Padma Purana · Chapter 5.80

pārvatyuvāca-
ghore kaliyuge prāpte viṣayagrāhasaṃkule /
putradāradhanādyārtaistatkathaṃ dhāryate vibho

tadupāyaṃ mahādeva kathayasva kṛpānidhe /
īśvara uvāca-
harernāma harernāma harernāmaiva kevalam

harerāma harekṛṣṇa kṛṣṇakṛṣṇeti maṃgalam /
evaṃ vadaṃti ye nityaṃ na hi tānbādhate kali

aṃtarāṃtarakarmāṇi kṛtvā nāmāni ca smaret /
kṛṣṇakṛṣṇeti kṛṣṇeti kṛṣṇetyāha punaḥ punaḥ

mannāma caiva tvannāma yojayitvā vyatikramāt /
so'pi pāpātpramucyeta tūlarāśerivānalaḥ

jayādyetattvayā vāpyathavā śrīśabdapūrvakam /
tacca me maṃgalaṃ nāma japanpāpātpramucyate

divāniśi ca saṃdhyāyāṃ sarvakāleṣu saṃsmaret /
aharniśaṃ smaranrāmaṃ kṛṣṇaṃ paśyati cakṣuṣā

aśucirvā śucirvāpi sarvakāleṣu sarvadā /
nāmasaṃsmaraṇādeva saṃsārānmucyate kṣaṇāt

nānāparādhayuktasya nāmāpi ca haratyagham /
yajñavratatapodānaṃ sāṃgaṃ naiva kalau yuge

gaṃgāsnānaṃ harernāma nirapāyamidaṃ dvayam

hatyāyutaṃ pāpasahasramugraṃ gurvaṃganākoṭiniṣevaṇaṃ ca /
steyānyathānyāni hareḥ priyeṇa goviṃdanāmnā na ca saṃti bhadre

apavitraḥ pavitro vā sarvāvasthāṃ gato'pi vā /
yaḥ smaretpuṃḍīkākṣaṃ sa bāhyābhyaṃtaraḥ śuciḥ

nāmasaṃsmaraṇādeva tathā tasyārthaciṃtanāt /
sauvarṇīṃ rājatīṃ vāpi tathā paiṣṭīṃ sragākṛtim

pādayościhnitāṃ kṛtvā pūjāṃ caiva samārabhet /
dakṣiṇasya padoṃguṣṭhamūle cakraṃ bibharti yaḥ

tatra namrajanasyāpi saṃsāracchedanāya ca /
madhyamāṃgulimūle tu dhatte kamalamacyutaḥ

dhyātṛcittadvirephāṇāṃ lobhanāyātiśobhanam /
padmasyādhodhvajaṃ dhatte sarvānarthajayadhvajam

kaniṣṭhāmūlato vajraṃ bhaktapāpaughabhedanam /
pārśvamadhyeṃ'kuśaṃ bhaktacitte rabhasakāraṇam

bhogasaṃpanmayaṃ dhatte yavamaṃguṣṭhaparvaṇi /
mūle gadāṃ ca pāpādribhedanīṃ sarvadehinām

sarvavidyāprakāśāya dhatte sa bhagavānajaḥ /
padmādīnyapi cihnāni tatra dakṣeṇa yatpunaḥ

vāmapāde vasetso'yaṃ bibhartti karuṇānidhiḥ /
tasmādgoviṃdamāhātmyamānaṃdarasasuṃdaram

śṛṇuyātkīrttayennityaṃ sa nirmukto na saṃśayaḥ /
māsakṛtyaṃ pravakṣyāmi viṣṇoḥ prītikaraṃ param

jyeṣṭhe tu snāpanaṃ kuryācchrīviṣṇoryatnataḥ śuciḥ /
dainaṃdinaṃ tu duritaṃ pakṣamāsarttuvarṣajam

brahmahatyāsahasrāṇi jñātā jñātakṛtāni ca /
svarṇasteyasurāpāna gurutalpāyutāni ca

koṭikoṭisahasrāṇi hyupapāpāni yāni ca /
sarvāṇyatha praṇaśyaṃti paurṇamāsyāṃ tu vāsare

āsiṃcedacyutaṃ mūrdhni tadaitatkalaśodakam /
puruṣasūktena maṃtreṇa pāvamānībhireva ca

nālikerodakenātha tathā tālaphalāṃbunā /
ratnodakena gaṃdhena tathā puṣpodakena ca

paṃcopacārairārādhya yathāvibhavavistaraiḥ /
ghaṃ ghaṃṭāyai nama iti ghaṃṭāvādyaṃ pradāpayet

patitasya mahādhvānanyastapātakasaṃcaye /
pāhi māṃ pāpinaṃ ghorasaṃsārārṇavapātinam

ya evaṃ kurute vidvānbrāhmaṇaḥ śrotriyaḥ śuciḥ /
sarvapāpaiḥ pramucyeta viṣṇulokaṃ sa gacchati

āṣāḍhaśuklaikādaśyāṃ kuryātsvāpamahotsavam /
āṣāḍhe ca rathaṃ kuryācchrāvaṇe śravaṇāvidhim

bhādre ca janmadivasa upavāsaparo bhavet /
prasuptasya parīvartamāśvine māsi kārayet

utthānaṃ śrīhareḥ kuryādanyathā viṣṇudrohakṛt /
śubhe caivāśvine māsi mahāmāyāṃ ca pūjayet

sauvarṇīṃ rājatīṃ vāpi viṣṇurūpāṃ baliṃ vinā /
hiṃsādveṣau na kartavyau dharmātmā viṣṇupūjakaḥ

kārtike puṣyamāse ca kāmataḥ puṇyamācaret /
dāmodarāya dīpaṃ ca prāṃśusthāne pradāpayet

saptavartipramāṇena dīpaḥ syāccaturaṃgulaḥ /
pakṣāṃte ca prakartavyā dīpamālāvali śubhā

mārgaśīrṣe site pakṣe ṣaṣṭhyāṃ ca sitavastrakaiḥ /
pūjayejjagadīśaṃ ca brahmāṇaṃ ca viśeṣataḥ

pauṣe puṣpābhiṣekaṃ ca varjayeccaṃdanaṃ ślatham /
saṃkrāṃtyāṃ māghamāse ca sādhivāsita taṃḍulāt

naivedyaṃ viṣṇave dadyādimaṃ maṃtramudīrayet /
brāhmaṇānbhojayedbhaktyā devadevapuraḥ sthitān

abhyarcya bhagavadbhaktāndvijāṃśca bhagavaddhiyā /
ekasminbhojite bhakte koṭirbhavati bhojitā

viprabhojanamātreṇa vyaṃgaṃ sāṃgaṃ dhruvaṃ bhavet /
paṃcamyāṃ śuklapakṣe tu snāpayitvā ca keśavam

pūjayitvā vidhānena cūtapallavasaṃyutaiḥ /
phalacūrṇaiśca vividhairvāsitaiḥ paṭasādhitaiḥ

kānanaṃ ramaṇīyaṃ ca pradīptaṃ dīpadīpitam /
drākṣekṣu raṃbhā jaṃbīra nāgaraṃgaṃ ca pūgakam

nālikeraṃ ca dhātrīṃ ca panasaṃ ca harītakīm /
anyaiśca vṛkṣakhaṃḍaiśca sarvartukusumānvitaiḥ

anyaiśca vividhaiścaiva phalapuṣpasamanvitaiḥ /
vitānaiḥ kusumoddāmairvāripūrṇaghaṭaistathā

cūtaśākhopaśākhābhiḥ śobhitaṃ chatracāmaraiḥ /
jayakṛṣṇeti saṃsmṛtya pradakṣiṇapurassaram

viśeṣataḥ kaliyuge dolotsavo vidhīyate /
phālgune ca caturdaśyāmaṣṭame yāmasaṃjñake

athavā paurṇamāsyāṃ tu pratipatsaṃdhisaṃjñake /
pūjayedvidhivadbhaktyā phalgucūrṇaiścaturvidhaiḥ

sitaraktairgaurapītaiḥ karpūrādi vimiśritaiḥ /
haridrārāgayogācca raṃgarūpairmanoharaiḥ

anyairvā raṃgarūpaiśca prīṇayetparameśvaram /
ekādaśyāṃ samārabhya paṃcamyāṃ taṃ samāpayet

paṃcāhāni tryahāni vā dolotsavo vidhīyate /
dakṣiṇābhimukhaṃ kṛṣṇaṃ dolamānaṃ sakṛnnarāḥ

dṛṣṭvāparādhanicayairmuktāste nātra saṃśayaḥ /
nikṣipya jalapātre ca māsi mādhavasaṃjñake

sauvarṇapātre raupye vā tāmre vāpyatha mṛṇmaye /
toyasthaṃ yo'rcayeddevaṃ śālagrāmasamudbhavam

pratimāṃ vā mahābhāge tasya puṇyaṃ na gaṇyate /
damanāropaṇaṃ kṛtvā śrīviṣṇau ca samarpayet

vaiśākhe śrāvaṇe bhādre kartavyaṃ vā tadarpaṇam /
pūrvepūrve tu vātasthe damanādiṣu karmasu

prakartavyaṃ vidhānena anyathā niṣphalaṃ bhavet /
vaiśākhe ca tṛtīyāyāṃ jalamadhye viśeṣataḥ

athavā maṃḍale kuryānmaṃḍape vā bṛhadvane /
sugaṃdhacaṃdanenāṃgaṃ supuṣṭaṃ ca dinedine

yathāprayatnataḥ kuryātkṛśāṃgasyeva puṣṭidam /
caṃdanāguru hrībera kṛṣṇakuṃkuma rocanā

jaṭāmāṃsī murā caiva viṣṇorgaṃdhāṣṭakaṃ viduḥ /
taistairgaṃdhayutaiścāpi viṣṇoraṃgāni lepayet

dhṛṣṭaṃ ca tulasīkāṣṭhaṃ karpūrāguruyogataḥ /
athavā kesarairyojyaṃ haricaṃdanamucyate

yātrākāle ca ye kṛṣṇaṃ bhaktyā paśyaṃti mānavāḥ /
na teṣāṃ punarāvṛttiḥ kalpakoṭiśatairapi

sugaṃdhamiśritaistoyairdevadevaṃ galaṃti ye /
athavā puṣpamadhye tu sthāpayejjagadīśvaram

vṛṃdāvanaṃ tatra gatvā upaskṛtya phalāni ca /
viṣṇubhaktena yogyena bhojayettadaśeṣataḥ

nārikelaphalaṃ bījakośaṃ coddhṛtya dāpayet /
ghoṃṭāphalaṃ ca panasaṃ kośamuddhṛtya dāpayet

dadhnā vimiśritaṃ cānnaṃ ghṛtenāplutya dāpayet /
pācitaṃ piṣṭakaṃ pūpamaṣṭādaśaghṛtena ca

tailaiśca tilasaṃmiśraiḥ phalaṃ pakvaṃ pradāpayet /
yadyadevātmanaḥ prītaṃ tattadīśāya dāpayet

datvā naivedyavastrādi nādadīta kathaṃcana /
tyaktaṃ ca viṣṇumuddiśya tadbhaktebhyo viśeṣataḥ

iti te kathitaṃ kiṃcitsamāsena maheśvari /
gopanīyaṃ prayatnena svayoniriva pārvati

śrīkṛṣṇarūpaguṇavarṇana śāstravargabodhādhikāra iha cedalamanyapāṭhaiḥ /
tatpremabhāvarasabhaktivilāsa nāmahāreṣu cetkhalu manaḥ kimu kāminībhiḥ

taccetasā prabhajatāṃ vrajabālakeṃdraṃ vṛṃdāvanakṣititalaṃ yamunājalaṃ ca /
tallokanāthapadapaṃkajadhūlimiśraliptaṃ vapuḥ kila vṛthāgarucaṃdanādyaiḥ

iti śrīpadmapurāṇe pātālakhaṃḍe umāmaheśvarasaṃvāde vṛṃdāvanamāhātmye aśītitamo'dhyāyaḥ