Padma Purana · Chapter 3.46

yudhiṣṭhira uvāca-
śrutaṃ me brahmaṇā proktaṃ purāṇe puṇyasammitam /
tīrthānāṃ tu sahasrāṇi śatāni niyutāni ca

sarve puṇyāḥ pavitrāśca gatiśca paramā smṛtā /
pṛthivyāṃ naimiṣaṃ puṇyamaṃtarikṣe ca puṣkaram

prayāgamapi lokānāṃ kurukṣetraṃ viśiṣyate /
sarvāṇi saṃparityajya kathamekaṃ praśaṃsasi

apramāṇamidaṃ proktamaśraddheyamanuttamam /
gatiṃ ca paramāṃ divyāṃ bhogāṃścaiva yathepsitān

kimarthamalpayogena bahudharmaṃ praśaṃsasi /
etaṃ me saṃśayaṃ brūhi yathādṛṣṭaṃ yathāśrutam

mārkaṃḍeya uvāca-
aśraddheyaṃ na vaktavyaṃ pratyakṣamapi tadbhavet /
narasya śraddadhānasya pāpopahatacetasaḥ

aśraddadhāno hyaśucirdurmatistyaktamaṃgalaḥ /
ete pātakinaḥ sarve tenedaṃ bhāṣitaṃ mayā

śṛṇu prayāgamāhātmyaṃ yathādṛṣṭaṃ yathāśrutam /
pratyakṣaṃ ca parokṣaṃ ca yathānyatsaṃbhaviṣyati

yathaivānyanmayā dṛṣṭaṃ purā rājanyathāśrutam /
śāstraṃ pramāṇaṃ kṛtvā tu pūjyate yogamātmanaḥ

kliśyate cāparastatra naiva yogamavāpnuyāt /
janmāṃtarasahasrebhyo yogo labhyeta mānavaiḥ

yathāyogasahasreṇa yogo labhyeta mānavaiḥ /
yastu sarvāṇi ratnāni brāhmaṇebhyaḥ prayacchati

tena dānena dattena yogo labhyeta mānavaiḥ /
prayāge tu mṛtasyedaṃ sarvaṃ bhavati nānyathā

pradhānahetuṃ vakṣyāmi śraddadhatsu ca bhārata /
yathā sarveṣu bhūteṣu sarvatraiva tu dṛśyate

brahma naivāsti vai kiṃcidyadvaktuṃ tvidamucyate /
yathā sarveṣu bhūteṣu brahma sarvatra pūjyate

evaṃ sarveṣu lokeṣu prayāgaḥ pūjyate budhaiḥ /
pūjyate tīrtharājasya satyametadyudhiṣṭhira

brahmāpi smarate nityaṃ prayāgaṃ tīrthamuttamam /
tīrtharājamanuprāpya naivānyatkiṃcidicchati

ko hi devatvamāsādya mānuṣatvaṃ cikīrṣati /
anenaivānumānena tvaṃ jñāsyasi yudhiṣṭhira

yathā puṇyamapuṇyaṃ vā tathaiva kathitaṃ mayā /
yudhiṣṭhira uvāca-
śrutaṃ tadyattvayā proktaṃ vismito'haṃ punaḥ punaḥ

kathaṃ yogena tatprāptiḥ svargalokastu karmaṇā /
tadā ca labhate bhogāngāṃ ca tatkarmaṇāṃ phalam

tāni karmāṇi pṛcchāmi punaryaiḥ prāpyate mahīm /
mārkaṃḍeya uvāca-
śṛṇurājanmahābāho yathoktakarmmaṇā mahī

gāmagniṃ brāhmaṇaṃ śāstraṃ kāṃcanaṃ salilaṃ striyaḥ /
mātaraṃ pitaraṃ caiva yo niṃdati narādhipa

naiteṣāmūrdhvagamanamevamāha prajāpatiḥ /
evaṃ yogasya saṃprāptiḥ sthānaṃ paramadurlabham

gacchaṃti narakaṃ ghoraṃ ye narāḥ pāpakāriṇaḥ /
hastyaśvaṃ gāmanaḍvāhaṃ maṇimuktādi kāṃcanam

parokṣaṃ harate yastu paścāddānaṃ prayacchati /
na te gacchaṃti vai svargaṃ dātāro yatra bhoginaḥ

anena karmmaṇā yuktāḥ pacyaṃte narake'dhamāḥ /
evaṃ yogaṃ ca dharmmaṃ ca dātāraṃ ca yudhiṣṭhira

yathā satyamasatyaṃ vā asti nāstīti yatphalam /
niruktaṃ tu pravakṣyāmi yathāyaṃ svayamāpnuyāt

iti śrīpādme mahāpurāṇe svargakhaṃḍe prayāgamāhātmye ṣaṭcatvāriṃśo'dhyāyaḥ