛśā deva mamākhyāhi sumādhava /
īdṛśo mahimā yasyāstvayā prokto mamādhunā

daśamyekādaśībhadrā dinaikasminyadā bhavet /
trispṛśā sā bhaveddeva vānyathā vada me prabho

kṛṣṇa uvāca-/
āsurī trispṛśā devī yā tvayā parikīrtitā /
varjanīyā prayatnena vṛttihīno yathā patiḥ

asurāṇāṃ tu sā proktā āyurbalavināśinī /
varjanīyā prayatnena yathā nārī rajasvalā

svajātiṃ ca parityajya yā gatādhamajātiṣu /
saiva tyājyaṃ viśeṣeṇa daśamīyuktaṃ hi maddinam

yathā rajasvalāsaṃgāddūṣyaṃte jñānavarjitāḥ /
tathaiva daśamīyuktaṃ maddinaṃ dūṣitaṃ nṛṇām

hatyāyutaśataṃ haṃti trispṛśā samupoṣitā /
ekādaśī dvādaśī ca rātriśeṣe trayodaśī

trispṛśā sā tu vijñeyā daśamīsahitā na hi /
kṛtvāparādhaṃ mucyeta prāyaścitte kṛte naraḥ

daśamīvedhajaṃ doṣaṃ na kṣamāmi surāpage /
bhuktaṃ hālāhalaṃ tena viṣasya bhakṣaṇaṃ kṛtam

daśamīmiśritaṃ yena kṛtamekādaśīvratam /
iti matvā na karttavyaṃ maddinaṃ daśamīyutam

janmakoṭikṛtaṃpuṇyaṃ saṃtānaṃ yāti saṃkṣayam /
pātayetsvakulaṃ svargānnayate rauravādikam

svadehaṃ śodhayitvā tu karttavyo mama vāsaraḥ /
vṛddhau tyājyā vinā vedhācchravaṇādiṣu saṃyutā

janmapuṇyaṃ kṣayaṃ yāti ekādaśyupavāsinām /
saṃvṛddhau tu viśeṣeṇa saṃdehe samupasthite

mamājñayā ca karttavyā dvādaśīvallabhā mama

jāhnavyuvāca-
kariṣye'haṃ jagannātha trispṛśāṃ vacanāttava /
sarvapāpavinirmuktā bhaviṣyāmi tavājñayā

śrīkṛṣṇa uvāca-
svasthānaṃ gaccha bhadraṃ te na bhīḥ kāryā kadācana /
tava devi saricchreṣṭhe na pāpaṃ saṃkramiṣyati

snātvā sarasvatītoye ye'rcayitvā ca mādhavam /
praṇamaṃti jagannāthaṃ te yāṃti paramāṃ gatim

jāhnavyuvāca-/
vidhānaṃ brūhi me brahmansarvasvena karomyaham /
prasādayāmi deveśaṃ dāmodaramanāmayam

prācīmādhava uvāca-/
śṛṇu devi pravakṣyāmi trispṛśāyā vidhānakam /
yaṃ śrutvāpi saricchreṣṭhe mucyate pātakairnaraḥ

palena ca palārdhena tadarddhenāpi vāpage /
pratimā mama sauvarṇā kāryā vibhavasārataḥ

pātraṃ tāmramayaṃ kāryaṃ tilaistu paripūritam /
sajalaṃ tu ghaṭaṃ śubhraṃ paṃcaratnasamanvitam

veṣṭitaṃ puṣpamālābhiḥ karpūrāguruvāsitam /
nyaseddāmodaraṃ paścātsnāpayitvā vilipya ca

paridhānaṃ tataḥ kāryaṃ vastrayugmena cānvitam /
maṃtraistu pūjanaṃ kāryaṃ purāṇaiḥ samudīritaiḥ /
puṣpaiḥ kālodbhavaiḥ śubhraistulasīpatraiśca komalaiḥ

chatraṃ tu viṣṇave dadyātpādukābhyāṃ susaṃyutam /
nivedyāni manojñāni phalāni subahūnyapi

upavītaṃ tu dātavyaṃ sottarīyaṃ navaṃ dṛḍham /
vaiṇavaṃ dāpayeddaṃḍaṃ surūpaṃ sonnataṃ dṛḍham

dāmodarāya vai pādau jānunī mādhavāya ca /
guhyaṃ kāmapradāyeti kaṭiṃ vāmanamūrtaye

padmanābhāya nābhiṃ tu jaṭharaṃ viśvayonaye /
hṛdayaṃ jñānagamyāya kaṃṭhaṃ vaikuṃṭhagāmine

sahasrabāhave bāhū cakṣuṣī yogarūpiṇe /
saṃpūjya vidhivadbhaktyā dadyādarghaṃ vidhānataḥ

śubhreṇa nālikereṇa śaṃkhopari sthitena hi /
sūtrairāveṣṭitenaiva hastayorubhayorapi

smṛto harasi pāpāni yadi nityaṃ janārdana /
duḥsvapnaṃ durnimittāni manasā durvicinvitā

nārakaṃ tu bhayaṃ deva bhayadurgatisaṃbhavam /
yanmama syānmahādeva aihikaṃ pāralaukikam

tena deveśa māṃ rakṣa gṛhāṇārghaṃ namostu te /
kṛpādṛṣṭiḥ sadaivāstu dāmodara mamopari

dhūpaṃ dīpaṃ ca naivedyaṃ kuryānnīrājanaṃ tataḥ /
śīrṣopari saricchreṣṭhe bhrāmayedvārijaṃ hareḥ

kṛtvā vidhānametaddhi pūjayetsvaguruṃ tataḥ /
dadyātsuvarṇaṃ vastrāṇi soṣṇīṣaṃ caiva kaṃcukam

upānaho'pi chatraṃ ca mudrikāṃ ca kamaṃḍalum /
bhojanaṃ caiva tāṃbūlaṃ saptadhānyaṃ ca dakṣiṇām

guruṃ saṃpūjya deveśaṃ kuryājjāgaraṇaṃ hareḥ /
gītanṛtyasamāyuktaṃ tathā śāstrasamanvitam

niśāṃte caiva devāya datvā cārghaṃ vidhānataḥ /
snānādikāṃ kriyāṃ kṛtvā bhuṃjīyādvāḍavaiḥ saha

śiva uvāca-
dvijaitattrispṛśākhyānamadbhutaṃ romaharṣaṇam /
śrutvā tu labhate puṇyaṃ gaṃgāṃ snānasamudbhavam

aśvamedhasahasrāṇi vājapeyaśatāni ca /
tatphalaṃ samavāpnoti trispṛśā samupoṣaṇāt

pitṛpakṣo mātṛpakṣastathā caivātmapakṣakaḥ /
taiḥ sarvaiḥ saha saṃmukto viṣṇuloke mahīyate

tīrthakoṭiṣu yatpuṇyaṃ kṣetrakoṭiṣu yatphalam /
tatphalaṃ samavāpnoti trispṛśā samupoṣaṇāt

brāhmaṇā ye'pi kurvaṃti kṣatriyāḥ kṛṣṇamānasāḥ /
vaiśyā vā śūdrajanmāno ye tathā cānyajātayaḥ

te sarve muktimāyāṃti bhuvaṃ tyaktvā dvijottama /
maṃtrāṇāṃ maṃtrarājo'tha yathā syāddvādaśākṣaraḥ

vratānāṃ ca yathā caiṣā yena vai trispṛśā kṛtā /
brahmaṇā ca kṛtā pūrvaṃ paścādrājarṣibhiḥ kṛtā

anyeṣāṃ kā kathā vatsa trispṛśā muktidāyinī /
anena vidhinā brahmaṃstrispṛśāsaṃbhavaṃ vratam

yaḥ karoti naro bhaktyā śṛṇu vakṣyāmi tatphalam /
gaṃgāvagāhane brahmanvārāṇasyāṃ tu yatphalam

manvaṃtarasahasraistu trispṛśākārako hi tat /
prācī ca yamunā snāne varṣairyatkoṭibhiḥ phalam

tatphalaṃ samavāpnoti trispṛśāvratakṛnnaraḥ /
tatphalaṃ tu kurukṣetre sūryagrahaṇakoṭibhiḥ

hemabhāraśatairdānaistrispṛśākaraṇena tat /
pāpakoṭisahasrāṇi hatyākoṭiśatāni ca

ekenaivopavāsena kriyate bhasmasāddrutam /
trispṛśāyā vrataṃ yattu agatīnāṃ gatipradam

gatimicchaṃti viprarṣe mahatpāpaśatāni ca /
svayaṃ kṛṣṇena kathitaṃ pārāśaryasya cāgrataḥ

prakāśayati yaścedaṃ likhitvā vaiṣṇavaṃ dvije /
pāpoghairgrathitasyāpi tasya muktirbhaviṣyati

puṇyairavāpyate vidvanmanvaṃtaraśatairapi /
trispṛśā durlabhā loke prāpyate naiva mānavaiḥ

kalau ye trispṛśāṃ labdhvā na kurvaṃti narādhamāḥ /
teṣāṃ janmaphalaṃ caiva jīvitaṃ viphalaṃ bhavet

pretatvaṃ taiḥ samuttīrṇaṃ vinā śrāddhairvinā sutaiḥ /
kṛtā yaistrispṛśā vidvansakṛtprāpya kalau yuge

iti śrīpādme mahāpurāṇe paṃcapaṃcāśatsahasrasaṃhitāyāṃ uttarakhaṇḍe umāpatināradasaṃvāde trispṛśākhyānaṃnāma catustriṃśo'dhyāyaḥ