Padma Purana · Chapter 3.15

nārada uvāca-
yanmāṃ pṛcchasi kauṃteya tannibodha ca tacchṛṇu /
etasminnaṃtare rudro narmadātaṭamāsthitaḥ

nāmnā hareśvaraṃ sthānaṃ triṣu lokeṣu viśrutam /
tasminsthāne mahādevaściṃtayaṃstraipuraṃ vadham

gāṃ(gā?)ḍīvaṃ maṃdaraṃ kṛtvā guṇaṃ kṛtvā tu vāsukim /
sthānaṃ kṛtvā tu vaiśākhaṃ viṣṇuṃ kṛtvā śarottamam

agre cāgniṃ pratiṣṭhāpya mukhe vāyuḥ samarpitaḥ /
hayāśca caturo vedāḥ sarvadevamayaṃ ratham

cakragau cāśvinau devāvakṣaṃ cakradharaḥ svayam /
svayamiṃdraśca cāpāṃte bāṇe vaiśravaṇaḥ sthitaḥ

yamastu dakṣiṇe haste vāme kālastu dāruṇaḥ /
cakrāṇāmārake nyastā gaṃdharvā lokaviśrutāḥ

prajāpatī rathaśreṣṭhe brahmā caiva tu sārathiḥ /
evaṃ kṛtvā tu deveśaḥ sarvadevamayaṃ ratham

sotiṣṭhatsthāṇubhūto hi sahasraṃ parivatsarān /
yadā trīṇi sametāni aṃtarikṣacarāṇi ca

tripurāṇi triśalyena tadā tāni bibheda saḥ /
śaraḥ pracoditastatra rudreṇa tripuraṃ prati

bhraṣṭatejā striyo jātā balaṃ teṣāṃ vyaśīryata /
utpātāśca pure tasminprādurbhūtā sahasraśaḥ

tripurasya vināśāya kālarūpobhavattadā /
aṭṭahāsaṃ pramuṃcaṃti rūpāḥ kāṣṭhamayāstathā

nimeṣonmeṣaṇaṃ caiva kurvaṃti citrakarmaṇā /
svapne paśyaṃti cātmānaṃ raktāṃbaravibhūṣitam

svapne paśyaṃti te caivaṃ viparītāni yāni tu /
etānpaśyati utpātāṃstatra sthāne tu ye janāḥ

teṣāṃ balaṃ ca buddhiśca harakrodhena nāśitam /
saṃvartako nāma vāyuryugāṃtapratimo mahān

samīritonalaśreṣṭha uttamāṃgeṣu bādhate /
jvalaṃti pādapāstatra pataṃti śikharāṇi ca

sarvaṃ tadvyākulībhūtaṃ hāhākāramacetanam /
bhagnodyānāni sarvāṇi kṣipraṃ tu prajvalaṃti ca

tenaiva dīpitaṃ sarvaṃ jvalate viśikhaiḥ śikhaiḥ /
drumā ārāmagaṃḍāni gṛhāṇi vividhāni ca

daśadikṣu pravṛttoyaṃ samiddho havyavāhanaḥ /
tataḥ śilāḥ pramuṃcaṃti diśo daśa vibhāgaśaḥ

śikhāsahasrairatyugraiḥ prajvalaṃti hutāśanaiḥ /
sarvaṃ kiṃśukasaṃprakhyaṃ jvalitaṃdṛśyate puram

gṛhādgṛhāṃtare naiva gaṃtuṃ dhūmaiśca śakyate /
harakopānalādagdhaṃ kraṃdamānaṃ suduḥkhitam

pradīptaṃ sarvato dikṣu dahyate tripuraṃ puram /
prāsādaśikharāgrāṇi viśīryaṃti sahasraśaḥ

nānāratnavicitrāṇi vimānānyapyanekadhā /
gṛhāṇi caiva ramyāṇi dahyaṃte dīptivahninā

bādhaṃte drumakhaṃḍeṣu janasthāne tathaiva ca /
devāgāreṣu sarveṣu prajvalaṃte jvalaṃtyapi

sīdaṃti cānalaspṛṣṭāḥ kraṃdaṃti vividhai svaraiḥ /
girikūṭanibhāstatra dṛśyaṃteṃ'gārarāśayaḥ

stuvaṃti devadeveśaṃ paritrāyasva māṃ prabho /
anyonyaṃ ca pariṣvajya hutāśanaprapīḍitāḥ

dahyaṃte dānavāstatra śataśotha sahasraśaḥ /
haṃsakāraṃḍavākīrṇā nalinī saha paṃkajā

dahyaṃtenaladagdhāni purodyānāni dīrghikāḥ /
amlānaiḥ paṃkajaiśchannā vistīrṇā yojanaiḥ śataiḥ

girikūṭanibhāstatra prāsādāratnabhūṣitāḥ /
pataṃtyanalanirdagdhā nistoyā jaladā iva

saha strībālavṛddheṣu goṣu pakṣiṣu vājiṣu /
nirdayo dahate vahnirharakopena preritaḥ

sapatnīkāścaiva suptāḥ saṃsuptā bahavo janāḥ /
putramāliṃgyate gāḍhaṃ dahyaṃte tripurāriṇā

atha tasminpure dīpte striyaścāpsarasopamāḥ /
agnijvālāhatāstatra pataṃti dharaṇītale

kācidbālā viśālākṣī muktāvali vibhūṣitā /
dhūmenākulitā sā tu pratibuddhā śikhārdditā

sutaṃ saṃciṃtyamānā sā patitā dharaṇītale /
kācitsuvarṇavarṇābhā nīlaratnairvibhūṣitā

dhūmenākulitā sā tu patitā dharaṇītale /
anyā gṛhītahastā tu sakhī dahati bālakaiḥ

anena divyarūpānyādṛṣṭā madavimohitā /
śirasā prāṃjaliṃ kṛtvā vijñāpayati pāvakam

yadi tvamicchase vairaṃ puruṣeṣvapakāriṣu /
striyaḥ kimaparādhyaṃte gṛhapaṃjarakokilāḥ

pāpanirdaya nirllajja kaste kopaḥ striyopari /
na dākṣiṇyaṃ na te lajjā na satyaṃ śaucavarjitaḥ

anekarūpavarṇāḍhyā upalabhyā vadasva ha /
kiṃ tvayā na śrutaṃ loke avadhyāḥ sarvayoṣitaḥ

kiṃ tu tubhyaṃ guṇā hyete dahanastryardanaṃ prati /
na kāruṇyaṃ dayā vāpi dākṣiṇyaṃ vā striyopari

dayāṃ kurvaṃti mlecchāpi dahanaṃ prekṣya yoṣitaḥ /
mlecchānāmapi kaṣṭosi durnivāryo hyacetanaḥ

ete caiva guṇāstubhyaṃ dahanotsādanaṃ prati /
āsāmapi durācāra strīṇāṃ kiṃ vinipātase

duṣṭa nirghṛṇa nirlajja hutāśa maṃdabhāgyaka /
nirāśastvaṃ durācāra bālāndahasi nirdaya

evaṃ pralapamānāstā jalpamānā bahusvaram /
anyāḥ krośaṃti saṃkruddhā bālaśokena mohitāḥ

dahate nirdayo vahniḥ saṃkruddhaḥ sarvaśatruvat /
puṣkariṇyāṃ jale jvālā kūpeṣvapi tathaiva ca

asmānsaṃdahya mleccha tvaṃ kāṃ gatiṃ prāpayiṣyasi /
evaṃ pralapatāṃ tāsāṃ vahnirvacanamabravīt

vaiśvānara uvāca-/
svavaśo naiva yuṣmākaṃ vināśaṃ tu karomyaham /
ahamādeśakartā vai nāhaṃ karttāsmyanugraham

atra krodhasamāviṣṭo vicarāmi yadṛcchayā /
tato bāṇo mahātejāstripuraṃ vīkṣya dīpitam

āsanastho'bravīdevamahaṃ devairvināśitaḥ /
alpasārairdurācārairīśvarasya niveditaḥ

aparīkṣya hyahaṃ dagdhaḥ śaṃkareṇa mahātmanā /
nānyaḥ śatrustu māṃ haṃtuṃ varjjayitvā maheśvaram

utthitaḥ śirasā kṛtvā ligaṃ tribhuvaneśvaram /
nirgataḥ sa puradvārātparityajya suhṛtsvayam

ratnāni suvicitrāṇi striyo nānāvidhāstathā /
gṛhītvā śirasā liṃgaṃ nyastaṃ nagaramaṃḍale

stuvate devadeveśaṃ trailokyādhipatiṃ śivam /
hara tvayāhaṃ nirdagdho yadi vadhyosi śaṃkara

tvatprasādānmahādeva mā me liṃgaṃ vinaśyatu /
arcitaṃ hi mahādeva bhaktyā paramayā sadā

tvayā yadyapi vadhyohaṃ mā me liṃgaṃ vinaśyatu /
prāpyametanmahādeva tvatpādagrahaṇaṃ mama

janmajanma mahādeva tvatpādanirato hyaham /
toṭakacchaṃdasā devaṃ stutvā tu parameśvaram

ॐśivaśaṃkarasarvakarāya namo bhavabhīmamaheśaśivāya namaḥ /
kusumāyudha dehavināśakara tripurāṃtakarāṃdhaka cūrṇakara

pramadāpriyakāmavibhakta namo hi namaḥ surasiddhagaṇairnamitaḥ /
hayavānarasiṃhagajeṃdramukhairati hrasvasudīrghamukhaiśca gaṇaiḥ

upalabdhumaśakyatarairasurairvyathito na śarīraśatairbahubhiḥ /
praṇato bhagavanbahubhaktimatā calacaṃdra kalādhara deva namaḥ

sahaputrakalatrakalāpadhanaiḥ satataṃ jaya dehi anusmaraṇam /
vyathitosmi śarīraśatairbahubhirgamitādya mahānarakasya gatiḥ

na nivartati yanmamapāpagatiḥ śucikarmmaviśuddhamapi tyajati /
anukaṃpati digbhramati bhramati bhrama eṣa kubuddhi nivārayati

yaḥ paṭhettoṭakaṃ divyaṃ prayataḥ śucimānasaḥ /
bāṇasyaiva yathārudrastasyaiva varado bhavet

imaṃ stavaṃ mahādivyaṃ śrutvā devo maheśvaraḥ /
prasannastu tadā tasya svayaṃ devo maheśvaraḥ

īśvara uvāca-/
na bhetavyaṃ tvayā vatsa sauvarṇe tiṣṭha dānava /
putrapautrasapatnīnāṃ bhāryābhṛtyajanaiḥ saha

adyaprabhṛti bāṇa tvamavadhyastridaśairapi /
bhūyastasya varo datto devadevena pāṃḍava

akṣayaścāvyayo loke vicacāra ha nirbhayaḥ /
tato nivārayāmāsa rudra saptaśikhaṃ tathā

tṛtīyaṃ rakṣitaṃ tasya śaṃkareṇa mahātmanā /
bhramate gagane nityaṃ rudratejaḥ prabhāvataḥ

evaṃ tu tripuraṃ dagdhaṃ śaṃkareṇa mahātmanā /
jvālāmālāpradīptaṃ tu patitaṃ dharaṇītale

ekaṃ nipātitaṃ tasya śrīśaile tripurāṃtake /
dvitīyaṃ pātitaṃ tatra parvate'marakaṃṭake

dagdhe tu tripure rājanrudrakoṭiḥ pratiṣṭhitā /
jvalaṃtaṃ pātitaṃ tatra tena jvāleśvaraḥ smṛtaḥ

ūrdhvena prasthitā tasya divyā jvālā divaṃ gatā /
hāhākārastadā jāto sadevāsurakiṃnarān

taṃ śaraṃ staṃbhayedrudro māheśvarapurottame /
evaṃ vrajeta yastasminparvate'marakaṃṭake

caturddaśabhuvanāni subhuktvā pāṃḍunaṃdana /
varṣakoṭisahasraṃ tu triṃśatkoṭyastathā parāḥ

tato mahītalaṃ prāpya rājā bhavati dhārmikaḥ /
pṛthivyāmekacchatreṇa bhuṃkte nāstyatra saṃśayaḥ

eṣa puṇyo mahārāja sarvato'marakaṃṭakaḥ /
caṃdra sūryoparāgeṣu gacchedyo'marakaṃṭakam

aśvamedhāddaśaguṇaṃ pravadaṃti manīṣiṇaḥ /
svargalokamavāpnoti dṛṣṭvā tatra maheśvaram

saṃnihatyā gamiṣyaṃti rāhugraste divākare /
tadeva nikhilaṃ puṇyaṃ parvate'marakaṃṭake

puṃḍarīkasya yajñasya phalaṃ prāpnoti mānavaḥ /
tatra jvāleśvaro nāma parvate'marakaṃṭake

tatra snātvā divaṃ yāṃti ye mṛtāste'punarbhavāḥ /
jvāleśvare mahārāja yastu prāṇānparityajet

caṃdra sūryoparāge tu bhaktyāpi śṛṇu tatphalam /
amarā nāma devāste parvate'marakaṃṭake

rudralokamavāpnoti yāvadābhūtasaṃplavam /
amareśvarasya devasya parvatasya taṭe jale

koṭiśa ṛṣimukhyāste tapastapyaṃti suvratāḥ /
samaṃtādyojanaṃ rājankṣetraṃ cāmarakaṃṭakam

akāmo vā sakāmo vā narmadāyāṃ śubhe jale /
snātvā mucyeta pāpebhyo rudralokaṃ sa gacchati

iti śrīpādme mahāpurāṇe svargakhaṃḍe paṃcadaśo'dhyāyaḥ