Padma Purana · Chapter 2.21

sūta uvāca-
ekadā vyāsa devo'sau brahmāṇaṃ jagataḥ patim /
suvratākhyānakaṃ sarvaṃ papracchātīva vismitaḥ

vyāsa uvāca-
lokātmam̐llokavinyāsa devadeva mahāprabho /
suvratasyātha caritaṃ śrotumicchāmi sāṃpratam

brahmovāca-
pārāśaryamahābhāga śrūyatāṃ puṇyamuttamam /
suvratasya suviprasya tapaścaryāsamanvitam

suvrato nāma medhāvī bālyādapi sa ciṃtayan /
garbhe nārāyaṇaṃ devaṃ dṛṣṭavānpuruṣottamam

sa pūrvakarmābhyāsena harerdhyānaṃ gatastadā /
śaṃkhacakradharaṃ devaṃ padmanābhaṃ supuṇyadam

dhyāyate ciṃtayetso hi gīte jñāne prapāṭhane /
evaṃ devaṃ hariṃ dhyāyansadaiva dvijasattamaḥ

krīḍatyevaṃ sadā ḍiṃbhaiḥ sārddhaṃ ca bālakottamaḥ /
bālakānāṃ svakaṃ nāma hareścaiva mahātmanaḥ

cakāra sa hi medhāvī puṇyātmā puṇyavatsalaḥ /
samāhvayati vai mitraṃ harernāmnā mahāmatiḥ

bhobhoḥ keśava ehyehi ehi mādhavacakradhṛk /
krīḍasva ca mayā sārdhaṃ tvameva puruṣottama

samamevaṃ pragaṃtavyamāvābhyāṃ madhusūdana /
evameva samāhvānaṃ nāmabhiśca harerdvijaḥ

krīḍane paṭhane hāsye śayane gītaprekṣaṇe /
yāne ca hyāsane dhyāne maṃtre jñāne sukarmasu

paśyatyevaṃ vadatyevaṃ jagannāthaṃ janārdanam /
sa dhyāyate tamekaṃ hi viśvanāthaṃ maheśvaram

tṛṇe kāṣṭhe ca pāṣāṇe śuṣke sārdre hi keśavam /
paśyatyevaṃ sa dharmātmā goviṃdaṃ kamalekṣaṇam

ākāśe bhūmimadhye tu parvateṣu vaneṣu ca /
jale sthale ca pāṣāṇe jīveṣveva mahāmatiḥ

nṛsiṃhaṃ paśyate vipraḥ suvrataḥ sumanāsutaḥ /
bālakrīḍāṃ samāsādya ramatyevaṃ dinedine

gītaiśca gāyate kṛṣṇaṃ surāgairmadhurākṣaraiḥ /
tālairlayasamāyuktaiḥ susvarairmūrcchanānvitaiḥ

suvrata uvāca-
dhyāyaṃti vedaviduṣaḥ satataṃ surāriṃ yasyāṃgamadhye sakalaṃ hi viśvam /
yogeśvaraṃ sakalapāpavināśanaṃ ca vrajāmi śaraṇaṃ madhusūdanasya

lokeṣu yo hi sakaleṣvanuvartate yo lokāśca yasminnivasaṃti sarve /
doṣairvihīnamakhilaiḥ parameśvaraṃ taṃ tasyaiva pādayugalaṃ satataṃ namāmi

nārāyaṇaṃ guṇanidhānamanaṃtavīryaṃ vedāṃtaśuddhamatayaḥ prapaṭhaṃti nityam /
saṃsārasāgaramanaṃtamagādhadurgamuttāraṇārthamakhilaṃ śaraṇaṃ prapadye

yogīṃdra mānasasarovararājahaṃsaṃ śuddhaṃ prabhāvamakhilaṃ satataṃ hi yasya /
tasyaiva pādayugalaṃ vimalaṃ viśālaṃ dīnasya me'suraripo kuru tasya rakṣām

dhyāye'khilasya bhuvanaṃ svapatiṃ ca devaṃ duḥkhāṃdhakāradalanārthamihaiva caṃdram /
lokasya pālanakṛte pariṇītadharmaṃ satyānvitaṃ sakalalokaguruṃ sureśam

gāyāmyahaṃ surasagītakatālamānaiḥ śrīraṃgamekamaniśaṃ bhuvanasya devam /
ajñānanāśakamalaṃ ca dineśatulyamānaṃdakaṃdamakhilaṃ mahimā sametam

saṃpūrṇamevamamṛtasyakalānidhānaṃ taṃ gītakauśalamananyarasaiḥ pragāye /
yuktaṃ svayogakaraṇaiḥ paramārthadṛṣṭiṃ viśvaṃ sa paśyati carācarameva nityam

paśyaṃti naiva yamihātha supāpalokāstaṃ keśavaṃ śaraṇamevamupaiti nityam

karābhyāṃ vādyamānastu tālaṃ tālasamanvitam /
gītenagāyate kṛṣṇaṃ bālakaiḥ saha modate

evaṃ krīḍārato nityaṃ bālabhāvena vai tadā /
suvrataḥ sumanāputro viṣṇudhyānaparāyaṇaḥ

krīḍamānaṃ prāha mātā suvrataṃ cārulakṣaṇam /
bhojanaṃ kuru me vatsa kṣudhā tvāṃ paripīḍayet

tāmuvāca punaḥ prājñaḥ sumanā mātaraṃ punaḥ /
mahāmṛtena tṛptosmi haridhyānarasena vai

bhojanāsanamārūḍho miṣṭamannaṃ prapaśyati /
idamannaṃ svayaṃ viṣṇurātmā hyannaṃ samāśritaḥ

ātmarūpeṇa yo viṣṇuranenānnena tṛpyatu /
kṣīrasāgarasaṃvāso yasyaiva parisaṃsthitaḥ

jalenānena puṇyena tṛptimāyātu keśavaḥ /
tāṃbūlacaṃdanairgaṃdhairebhiḥ puṣpairmanoharaiḥ

ātmasvarūpeṇa tṛptastṛptimāyātu keśavaḥ /
śayane yāti dharmātmā tadā kṛṣṇaṃ praciṃtayet

yoganidrānvitaṃ kṛṣṇaṃ tamahaṃ śaraṇaṃ gataḥ /
bhojanācchādaneṣvevamāsane śayane dvijaḥ

ciṃtayedvāsudevaṃ taṃ tasmai sarvaṃ prakalpayet /
tāruṇyaṃ prāpya dharmātmā kāmabhogānvihāya vai

sa yuktaḥ keśavadhyāne vaiḍūryaparvatottame /
yatra siddheśvaraṃ liṃgaṃ vaiṣṇavaṃ pāpanāśanam

rudramoṃkārasaṃjñaṃ ca dhyātvā caiva maheśvaram /
brahmaṇā varddhitaṃ devaṃ narmadādakṣiṇe taṭe

siddheśvaraṃ samāśritya tapobhāvaṃ vyaciṃtayat

iti śrīpadmapurāṇe paṃcapaṃcāśatsahasrasaṃhitāyāṃ bhūmikhaṃḍe aiṃdre sumanopākhyāne ekaviṃśo'dhyāyaḥ