Padma Purana · Chapter 5.102

yama uvāca-
tatastu karuṇāvārdhisteṣāṃ śokena pīḍitaḥ /
bhūpatiḥ śrīharerdūtānvinayenāha vāḍava

aiśvaryasyābhijātyasya guṇānāṃ sukṛtasya ca /
saṃtaḥ phalaṃ hi gaṇyaṃte yadbhītaparirakṣaṇam

yadyasti sukṛtaṃ kiṃcinmama tenaiva jaṃtavaḥ /
svarge gacchaṃtu muktaughāḥ sthāne teṣāṃ vasāmyaham

evaṃ bhūpavacaḥ śrutvā tasya satyavato hi te /
dhyāyaṃtaḥ satyamaudāryamabruvaṃste vaco nṛpam

dūtā ūcu-
anena tava kāruṇyakarmaṇā vacasā nṛpa /
babhūva vṛddhirdharmasya saṃcitasya viśeṣataḥ

snānaṃ dānaṃ japo homastapo devārcanādikam /
kṛtaṃ yanmādhave māsi tadanaṃtaphalaṃ viduḥ

svarge yajvā ca dātā ca krīḍate tridaśaiḥ saha /
vāpīṣu hemapadmāsu kalpavṛkṣatale'pi ca

gīyamāno mudaṃ yāti gīrvāṇaramaṇīgaṇaiḥ /
jalānnadānato lokaṃ labhate vāruṇaṃ śubham

kulāni helayā sapta saṃtārayati gopradaḥ /
hayaṃ datvā raverlokaṃ yāti vidyāprado naraḥ

brahmalokaṃ tathā hemadānādyāti surālaye /
yo dadāti tathā kanyāṃ viṣṇulokaṃ sa gacchati

mādhavemāsi yaḥ snātvā datvā saṃpūjya mādhavam /
avāpya sakalānkāmānprayāti padamavyayam

ekato'pi tapo dāna kratu sutyādikāḥ kriyāḥ /
ekato vidhivanmāso mādhavaścarito mahān

tasya mādhavamāsasya dinaikasyāpi bhūpate /
kṛtaṃ yatsukṛtaṃ tatte sarvadānādhikaṃ purā

kāruṇyena dinaikasya puṇyaṃ dehi dharāpate /
niraye pacyamānebhyo duḥkhitebhyo dayānidhe

na dayāsadṛśo dharmo na dayāsadṛśaṃ tapaḥ /
na dayāsadṛśaṃ dānaṃ na dayāsadṛśaḥ sakhā

puṇyadaḥ puṇyamāpnoti naro lakṣaguṇaṃ sadā /
kāruṇyena viśeṣātte dharmavṛddhistato bhavet

duḥkhitānāṃ hi bhūtānāṃ duḥkhoddharttā naro hi yaḥ /
sa eva sukṛtī loke jñeyo nārāyaṇāṃśajaḥ

vaiśākhe māsi pūrṇāyāṃ snānadānādikaṃ tvayā /
yattīrthe vihitaṃ vīra sarvāghaviniṣūdanam

tadebhyo dehi vidhivatkṛtvā sākṣye hariṃ prabhum /
trivācikaṃ ca nirayādyenāmī svargamāpnuyuḥ

kapotārthaṃ svamāṃsāni kāruṇyena purā śibiḥ /
datvā dayānidhiḥ svarge rājate kīrtivāridhiḥ

dadhīcirapi rājarṣirdatvāsthi ca yamātmanaḥ /
trailokyakaumudīṃ kīrtiṃ labdhavānsvargamakṣayam

sahasrajicca rājarṣiḥ prāṇāniṣṭānmahāyaśāḥ /
brāhmaṇārthe parityajya gato lokānanuttamān

na svarge nāpavarge'pi tatsukhaṃ labhate naraḥ /
yadārtajaṃtunirvvāṇadānotthamiti no matiḥ

sarveṣu dātṛjāteṣu purā jātosi bhūpate /
karmaṇānena saṃkhyāsu dhīra dhairyaṃ niyojya ca

dṛṣṭvā tavadhiyaṃ dharma dayā dānaṃ suniścalam /
asmābhirapi tūtsāhaḥ kriyate dharmmavādibhiḥ

yadi te rocate rājanna vilaṃbatayā tataḥ /
tadebhyo dehi tatpuṇyaṃ yātanāduḥkhadāhakam

ityuktaḥ sa tadā devaṃ kṛtvā sākṣye gadādharam /
tebhyastrivācikaṃ puṇyaṃ dayāvānvidhinā dadau

datte mādhavamāsasya tasminnekadinodbhave /
svakṛte jaṃtavo yāmyayātanāparivarjitāḥ

vimānavaramārūḍhāḥ sarve te tridivaṃ yayuḥ /
praṇamaṃtaḥ stuvaṃtaśca paśyaṃtastaṃ praharṣitāḥ

nṛpeṇa dattaṃ tadavāpya puṇyaṃ vaiśākhamāsaikadinābhijātam /
sarve yayuste narakādvimuktā divaṃ vimānādhigatā hi citram

nūnaṃ vicitro bhuvi bhūtavargaḥ saṃbhūtabhāvo bahudhā vicitraḥ /
tathā vicitro'khilakarmayogastatkarmaśaktipracayo vicitraḥ

saṃstūyamāno munidevasaṃghairyastadviśeṣādhikalabdhapuṇyaḥ /
paraṃ padaṃ yogivarairalabhyaṃ yayau jagannāthagaṇābhivaṃdyaḥ

iti śrīpadmapurāṇe pātālakhaṃḍe vaiśākhamāsamāhātmye /
dvyuttaraśatatamo'dhyāyaḥ