Scripture Library

Padma Purana · Chapter 5.78

5.78.1

pārvatyuvāca-
vaiṣṇavānāṃ ca yaddharmaṃ sarvaṃ tathyaṃ ca me vada /
yatkṛtvā mānavāḥ sarve bhavāṃbhodhiṃ taraṃti hi

5.78.2

īśvara uvāca-
atha dvādaśadhā śuddhirvaiṣṇavānāmihocyate /
gṛhopalepanaṃ caiva tathānugamanaṃ hareḥ

5.78.3

bhaktyā pradakṣiṇā caiva pādayoḥ śodhanaṃ punaḥ /
pūjārthaṃ patrapuṣpāṇāṃ bhaktyaivottolanaṃ hareḥ

5.78.4

karayoḥ sarvaśuddhīnāmiyaṃ śuddhirviśiṣyate /
tannāmakīrtanaṃ caiva guṇānāmapi kīrttanam

5.78.5

bhaktyā śrīkṛṣṇadevasya vacasaḥ śuddhiriṣyate /
tatkathāśravaṇaṃ caiva tasyotsavanirīkṣaṇam

5.78.6

śrotrayornetrayoścaiva śuddhiḥ samyagihocyate /
pādodakaṃ ca nirmālyaṃ mālānāmapi dhāraṇam

5.78.7

ucyate śirasaḥ śuddhiḥ praṇatasya hareḥ puraḥ /
āghrāṇaṃ tasya puṣpādernirmālyasya tathā priye

5.78.8

viśuddhiḥ syādaṃtarasya ghrāṇasyāpi vidhīyate /
yatra puṣpādikaṃ yacca kṛṣṇapādayugārpitam

5.78.9

tadekaṃ pāvanaṃ loke taddhi sarvaṃ viśodhayet /
pūjā ca paṃcadhā proktā tāsāṃ bhedaṃ śṛṇuṣva me

5.78.10

abhigamanamupādānaṃ yogaḥ svādhyāya eva ca /
ijyā paṃcaprakārārcā krameṇa kathayāmi te

5.78.11

tatvābhigamanaṃ nāma devatāsthānamārjanam /
upalepaṃ ca nirmālyadūrīkaraṇameva ca

5.78.12

upādānaṃ nāma gaṃdha puṣpādicayanaṃ tathā /
yogo nāma svadevasya svātmanaivātmabhāvanā

5.78.13

svādhyāyo nāma maṃtrārthānusaṃdhāpūrvako japaḥ /
sūktastotrādipāṭhaśca hareḥ saṃkīrttanaṃ tathā

5.78.14

tattvādiśāstrābhyāsaśca svādhyāyaḥ parikīrtitaḥ /
ijyā nāma svadevasya pūjanaṃ ca yathārthataḥ

5.78.15

iti paṃcaprakārārcā kathitā tava suvrate /
sārṣṭi sāmīpya sālokya sāyujya sārūpyadā kramāt

5.78.16

prasaṃgātkathayiṣyāmi śālagrāmaśilārcanam /
keśavādeścaturbāhordakṣiṇordhvakarakramāt

5.78.17

śaṃkhacakragadāpadmī keśavākhyo gadādharaḥ /
nārāyaṇaḥ padmagadācakraśaṃkhāyudhaiḥ kramāt

5.78.18

mādhavaścakraśaṃkhābhyāṃ padmena gadayā bhavet /
gadābjaśaṃkhacakrī ca goviṃdākhyo gadādharaḥ

5.78.19

padmaśaṃkhāri gadine viṣṇurūpāya te namaḥ /
saśaṃkhābja gadācakra madhusūdana mūrtaye

5.78.20

namo gadāriśaṃkhābjayuktatrivikramāya ca /
sārikaumodakī padmaśaṃkha vāmana mūrttaye

5.78.21

cakrābjaśaṃkhagadine namaḥ śrīdharamūrttaye /
hṛṣīkeśasārigadāśaṃkhapadminnamostu te

5.78.22

sābjaśaṃkhagadācakrapadmanābha svamūrttaye /
dāmodaraśaṃkhagadācakrapadminnamostu te

5.78.23

śaṃkhābjacakragadine namaḥ saṃkarṣaṇāya ca /
sāriśaṃkhagadābjāya vāsudeva namostute

5.78.24

śaṃkhacakragadābjāya dhṛta pradyumnamūrttaye /
namo'niruddhāya gadāśaṃkhābjārividhāriṇe

5.78.25

sābjaśaṃkhagadācakrapuruṣottamamūrttaye /
namo'dhokṣajarūpāya gadāśaṃkhāri padmine

5.78.26

nṛsiṃhamūrttaye padmagadāśaṃkhāridhāriṇe /
padmāriśaṃkhagadine namostvacyutamūrttaye

5.78.27

sagadābjāriśaṃkhāya namaḥ śrīkṛṣṇamūrttaye /
śālagrāmaśilādvāragatalagnadvicakradhṛk

5.78.28

śuklābharekhaḥ śobhāḍhyaḥ sadevaḥ śrīgadādharaḥ /
lagnadvicakro raktābhaḥ pūrvabhāgastu puṣkalaḥ

5.78.29

saṃkarṣaṇo'tha pradyumnaḥ sūkṣmacakrastu pītakaḥ /
sudīrghasuṣiracchidro hyaniruddhastu varttulaḥ

5.78.30

nīlo dvāre trirekhaśca atha nārāyaṇo'sitaḥ /
madhye gadākṛtī rekhā nābhipadmaṃ mahonnatam

5.78.31

pṛthucakro nṛsiṃho yaḥ kapilo yastribiṃdukaḥ /
athavā paṃcabiṃdostu pūjanaṃ brahmacāriṇaḥ

5.78.32

varāhaḥ sa triliṃgo yo viṣamadvayacakrakaḥ /
nīlastrirekhaḥ sthūlo'tha kūrmamūrtiḥ sabiṃdukaḥ

5.78.33

kṛṣṇaḥ savartulāvartta pāṃḍuro dhṛtapṛṣṭhakaḥ /
śrīdharaḥ paṃcarekhaśca vanamālī gadāṃkitaḥ

5.78.34

vāmano vartulo nāma madhyacakraḥ sanīlakaḥ /
nānāvarṇānekamūrti nāgabhogī tvanaṃtakaḥ

5.78.35

sthūlo dāmodaro nīlo madhye cakraḥ sanīlakaḥ /
saṃkarṣaṇadvārakovyādatha brahmā sulohitaḥ

5.78.36

sudīrgharekhāsuṣira ekacakrāṃbujaḥ pṛthuḥ /
pṛthucakraḥ sthūlachidraḥ kṛṣṇo biṃduśca biṃdumān

5.78.37

hyagrīvoṃ'kuśākāraḥ paṃcarekhaḥ sakaustubhaḥ /
vaikuṃṭho mallavadbhāti ekacakramayositaḥ

5.78.38

matsyo dīrghāṃbujākāro dīrgharekhaśca pāṃḍuraḥ /
rāmacakro dakṣarekho yaḥ śyāmaḥ sa trivikramaḥ

5.78.39

śālagrāmadvārakāyāṃ sthitāya gadine namaḥ /
ekena lakṣito yovyādgadādhārī sudarśanaḥ

5.78.40

lakṣmīnārāyaṇo dvābhyāṃ tribhiścaiva trivikramaḥ /
caturbhiśca caturvyūho vāsudevaśca paṃcabhiḥ

5.78.41

pradyumnaḥ ṣaḍbhirevāvyātsaṃkarṣaṇaśca saptabhiḥ /
puruṣottamo'ṣṭabhiśca syānnavavyūho navo hitaḥ

5.78.42

daśāvatāro daśabhiraniruddho'vatādatha /
dvādaśātmā dvādaśabhirataūrddhvamanaṃtakaḥ

5.78.43

brahmā caturmukho daṃḍī kamaṃḍalusragunnataḥ /
maheśvaraḥ paṃcavaktro daśabāhurvṛṣadhvajaḥ

5.78.44

yathāyudhastathāgaurī caṃḍikā ca sarasvatī /
mahālakṣmīrmātaraśca padmahasto divākaraḥ

5.78.45

gajāsyaśca gajaskaṃdhaḥ ṣaṇmukhonekadhā gaṇāḥ /
ete sthitāḥ sthāpitā syuḥ prasādevātha pūjitāḥ

5.78.46

dharmārthakāmamokṣā hi prāpyaṃte puruṣeṇa ca

5.78.78

iti śrīpadmapurāṇe pātālakhaṃḍe śālagrāmanirṇayonāmāṣṭasaptatitamo'dhyāyaḥ

Original text: padmapurāṇam · Sanskrit Wikisource contributors · Sanskrit Wikisource · CC BY-SA 4.0