Padma Purana · Chapter 6.26

nārada uvāca-
guṇādhikebhyo viprebhyo dātukāmo'pi mānavaḥ /
kānikāni ca loke'smindadyātsarvaṃ tathā vada

mahādeva uvāca-
loke tatvaṃ hi saṃjñāya śṛṇu devarṣisattama /
annamevaṃ praśaṃsaṃti sarvamanne pratiṣṭhitam

tasmādannaṃ viśeṣeṇa dātumicchaṃti mānavāḥ /
annena sadṛśaṃ dānaṃ na bhūtaṃ na bhaviṣyati

annena dhāryate viśvaṃ jagatsthāvarajaṃgamam /
annamūrjaskaraṃ loke prāṇāhyanne pratiṣṭhitāḥ

dātavyaṃ bhakṣyamevānnaṃ brāhmaṇāya mahātmane /
kuṭuṃbaṃ pīḍayitvāpi ātmano bhūtimicchatā

nāradāsau vidāṃśreṣṭho yo dadyādannamarthine /
brāhmaṇāyārtarūpāya pāralaukikamātmanaḥ

ātmīyabhūtimanvicchetkāle dvijamupasthitam /
śrāṃtamadhvani varttaṃtaṃ gṛhasthaṃ gṛhamāgatam

annadaḥ prāpnute vidvānsuśīlo vītamatsaraḥ /
krodhamutpatitaṃ hitvā divi ceha ca yatsukham

nābhiniṃdecca atithiṃ na druhyācca kathaṃcana /
brahmavide'rpayedannaṃ tacca dānaṃ viśiṣyate

śrāṃtāyādṛṣṭapūrvāya annamadhvani vartine /
yo dadyācca parikliṣṭaṃ sarvadharmamavāpnuyāt

pitṛdevāṃstathā viprātithīṃśca mahāmune /
yo naraḥ prīṇayetānnaistasya puṇyamanaṃtakam

kṛtvāpi sumahatpāpaṃ yo dadyādannamarthine /
brāhmaṇāya viśeṣeṇa sa tu pāpaiḥ pramucyate

brāhmaṇeṣvakṣayaṃ dānamannaṃ śūdre mahatphalam /
annadānaṃ ca śūdre ca brāhmaṇe cāvaśiṣyate

na pṛcchedgotracaraṇaṃ na ca svādhyāyameva ca /
bhikṣuko brāhmaṇo hyatra dadyādannaṃ prayāti ca

annadasya śubhā vṛkṣāḥ sarvakāmaphalānvitāḥ /
saṃbhavaṃtīha loke ca harṣayuktāstriviṣṭape

annadānena ye lokāstānśṛṇuṣvamahāmune /
vimānāni prakāśaṃte divi teṣāṃ mahātmanām

nānāsaṃsthānarūpāṇi nānākāmānvitāni ca /
sarvakāmaphalāścāpi vṛkṣā bhuvanasaṃsthitāḥ

hemavāpyaḥ śubhāḥ sarvā dīrghikāścaiva sarvaśaḥ /
ghoṣavaṃti ca yānāni muktānyatha sahasraśaḥ

bhakṣyabhojyamayāḥ śailā vāsāṃsyābharaṇāni ca /
kṣīraṃ sravaṃtyaḥ saritastathaivājyasya parvatāḥ

prāsādāḥ śubhravarṇābhāḥ śayyāśca kanakojvalāḥ /
tadannaṃ dātumicchaṃti tasmādannaprado bhavet

ete lokāḥ puṇyakṛtāmannadānaṃ mahatphalam /
tasmādannaṃ viśeṣeṇa dātavyaṃ mānavairbhuvi

iti śrīpādme mahāpurāṇe paṃcapaṃcāśatsahasrasaṃhitāyāṃ uttarakhaṇḍe umāpatināradasaṃvāde annadānapraśaṃsānāma ṣaḍviṃśo'dhyāyaḥ