Padma Purana · Chapter 2.37

saptatriṃśo'dhyāyaḥ

ṛṣaya ūcuḥ-
evaṃ venasya caivāsītsṛṣṭireva mahātmanaḥ /
dharmācāraṃ parityajya kathaṃ pāpamatirbhavet

sūta uvāca-
jñānavijñānasaṃpannā munayastattvavedinaḥ /
śubhāśubhaṃ vadaṃtyevaṃ tanna syādiha cānyathā

tapyamānena tenāpi suśaṃkhena mahātmanā /
dattaḥ śāpaḥ kathaṃ viprā na yathāvacca jāyate

venasya pātakācāraṃ sarvameva vadāmyaham /
tasmiñchāsati dharmajñe prajāpāle mahātmani

puruṣaḥ kaścidāyātaśchadma liṃgadharastadā /
nagnarūpo mahākāyaḥ śiromuṃḍo mahāprabhaḥ

mārjanīṃ śikhipatrāṇāṃ kakṣāyāṃ sa hi dhārayan /
gṛhītaṃ pānapātraṃ tu nālikeramayaṃ kare

paṭhamāno hyasacchāstraṃ vedadharmavidūṣakam /
yatra veno mahārājastatrāyātastvarānvitaḥ

sabhāyāṃ tasya venasya praviveśa sa pāpavān /
taṃ dṛṣṭvā samanuprāptaṃ venaḥ praśnaṃ tadākarot

bhavānko hi samāyāta īdṛgrūpadharo mama /
sabhāyāṃ vartamānasya puraḥ kasmātsamāgataḥ

ko veṣaḥ kiṃ nu te nāma ko dharmaḥ karma te vada /
ko vedaste ka ācāraḥ kiṃ tapaḥ kā prabhāvanā

kiṃ jñānaṃ kaḥ prabhāvaste kiṃ satyaṃ dharmalakṣaṇam /
tattvaṃ sarvaṃ samācakṣva mamāgre satyameva ca

śrutvā venasya tadvākyaṃ pāpo vākyamudāharat /
pātaka uvāca-
karoṣyevaṃ vṛthā rājyaṃ mahāmūḍho na saṃśayaḥ

ahaṃ dharmasya sarvasvamahaṃ pūjyatamosuraiḥ /
ahaṃ jñānamahaṃ satyamahaṃ dhātā sanātanaḥ

ahaṃ dharmaṃ ahaṃ mokṣaḥ sarvadevamayo hyaham /
brahmadehātsamudbhūtaḥ satyasaṃdho'smi nānyathā

jinarūpaṃ vijānīhi satyadharmakalevaram /
māmeva hi pradhāvaṃti yogino jñānatatparāḥ

vena uvāca-
tavaiva kīdṛśaṃ karma kiṃ te darśanameva ca /
kimācāro vadasvaihi ityuktaṃ tena bhūbhujā

pātaka uvāca-
arhaṃto devatā yatra nirgraṃtho dṛśyate guruḥ /
dayā caiva paro dharmastatra mokṣaḥ pradṛśyate

darśanesminna saṃdeha ācārānpravadāmyaham /
yajanaṃ yājanaṃ nāsti vedādhyayanameva ca

nāsti saṃdhyā tapo dānaṃ svadhāsvāhāvivarjitam /
havyakavyādikaṃ nāsti naiva yajñādikā kriyā

pitṝṇāṃ tarpaṇaṃ nāsti nātithirvaiśvadevikam /
kṣapaṇasya varā pūjā arhato dhyānamuttamam

ayaṃ dharmasamācāro jainamārge pradṛśyate /
etatte sarvamākhyātaṃ nijadharmasyalakṣaṇam

vena uvāca-
vedaprokto yathā dharmo yatra yajñādikāḥ kriyāḥ /
pitṝṇāṃ tarpaṇaṃ śrāddhaṃ vaiśvadevaṃ na dṛśyate

na dānaṃ tapa evāsti kvāste dharmasya lakṣaṇam /
vada satyaṃ mamāgre tu dayādharmaṃ ca kīdṛśam

pātaka uvāca-
paṃcatattvapravṛddhoyaṃ prāṇināṃ kāya eva ca /
ātmā vāyusvarūpoyaṃ teṣāṃ nāsti prasaṃgatā

yathā jaleṣu bhūtānāmapisaṃgamavehi tat /
jāyate budbudākāraṃ tadvadbhūtasamāgamaḥ

pṛthvībhāvo rajaḥsthastu cāpastatraiva saṃsthitāḥ /
jyotistatra pradṛśyeta suvāyurvartate triṣu

ākāśamāvṛṇotpaścādbudbudatvaṃ prajāyate /
apsumadhye prabhātyeva sutejo vartulaṃ varam

kṣaṇamātraṃ pradṛśyeta kṣaṇānnaiva ca dṛśyate /
tadvadbhūtasamāyogaḥ sarvatra paridṛśyate

aṃtakāle prayātyātmā paṃca paṃcasu yāṃti te /
mohamugdhāstato martyā vartaṃte ca parasparam

śrāddhaṃ kurvaṃti mohena kṣayāhe pitṛtarpaṇam /
kvāste mṛtaḥ samaśnāti kīdṛśo'sau nṛpottama

kiṃ jñānaṃ kīdṛśaṃ kāyaṃ kena dṛṣṭaṃ vadasva naḥ /
miṣṭānnaṃ bhojayitvā ca tṛptā yāṃti ca brāhmaṇāḥ

kasya śrāddhaṃ pradīyeta sā tu śraddhā nirarthikā /
anyadevaṃ pravakṣyāmi vedānāṃ karma dāruṇam

yadātithirgṛhe yāti mahokṣaṃ pacate dvijaḥ /
ajaṃ vā rājarājeṃdra atithiṃ paribhojayet

aśvamedhamakhe aśvaṃ gomedhe vṛṣameva ca /
naramedhe naraṃ rājanvājapeye tathā hyajān

rājasūye mahārāja prāṇināṃ ghātanaṃ bahu /
puṃḍarīke gajaṃ hanyādgajamedhe'tha kuṃjaram

sautrāmaṇyāṃ paśuṃ medhyaṃ meṣameva pradṛśyate /
nānārūpeṣu sarveṣu śrūyatāṃ nṛpanaṃdana

nānājātiviśeṣāṇāṃ paśūnāṃ ghātanaṃ smṛtam /
yaccāpi dīyate dānaṃ kiṃ taddānasya lakṣaṇam

jñeyaṃ tadannamucchiṣṭaṃ kriyate bhūribhojanam /
atyaṃtadoṣahīnāṃstānhiṃsaṃti yanmahāmakhe

tatra kiṃ dṛśyate dharmaḥ kiṃ phalaṃ tatra bhūpate /
paśūnāṃ māraṇaṃ yatra nirdiṣṭaṃ vedapaṃḍitaiḥ

tasmādvinaṣṭadharmaṃ ca na puṇyaṃ mokṣadāyakam /
dayāṃ vinā hi yo dharmaḥ sa dharmo viphalāyate

jīvānāṃ pālanaṃ yatra tatra dharmo na saṃśayaḥ /
svāhākāraḥ svadhākārastapaḥ satyaṃ nṛpottama

dayāhīnaṃ cāpalaṃ syānnāsti dharmastu tatra hi /
ete vedā na vedāḥ syurdayā yatra na vidyate

dayādānaparo nityaṃ jīvameva prarakṣayet /
cāṃḍālo'pyatha śūdro vā sa vai brāhmaṇa ucyate

brāhmaṇo nirdayo yo vai paśughātaparāyaṇaḥ /
sa vai sunirdayaḥ pāpī kaṭhinaḥ krūracetanaḥ

vaṃcakaiḥ kathito vedo yo vedo jñānavarjitaḥ /
yatra jñānaṃ bhavennityaṃ tatra vedaḥ pratiṣṭhati

dayāhīneṣu vedeṣu vipreṣu ca mahāmate /
nāsti satyaṃ kriyā tatra vedavipreṣu vai tadā

vedā na vedā rājeṃdra brāhmaṇāḥ satyavarjitāḥ /
dānasyāpi phalaṃ nāsti tasmāddānaṃ na dīyate

yathā śrāddhasya vai cihnaṃ tathā dānasya lakṣaṇam /
jinasyāpi ca yaddharmaṃ bhuktimuktipradāyakam

tavāgre'haṃ pravakṣyāmi bahupuṇyapradāyakam /
ādau dayā prakartavyā śāṃtabhūtena cetasā

ārādhayeddhṛdā devaṃ jinaṃ yena carācaram /
manasā śuddhabhāvena jinamekaṃ prapūjayet

namaskāraḥ prakartavyastasya devasya nānyathā /
mātāpitrostu vai pādau kadā naiva pravaṃdayet

anyeṣāmapi kā vārtā śrūyatāṃ rājasattama /
vena uvāca-
ete viprāśca ācāryā gaṃgādyāḥ saritastathā

vadaṃti puṇyatīrthāni bahupuṇyapradāni ca /
tatkiṃ vadasva satyaṃ me yadi dharmamihecchasi

pātaka uvāca-
ākāśādvai mahārāja meghā varṣaṃti vai jalam /
bhūmau hi parvateṣvevaṃ sarvatra patite jalam

sa āplāvya tatastiṣṭheddayāṃ sarvatra bhāvayet /
nadyaḥ pāpapravāhāstu tāsu tīrthaṃ śrutaṃ katham

jalāśayā mahārāja taḍāgāḥ sāgarāstathā /
pṛthivyādhārakāścaiva girayo aśmarāśayaḥ

nāstyeteṣu ca vai tīrthaṃ jalairjaladamuttamam /
snāne yadā mahatpuṇyaṃ kasmānmatsyeṣu vai nahi

dṛṣṭā snānena vai siddhirmīnāḥ śuddhyaṃti nānyathā /
yatra jinastatra tīrthaṃ tatra dharmaḥ sanātanaḥ

tapodānādikaṃ sarvaṃ puṇyaṃ tatra pratiṣṭhitam

eko jinaḥ sarvamayo nṛpeṃdra nāstyeva dharmaṃ paramaṃ hi tīrtham /
ayaṃ tu lābhaḥ paramastu tasmāddhyyāsva nityaṃ susukho bhaviṣyasi

viniṃdya dharmaṃ sakalaṃ savedaṃ dānaṃ sapuṇyaṃ parayajñarūpam /
pāpasvabhāvairbahubodhito nṛpastvaṃgasya putro bhuvi tena pāpinā

iti śrīpadmapurāṇe paṃcapaṃcāśatsahasrasaṃhitāyāṃ bhūmikhaṃḍe venopākhyāne saptatriṃśo'dhyāyaḥ