Padma Purana · Chapter 1.53

dvija uvāca-
tulādhārasya caritaṃ prabhāvamatulaṃ prabho/
vaktumarhasyaśeṣeṇa yadi mayyastyanugrahaḥ

śrībhagavānuvāca -
satyabhāvādalobhācca dadyādyo vai tvamatsarāt/
nityaṃ yajñaśataṃ tasya suniṣpannaṃ sudakṣiṇam

satyenodayate sūro vāti vātastathaiva ca/
na laṃghayetsamudrastu velāṃ kūrmo dharāṃ tathā

satyena lokāstiṣṭhaṃti sarve ca vasudhādharāḥ/
satyādbhraṣṭotha yaḥ satvopyadhovāsī bhaveddhruvam

satyavāciratothastu satyakāryarataḥ sadā/
saśarīreṇa svarlokamāgatyācyutatāṃ vrajet

satyena munayaḥ sarve māṃ ca gatvā sthiraṃ gatāḥ/
satyādyudhiṣṭhiro rājā saśarīro divaṃ gataḥ

sarvaśatrugaṇaṃ jitvā loko dharmeṇa pālitaḥ/
akarocca makhaṃ śuddhaṃ rājasūyaṃ sudurlabham

caturaśītisahasrāṇi brāhmaṇānāṃ ca nityaśaḥ/
bhojayedrukmapātreṣu rājopakaraṇeṣu ca

bhojayitvopakaraṇāṃstebhyo datvā visarjayet/
yadabhīṣṭaṃ dvijātīnāmatonyaddāpayeddhanam

adaridraṃ tato jñātvā dvijavyūhaṃ parityajet/
tathaiva snātakānāṃ tu sahasrāṇi tu ṣoḍaśa/
nityaṃ saṃbhojayedrājā satyenaiva vimatsaraḥ

atiṣṭhaṃta gṛhe pūrvaṃ ciraṃ tasya jigīṣayā/
jitaṃ tena jagatsarvaṃ prāṇānugrahakāraṇāt

satyena cāsuro rājā baliriṃdro bhaviṣyati/
pātālasthasya tasyaiva bhūyastiṣṭhāmi veśmani

niraṃtaraṃ ca tiṣṭhāmi svāṃte puṇyaikakarmaṇaḥ/
yadvā purā mayā baddho daityayonervimokṣaṇāt

talaṃ caivāmaratvaṃ hi śakratvaṃ pradadāmyaham/
hariścaṃdro nṛpassatyātsavāhanaparicchadaḥ

svaśarīreṇa śuddhena satyaloke pratiṣṭhitaḥ/
rājāno bahavaścānye ye ca siddhā maharṣayaḥ

jñānino yatayaścaiva sarve satye'cyutā'bhavan/
tasmātsatyarato loke saṃsāroddharaṇakṣamaḥ

tulādhāro mahātmā vai satyavākye pratiṣṭhitaḥ/
loke tatsadṛśo nāsti satyavākyasya kāraṇāt

aśvamedhasahasreṇa satyaṃ tu tulayā dhṛtam/
aśvamedhasahasrāddhi satyameva viśiṣyate

sarvaṃ satyādbhavetsādhyaṃ satyo hi duratikramaḥ/
satyavākyena sā dhenurbahulā svargagāminī

sarvaṃ rāṣṭraṃ samādhāya punarāvṛttidurlabhā/
tathāyaṃ sarvadā sākṣī mṛṣā nāsti kadācana

bahvarghamalpamarghaṃ ca krayavikrayaṇe sudhīḥ/
satyavākyaṃ praśastaṃ ca viśeṣātsākṣiṇo bhavet

sākṣiṇaḥ satyamuktvā ca akṣayaṃ svargamāyayuḥ/
vāvadūkaḥ sabhāṃ prāpya satyaṃ vadati vākpatiḥ

sa yāti brahmaṇo gehaṃ yajñairanyaiśca durlabham/
sabhāyāṃ yo vadetsatyamaśvamedhaphalaṃ labhet

lobhāddveṣānmṛṣoktvā ca rauravaṃ narakaṃ vrajet/
sarvasākṣī tulādhāro janānāṃ śūra eva ca

viśeṣāllobhasaṃtyāgānnāke nirjaratāṃ vrajet/
kaścicchūdro mahābhāgo na lobhe vartate kvacit

vṛttiśśākena duḥkhena tathā śiloṃchato bhṛśam/
jarjaraṃ vastrayugmaṃ ca karau pātre ca sarvadā

sadāpi lābhaviraho na parasvaṃ gṛhītavān/
tasya jijñāsayaivāhaṃ gṛhītvā vastrayugmakam

avakoṭe nadītīre sthitassaṃsthāpya sādaram/
sa dṛṣṭvā vastrayugmaṃ tanna lobhe kurate manaḥ

itarasya parijñāya tatkṣāṃtyā svagṛhaṃ yayau/
tato viciṃtayitvā tu hṛdā svalpamiti dvija

uduṃbaraṃ hemagarbhaṃ mayā tatraiva pātitam/
kiṃkare ca nadītīre vikoṇe janavarjite

tasya yātasya deśe tu dṛṣṭaṃ tena tadadbhutam/
alaṃ vidhānametattu kṛtrimaṃ copalakṣyate

grahaṇe vādhunā cāsya alobhaṃ naṣṭameva me/
asyaiva rakṣaṇe kaṣṭamahaṃkārapadaṃ tvidam

yato lobhastato lābho lābhāllobhaḥ pravartate/
lobhagrastasya puṃsaśca śāśvato nirayo bhavet

yadi no viguṇaṃ vittaṃ yadā veśmani tiṣṭhati/
tadā me dāraputrāṇāmunmādo hyupapadyate

unmādātkāmasaṃjāta vikārānmativibhramaḥ/
bhramānmohopyahaṃkāraḥ krodhalobhāvataḥ paraṃ

eṣāṃ pracurabhāvācca tapaḥ kṣayaṃ gamiṣyati/
kṣīṇe tapasi vartaṃte paṃkāścittapramohakāḥ

taiśca śṛṃkhalayogaiśca baddho naivoddhṛtiṃ vrajet/
etadvimṛśya śūdro'sau parityajya gṛhaṃ gataḥ

svasthā devā mudā tatra sādhusādhviti cābruvan/
nirgraṃthirūpamādāya tasyāṃtika gṛhaṃ tathā

gatvāhaṃ daivasaṃvādamavadaṃ bhūtavartanam/
tatobhyāsaprasaṃgācca janānāṃ ca pariplavāt

tasya yoṣā tadāgatya papraccha daivakāraṇam/
tatohamavadaṃ tasya yadvā cetogataṃ drutam

nibhṛtotha ninādasya kāraṇaṃ kathitaṃ mayā/
hṛdgataṃ patinā tedya vidhinā dattamajñavat

parityaktaṃ mahābhāge punarnāstīha te vasu/
yāvajjīvati daurvidhyaṃ tasya bhoktā na saṃśayaḥ

gaccha mātargṛhaṃ śūnyamalabdhaṃ tatprapṛcchatam/
śrutvā tadvai śivaṃ sā ca vacanaṃ patyuraṃtike

gatvā provāca durvṛttaṃ tacchrutvā vismayaṃ gataḥ/
sa viciṃtya tayā sārdhamāgatosau mamāṃtikam

nibhṛtaṃ māmuvācedaṃ kṣapaṇatvaṃ ca kīrtaya/
kṣapaṇaka uvāca-
cākṣuṣaṃ cirasaṃśuddhaṃ helayā tṛṇavatkatham

tvayā tyaktaṃ yatastāta nāsti bhāgyamakaṃṭakam/
aiśvaryamatulaṃ śauryaṃ śīryate bhāvukaṃ punaḥ

svabaṃdhūnāṃ mahadduḥkhamājanmamaraṇāṃtikam/
drakṣyase cātmanā nityaṃ mṛtānāṃ yā gatirdhruvam

tasmāttadgṛhyatāṃ tūrṇaṃ bhuṃkṣva bhogyamakaṃṭakam/
aiśvaryamatulaṃ śauryaṃ lokānāṃ vismayaṃ varam

śūdra uvāca-
na me vitte spṛhā cāsti dhanaṃ saṃsāra vāgurā/
tadvidhau patito martyo na punarmokṣakaṃ vrajet

śṛṇu vittasya yaddoṣamihaloke paratra ca/
bhayaṃ corācca jñātibhyo rājabhyastatkarādapi५०

sarve jighāṃsavo martyāḥ paśumatsyaviviṣkirāḥ/
tathā dhanavatāṃ nityaṃ kathamarthāssukhāvahāḥ

prāṇasyāṃtakaro hyarthassādhako duritasya ca/
kālādīnāṃ priyaṃ gehaṃ nidānaṃ durgateḥ param

kṣapaṇaka uvāca-
yasyārthāstasya mitrāṇi yasyārthāstasya bāṃdhavāḥ/
kulaṃ śīlaṃ ca pāṃḍityaṃ rūpaṃ bhogyaṃ yaśaḥ sukham

dhanena tu vihīnasya putradārojjhitasya ca/
kathaṃ mitraṃ kathaṃ dharmaṃ dīnānāṃ janmanaḥ kathaṃ

satvādikratukāryaṃ ca puṣkariṇyupakārakaṃ/
dānaṃ nākasya sopānaṃ niḥsvasya ca na siddhyati

vratakāryasya rakṣā ca dharmādiśravaṇaṃ bhṛśam/
pitṛyajñāditīrthaṃ ca nirvittasya na siddhyati

tathā rogapratīkāraḥ pathyamauṣadhasaṃcayaṃ/
rakṣaṇaṃ vigrahaścaiva śatrūṇāṃ vijayo dhruvam

strīṇāṃ ca janmanā vārtā vasuyogena labhyate/
bhūtabhavyapravṛttānāṃ sukṛtaṃ duṣkṛtaṃ ca yat

tasmādbahudhanaṃ yasya tasya bhogyaṃ yadṛcchayā/
svargaṃ vitaraṇādeva lapsyase hyacirāditaḥ

śūdra uvāca-
akāmācca vrataṃ sarvamakrodhāttīrthasevanam/
dayā japyasamā śuddhaṃ saṃtoṣo dhanameva ca

ahiṃsā paramā siddhiḥ śiloṃchavṛttiruttamā/
śākāhāraḥ sudhātulya upavāsaḥ paraṃtapa

saṃtoṣo me mahābhogyaṃ mahādānaṃ varāṭakam/
mātṛvatparadārāśca paradravyāṇi loṣṭhavat

paradārā bhujaṃgābhāḥ sarvayajña idaṃ mama/
tasmādenaṃ na gṛhṇāmi satyaṃ satyaṃ guṇākara

prakṣālanāddhi paṃkasya dūrādasparśanaṃ varaṃ/
ityukte tu naraśreṣṭha puṣpavarṣaṃ papāta ha

mūrdhrideśe tanau tasya sarvadeveritaṃ dvija/
devaduṃdubhayo nedurnṛtyaṃtyapsarasāṃ gaṇāḥ

jagurgaṃdharvapatayo vimānaṃ cāpataddivaḥ/
ūcurdevagaṇāstatra vimānamidamāruha

satyalokaṃ samāsādya bhuṃkṣva bhogyaṃ maheṃdravat/
saṃkhyā tenāpi varteta bhogyakālasya dhārmika

ityukteṣu ca deveṣu śūdro vacanamabravīt/
kathaṃ nirgraṃthakasyāsya jñānaṃ ceṣṭāsya bhāṣaṇam

kiṃ vā hariharau brahmā kiṃ vā śakro bṛhaspatiḥ/
kiṃ vā macchalanādeva sākṣāddharma ihāgataḥ

ityukte kṣapaṇaścāsau smito vacanamabravīt/
vijñātuṃ caiva vo dharmamahaṃ viṣṇurihāgataḥ

vimānena divaṃ gaccha sakuṭuṃbo mahāmune/
matprasādācca yuṣmākaṃ sadaiva navayauvanam

bhaviṣyati mahāprājña bhāgyānaṃtyaṃ pralapsyatha/
divyābharaṇasaṃyuktā divyavastropaśobhitāḥ

gatāste sahasā nākaṃ sarvairbaṃdhujanairvṛtāḥ/
evaṃ dvijavaraśreṣṭha lobhatyāgādyayurdivam

tulādhārastathādhīmānsatyadharma pratiṣṭhitaḥ/
ye na jānāti tadvṛttaṃ deśāṃtarasamudbhavam

tulādhārasamo nāsti suraloke pratiṣṭhitaḥ/
tasmāttvamapi bhūdeva samaṃ gatvā divaṃ vraja

ya idaṃ śṛṇuyānmartyaḥ sarvadharmapratiṣṭhitaḥ/
janmajanmārjitaṃ pāpaṃ tatkṣaṇāttasya naśyati

sakṛtpaṭhanamātreṇa sarvayajñaphalaṃ labhet/
lokānāṃ purato vipra devānāmarcyatāṃ vrajet

iti śrīpādmapurāṇe prathame sṛṣṭikhaṃḍe śūdrasyālobhākhyānaṃ nāma tripaṃcāśattamo-'dhyāyaḥ