nirālambopaniṣat · Chapter 1

nirālambopaniṣat
yatrālambālambibhāvo vidyate na kadācana /
jñavijñasamyagjñālambaṃ nirālambaṃ hariṃ bhaje //
ॐ pūrṇamadaḥ pūrṇamidaṃ pūrṇātpūrṇamudacyate /
pūrṇasya pūrṇamādāya pūrṇamevāvaśiṣyate //
ॐ śāntiḥ śāntiḥ śāntiḥ //
ॐ namaḥ śivāya gurave saccidānandamūrtaye /
niṣprapañcāya śāntāya nirālambāya tejase //
nirālambaṃ samāśritya sālambaṃ vijahāti yaḥ /
sa saṃnyāsī ca yogī ca kaivalyaṃ padamaśnute

eṣamajñānajantūnāṃ samastāriṣṭaśāntaye /
yadyadboddhavyamakhilaṃ tadāśaṅkya bravīmyam

kiṃ brahma / ka īśvaraḥ / ko jīvaḥ / kā prakṛtiḥ / kaḥ paramātmā / ko brahmā / ko viṣṇuḥ / ko rudraḥ / ka indraḥ / kaḥ śamanaḥ / saḥ śamanaḥ / kaḥ sūrya / kaścandra / ke surāḥ / ke asurāḥ / ke piśācāḥ / ke manuṣyāḥ / kāḥ striyaḥ / ke paśvādayaḥ / kiṃ sthāvaram / ke brāhmaṇādayaḥ / kā jātiḥ / kiṃ karma / kimakarma / kiṃ jñānam / kimajñānam / kiṃ sukham / kiṃ dukham / kaḥ svargaḥ / ko narakaḥ / ko bandhaḥ / ko mokṣaḥ / ka upāsyaḥ / kaḥ śiṣyaḥ / ko vidvān / ko mūḍhaḥ / kimāsuram / kiṃ tapaḥ / kiṃ padamaṃ padam / kiṃ grāhyam / kimagrāhyam / kaḥ saṃnyāsītyāśaṅkyāha brahmeti /

sa hovāca mahadahaṅkārapṛthivyaptaॆjovāyvākāśatvena bṛhadrūpeṇāṇḍakośena karmajñānārtharūpatayā bhāsamānamadvitīyamakhilopādvinirmuktaṃ tatsakalaśaktyupabṛṃhitamanādyanantaṃ śuddhaṃ śivaṃ śāntaṃ nirguṇamityādivācyamanirvācyaṃ caitanyaṃ brahma īśvara iti ca / brahmaiva svaśaktiṃ prakṛtyabhidheyāmāśritya lokānsṛṣṭvā praviśyāntaryāmitvena brahmādīnāṃ buddhīndriyaniyantṛtvādīśvaraḥ

jīva iti ca brahmaviṣṇavīśānendrādīnāṃ nāmarūpadvārā sthūlo'hamiti mithyādhyāsavaśājjīvaḥ / so'hameko'pi dehārambhakabhedavaśādbahujīvaḥ

prakṛtiriti ca brahmaṇaḥ sakāśānnānāvicitrajagannirmāṇasāmārthyabuddhirūpā brahmaśaktireva prakṛtiḥ

paramātmeti ca dehādeḥ parataratvādbrahmaiva paramātmā

sa brahmā sa viṣṇuḥ sa indraḥ sa śamanaḥ sa sūryaḥ sa candraste asurāste piśācāste manuṣyāstāḥ striyate paśvādayastatsthāvaraṃ te brāhmaṇādayaḥ

sarvaṃ khalvidaṃ brahma neha nānāsti kiñcana

jātiriti ca / na carmaṇo na raktasya na māṃsasya na cāsthinaḥ /
na jātirātmano jātirvyavahāraprakalpitā

karmeti ca kriyamāṇendriyaiḥ karmāṇyahaṃ karomītyadhyātmaniṣṭhatayā kṛtaṃ karmaiva karma / akarmeti ca kartuvyabhoktṛtvādyahaṅkāratayā bandharūpaṃ janmādikāraṇaṃ nityanaimittikayāgavratatapodānādiṣu phalābhisandhānaṃ yattadakarma// ११-१२//
jñānamiti ca dehendriyanigrahasadgurūpāsanaśravaṇamanananididhyāsanairyadyadṛgdṛśyasvarūpaṃ sarvāntarasthaṃ sarvasamaṃ ghaṭapacādipadārthamivāvikāraṃ vikāreṣu caitanyaṃ vinā kiñcinnāstīti sākṣātkārānubhavo jñānam

ajñānamiti ca rajjau sarpabhrāntirivādvitīye sarvānusyūte sarvamaye brahmaṇi devatiryaṅnarasthāvarastrīpuruṣavarṇāśrama -bandhamokṣopādhinānātmabhedakalpitaṃ jñānamajñānam

sukhamiti ca saccidānandasvarūpaṃ jñātvānandarūpā yā sthitiḥ saiva sukham

duḥkhamiti anātmarūpo viṣayasaṅkalpa eva duḥkham

svarga iti ca satsaṃsargaḥ svargaḥ /
naraka iti ca asatsaṃsāraviṣayajanasaṃsarga eva narakaḥ

bandha iti ca anādyavidyāvāsanayā jāto'hamityādisaṅkalpo bandhaḥ

pitṛmātṛsahodaradārāpatyagṛhārāmakṣetramamatāsaṃsārāvaraṇasaṅkalpo bandhaḥ

kartṛtvādyahaṅkārasaṅkalpo bandhaḥ

aṇimādyaṣṭaiśvaryāśāsiddhasaṅkalpo bandhaḥ

devamanuṣyādyupāsanākāmasaṅkalpo bandhaḥ

yamādyaṣṭāṅgayogasaṅkalpo bandhaḥ

varṇāśramadharmakarmasaṅkalpo bandhaḥ

ājñābhayasaṃśayātmaguṇasaṅkalpo bandhaḥ

yāgavratatapodānavidhividhānajñānasaṅkalpo bandha

kevalamokṣāpekṣā saṅkalpo bandhaḥ

saṅkalpamātrasaṃbhavo bandhaḥ

mokṣa iti ca nityānityavastuvicārādanityasaṃsārasukhaduḥkhaviṣayasamastakṣetra mamatābandhakṣayo mokṣaḥ

upāsya iti ca sarvaśarīrasthacaitanyabrahmaprāpako gururupāsyaḥ

śiṣya iti ca vidyādhvastaprapañcāvagāhitajñānāvaśiṣṭaṃ brahmaiva śiṣyaḥ

vidvāniti ca sarvāntarasthasvasaṃvidrūpavidvidvān

mūḍha iti ca kartṛtvādyahaṅkārabhāvārūḍho mūḍhaḥ

āsuramiti ca brahmaviṣṇvīśānendrādīnāmaiśvaryakāmanayā niraśanajapāgnihotrādiṣvantarātmānaṃ saṃtāpayati cātyugrarāgadveṣa-vihiṃsādambhādyapekṣitaṃ tapa āsuram

tapa iti ca brahma satyaṃ jaganmithyetyaparokṣajñānāgninā / brahmādyaiśvaryāśāsiddhasaṅkalpabījasantāpaṃ tapaḥ

paramaṃ padamiti ca prāṇendriyādyantaḥ karaṇaguṇādeḥ/ parataraṃ saccidānandamayaṃ nityamuktabrahmasthānaṃ paramaṃ padam

grāhyamiti ca deśakālavastuparicchedarāhityacinmātrasvarūpaṃ grāhyam

agrāhyamiti ca svasvarūpavyatiriktamāyāmayabuddhīndriyagocarajagatsatyatvacintanamagrāhyam

saṃnyāsīti ca sarvadharmānparityajya nirmamo nirahaṅkāro bhūtvā brahmeṣṭaṃ śaraṇamupagamya tattvamasi ahaṃ brahmāsmi sarvaṃ khalvidaṃ brahma neha nānāsti kiñcanetyādimahāvākyārthānubhavajñānād brahmaivāhamasmīti niścitya nirvikalpasamādhinā svatantro yatiścarati sa saṃnyāsī sa muktaḥ sa pūjyaḥ sa yogī sa paramahaṃsaḥ so'vadhūtaḥ sa brāhmaṇa iti

idaṃ nirālambopaniṣadaṃ yo'dhīte gurvanugrahataḥ so'gnipūto bhavati sa vāyupūto bhavati na sa punarāvartate na sa punarāvartate punarnābhijāyate punarnābhijāyata ityupaniṣat

ॐ pūrṇamadaḥ pūrṇamidaṃ pūrṇātpūrṇamudacyate /
pūrṇasya pūrṇamādāya pūrṇamevāvaśiṣyate //
ॐ śāntiḥ śāntiḥ śāntiḥ //
|| iti nirālambopaniṣatsamāptā //
adhikādhyayanāya