mānavaśulbasūtram · Chapter 1

mānavaśulbasūtram

athātaḥ śulbaṃ vyākhyāsyāmaḥ

rajjuṃ pāśavatīṃ samāṃ nirāyatāṃ pṛṣṭhyāṃ yathārthamupakalpayet

antareṇa citrāsvātī śravaṇapratiśravaṇau kṛttikāpratikṛttike tiṣyapunarvasū ca prāgdeśo'yaṃ yugamātroditayoḥ pāśāñca

dārśikyāḥ śayāḥ ṣaṭtāni sapta saptadaśaiva tu ekaṃ dve pañca tairmītvā samaraiḥ parilekhayet

aṃsācchroṇau rajjvantaṃ pratiṣṭhāpya prācīmanulikhedaṃsepratiṣṭhāpya pratīcīṃ samare rajjvantaṃ pratiṣṭhāpya śroṇeradhyaṃsādanulikhet

evamuttarataḥ purastātpaścācca

aratniścaturaśrastu pūrvasyāgneḥ kharo bhavet rathacakrākṛtiḥ paścāccandrārdhena tu dakṣiṇe

madhyāt koṭipramāṇena maṇḍalaṃ parilekhayet atiriktatribhāgena sarvaṃ tu sahamaṇḍalam caturaśre'kṣṇayā rajjurmadhyataḥ saṃnipātayet parilekhya tadardhenārdhamaṇḍalameva tat

gārhapatyāhavanīyāvantarā rajjuṃ nimāyāparasmiṃstṛtīye lakṣaṇam / madhyāt turīyamutsṛjya lakṣaṇaṃ pāśāntau samāhṛtya dakṣiṇato dakṣiṇāgnerlakṣaṇam

etadeva viparyasyottarata utkarasya lakṣaṇam

yāvatpramāṇā rajjuḥ syāttāvadevāgamo bhavet āgamārdhe bhavecchaṅkuḥ śaṅkorardhe nirāñchanam

samantacaturaśrāṇi vidhireṣaḥ prakīrtitaḥ

aṣṭāśītiḥ śatamīṣā tiryagakṣaścatuḥśatam ṣaḍaśītiryugaṃ cāsya rathaścārakya ucyate

īṣāyāṃ lakṣaṇaṃ mītvā ṣaṭsu navasu ca lakṣaṇe tricatvāriṃśake pāśo'ṅgulānāṃ niyogataḥ

eṣā vediḥ samākhyātā cārakya rathasaṃmitā aindrāgnasya paśoreṣā paśuṣvanyeṣu ṣaṭśayā

prācyardhaḥ ṣaḍaratniḥ syādardhāratnernirāñchanam ardhe śroṇī tato'rdheṃ'sāvadhyardha iti pāśukī

paśādardhaśaye śroṇī dvayoḥ pṛṣṭhyāparā dvayoḥ prācyardhastu tato'dhyardhe tato'dhyardhe nirāñchanam ardheṃ'so'dhyardha evānyastato'dhyardheṃ'sa uttaraḥ aratnau tu tataḥ pāśo vedī mārutī vārūṇī

sarvā daśaśayā rajjurmadhye cāsyā nirāñchanam prācyardhaṃ pañcame kuryāddikkuṣṭhā paitṛkī smṛtā

sarvā saptaśayā rajjurmadhye cāsyā nirāñchanam prācyardhaṃ pañcame kuryāddikkuṣṭhā paitṛkī smṛtā

prāgvaṃśaṃ daśakaṃ kuryātpatnīśālāṃ catuḥśayām prāgvaṃśāttriṣu vedyanto vedyantāt prakrame sadaḥ

navakaṃ tu sado vidyāccatvāraḥ sadaso'ntaram catvārastrikā havirdhānamardhadaśāstadantaram

padaṃ yūpāvaṭe mītvā śeṣamauttaravedikam āgnīdhraṃ ṣaḍaratnyeva ṣaṭtriṃśatprakramā rajjuḥ

lakṣikā dvādaśa trikā / vedisadohavirdhānāni minotyevānupūrvaśaḥ pañcadaśakamekaviṃśakaṃ trikamaparam / parato'parastriko dvādaśasu ca pāśada ucyate / some rajju nimānamuttamam

tripadā pārśvamānī syāttiryaṅmānī padaṃ bhavet tasyākṣṇayā tu yā rajjuḥ kuryāddaśapadāṃ tayā

paśādardhacaturdaśe navake tu tataḥ punaḥ ardhacaturdaśaḥ pāśaḥ sadasaśchedanamuttamam

nimāya rajjuṃ daśabhī rathākṣairekādaśabhiścoparabudhnamātraistasyāścaturviṃśatibhāgadheyamekādaśinīṃ prativedimāhuḥ

śikhaṇḍinī cetkartavyā vedyantāddvyardhamuddharet aṣṭāṅgulaṃ tadardhaṃ syāddevya vedi prasiddhaye taṃ prāñcaṃ tu samīkṣeta tāṃstu vidyācchikhaṇḍinīm

pañcakaṃ saptaṃ caiva ekamekaṃ tataḥ punaḥ eṣā vediḥ samākhyātā kaukilyāstvatha cārake

janmanā rogahīno vā yajamāno bhavedyadi kathaṃ tatra pramāṇāni prayoktavyāni kartṛbhiḥ

tuṇḍaṃ puṣkaranālasya ṣaḍguṇaṃ pariveṣṭitam trihāyaṇyā vatsataryā vālena samamiṣyate

trayastrihāyaṇīvālāḥ sarṣapārdhaṃ vidhīyate dviguṇaṃ sarṣapaṃ prāhuryavaḥ sarṣapāram

aṅgulasya pramāṇaṃ tu ṣaḍyavāḥ pārśvasaṃhitāḥ daśāṅgulastu prādeśo vitastirdvādaśāṅgulaḥ dvivitastiraratniḥ syādvyāyāmastu catuḥśayaḥ

viṃśatiśatāṅgulataḥ puruṣaḥ svaiḥ svairaṅguliparvabhiḥ atha cetprapadotthānaḥ pañcaviṃśaśato bhavet

triyavaṃ kṛṣṇalaṃ vidyāt mānaṃ vidyāt trikṛṣṇalam anena kṛṣṇalapramāṇena niṣkamāhuścaturguṇam

puruṣasya tṛtīyapañcamau bhāgau tatkaraṇaṃ punaściteḥ tasyārdhamathāparaṃ bhavettricitikamagnicitiścet

aṣṭāvaṣṭau saṃmitā citiraṣṭaikādaśikā ca madhyamā vyatyā savatīrupanyasedaṣṭau dvādaśa cottamā citiḥ

athāta uttareṣṭakaṃ vyākhyāsyāmaḥ

ūrdhabāhunā yajamānena veṇuṃ vimimīte

tatsamo'nyataraḥ sāratnirdvitīyastasya puruṣe lakṣaṇamaratni vitastyoścobhayorardhapuruṣe

śirasi pariśrite yūpāyāvaśiṣya śeṣamanurajju puruṣau saṃdhāya pañcāṅgyā śaṅkuṃ vinihanti tayoḥ saṃdhāvardhayośca

yāvabhito madhyamaṃ śaṅkuṃ tayorveṇū nidyāya dakṣiṇataḥ puruṣasaṃnipāte todaṃ karoti

madhyame śaṅkau veṇuṃ nidhāyādhyadhi todaṃ hṛtvā dakṣiṇataḥ puruṣe śaṅkuṃ nihanti

pūrve śaṅkau veṇuṃ nidhāya dvitīyaṃ dakṣiṇataḥ purastātpuruṣasaṃnipāte śaṅkuṃ nihantyardhe caivaṃ paścāt

etenottarārdho vyākhyātaḥ

dakṣiṇasya vargasya yāvabhito madhyamaṃ śaṅkuṃ tayorveṇū nidhāya dakṣiṇataḥ puruṣasaṃnipāte todaṃ karoti

madhyame śaṅkau veṇuṃ nidhāyādhyapi todaṃ hṛtvā dakṣiṇataḥ sāratnau śaṅkuṃ nihanti

yaḥ sāratnistaṃ madhyamasya pūrve nidhāya dvitīyaṃ dakṣiṇataḥ purastātsāratnimardhapuruṣeṇa saṃnipātya śaṅkuṃ nihantyevaṃ paścāt

etenaivottarapakṣo vyākhyātaḥ

pucchaṃ savitastiraratnisthāne

pūrvasya purastādardhapuruṣeṇa pañcāṅgyā śiro vimimīte

vyāyāmasyāṣṭamamekatasturīyamekata ubhayatasturīyaṃ ca te gārhapatyaciteḥ karaṇe

puruṣasya daśamena bhāgena prathamaṃ caturaśraṃ karaṇaṃ kārayeddaśamamekato'rdhamekatastaddvitīyaṃ daśamamekato'dhyardhamekatastattṛtīyamubhayatasturīyaṃ taccaturtham

tāsāmutsedhastriṃśatpañcamabhāgenānyatra nākasadbhyaśca cūḍābhya ṛtavyābhyo'tha madhyamāyāṃ pañcamaṣaṣṭhībhyaśca vaiśvadevībhyastā ardhotsedhāḥ

purīṣamantardhāyottarāmupadadhyādgaṇasaṃsargāyāvicchedāya

garteṣūpadadhyādyadanyadiṣṭakābhyaḥ

tatra śloko bhavati ukhāyāḥ paśuśīrṣāṇāṃ kūrmasyolūkhalasya ca srucoḥ kumbheṣṭakānāṃ ca caroścaivāvaṭānkhanet

pratidiśamupadadhyādātmani madhye prācīḥ śirasi pucche pakṣayoścātmanyapyayeṣu samaṃ vibhajyottarāmuttarāmapyayasaṃhitāṃ pūrvāparadakṣiṇottarā viṣayavacanādanyaccatasraḥ purastātpañcartavyābhyaḥ paścāccottarapūrve cārdhe gārhapatyasya / śeṣaṃ caturaśrābhiḥ

etā eva dakṣiṇottarā dvitīyasyāṃ / śeṣaṃ caturaśrābhiḥ

yathā prathamaivaṃ tṛtīyā pañcamī vā yathā dvitīyaivaṃ caturthe / tena dharmena vatyāsaṃ cinuyāt

athetarānāgnīdhrīyādīn navanava padāni karotyekaikaṃ madhye'smānamāgnīdhrīye / catvāri catvāri turīyāṇi pratidiśaṃ hotrīye / catasro'rdhāḥ kuṣṭhāsu brāhyaṇāchaṃsya / itareṣāṃ dve dve adhyardhe madhye prācīḥ / ṣaḍeva mārjālīye paśusrapaṇe ca

viṃśatimadhyardhāḥ prācīraṃsayordadyācchroṇyoḥ pucche ca viṃśatiṃ dvādaśa dvādaśa purastātpakṣayoḥ prācīḥ paścācca pañca pañca codīcīrabhitaḥ śirasi / śeṣaṃ caturaśrābhiḥ

viṃśatiṃ śroṇyaṃsapakṣeṣūdīcīrdakṣiṇatastathottarato dvitīyasyāmekādaśaikādaśābhitaḥ pucche pañca pañca prācīrabhitaḥ śirase / śeṣaṃ caturaśrābhiḥ

yathā prathamaivaṃ tṛtīyā pañcamī ca yathā dvitīyaivaṃ caturthyetena dharmeṇa vyatyāsaṃ cinuyāt

trirupasatsu dve pūrvasyāṃ tisro madhyamāyāṃ ṣaṭsu yathānupūrveṇa dvādaśasu vyatyāsaṃ citipurīṣe karoti

etena dharmeṇa saṃvatsarātsamaṃ vibhajya jānudaghne'sya dviguṇaṃ triguṇamuttareṣāṃ caikāmuttarāmuddhatyābhyāyanaṃ vardhāyātiriktā upadadhyāt

mantrādyabhimarśanāntaṃ tatpuruṣasya lakṣaṇam

darbhastambaṃ puṣkaraparṇaṃ rukmapuruṣau hiraṇyeṣṭakāṃ śarkarāṃ svayamātṛṇṇāṃ dūrveṣṭakā naivāramiti madhyaṃ / tasminkumbheṣṭakā yā madhye dakṣiṇottare ca srucāvanūpamadhyeṣu śeṣāḥ / paścātsvayamātṛṇṇāyāḥ kulāyinīṃ dviyajuśca vaṃśayoḥ pārśvasaṃhite dviyajuruttare purastādretaḥsicau dve / dakṣiṇe tasminvaṃśe dvitīyāmṛtavyāṃ ca purastāccaturthe loke retaḥsicaṃ viśvajyotiṣaṃ maṇḍalāmṛtavyāṃ gharmeṣṭakāmaṣāḍhāṃ kūrmaṃ vṛṣabhamiti prāñcamuttare vaṃśe dakṣiṇataḥ purastātsvayamātṛṇṇāyāḥ pañca mulūkhalamusalamuttarapūrve cokhāṃ madhye śirasāṃ śirobhiḥ saṃhitāmupadadhāti

tasyāḥ paścātpuruṣaśirasaḥ puruṣa citimupadadhāti ṣaṭtriṃśataṃ pratīcīstrivargeṇa śroṇyām

tatra śloko bhavati tisro grīvāḥ ṣaḍaṃsayordve dve bāhvornavātmani jaṅghayoru pañca paścādasmānāmekaikaṃ pāṇipādayoḥ

aṣṭavathāpasyāḥ samaṃ vibhajya vaṃśeṣu navamenavame prāṇabhṛtaḥ purastāduttare vaṃśe prathamaṃ paścāddakṣiṇe dakṣiṇataḥ pūrva uttarataḥ paścāddakṣiṇataḥ svayamātṛṇṇāyā dvitīye pañcamamanūpeṣu saṃyato navame'timātrā yathā prāṇabhṛtaḥ purastāddakṣiṇe vaṃśe prathamaṃ paścāduttare dakṣiṇataḥ paścāduttarataḥ pūrva uttarataḥ paścāddakṣiṇataḥ uttarataḥ svayamātṛṇṇāyā dvitīye pañcamam / vaiśvadevyaścānūpeṣu pratidiśamuttarapūrveṣu vaṃśeṣvādyā / dakṣiṇottare ca saṃyānyāvapyaye tayorvaṃśayorādyāt purastādvātharvaśiraḥ

samaṃ vibhajya vaṃśeṣu śiraḥ pakṣapucchāni prathameṣu vaṃśeṣu lokānvijānīyāt

śirasi prathame vaṃśa uttarāmuttarāmitareṣāṃ pakṣapucchānāṃ caturthe pakṣayoḥ prācīḥ pucche codīcīrlokeṣṭakā upadadhyāccheṣāḥ paścātsvayamātṛṇṇāyā ekaikaṃ pūrvaṃ saṃhitām / dakṣiṇe vaṃśe vaiśvadevyādya uttare ca purīṣādyāḥ

gāyatraṃ madhye śirasi rathantaraṃ bṛhadyajñāyamiti yathāmnātam

dvitīyāyāṃ purastātsvayamātṛṇṇāyāḥ prathamadvitīyatṛtīyeṣvṛtavyā vāyavyā apasyā iti yathāsaṃkhyam / tisrastisro dakṣiṇeṣu vaṃśeṣu dakṣiṇottarā dve dve uttarasyottarayornavame'bhitaḥ śeṣā yathāpasyāḥ

tṛtīyāyāṃ daśa dvādaśa navame'abhito / aṣṭame sapta purastātpaścācca samīcīrabhitaḥ svayamātṛṇṇāyā ardhotsedhā aṣṭau nānāmantrā uttamāyāṃ vā

caturthyāmekaikāṃ navamenavame'bhitaḥ purastāduttarasya vaṃśasya madhye prathamāṃ vyatyāsamitarā / evameva spṛtaḥ purastāddakṣiṇasya vaṃśasya madhye prathamāṃ vyatyāsamitarāḥ / ṣaṭsaptāṣṭameṣu dakṣiṇato yugmāyugmā uttaratastrivargānkuryātsaptadaśa dakṣiṇataḥ pañcadaśottarataḥ

pañcamyāmekaikāṃ prāṇabhṛdādhiṣu śeṣaṃ chandasāṃ virājaśca yathātimātrāḥ ṣaṭsaptāṣṭameṣvabhito yathāsaṃkhyam

ardheṣṭakābhiḥ pūrayitvā dakṣiṇataḥ prācīḥ stomabhāgāḥ paścimāśca yugmā uttaratastrivargānkuryādekatriṃśatam / paścātpratyañcaṃ trivargeṇa nākasadaṃ ca paścātpurīṣavatyā yavādinā sanāmnīrupaśīvarīrghṛtaplutā iti yathāsaṃkhyam / turīyāṇi madhye yathā prāṇabhṛto'timātrā madhyamāṃ svayamātṛṇṇāsaṃhitāmuttarastu vikarṇīm

iti suparṇasya

yāvatī śoṣapākābhyāmiṣṭakā hrasate kṛtā tāvatsamadhikaṃ kāryaṃ karaṇaṃ samamicchata

sadā ca triṃśakaṃ bhāgamiṣṭakā hrasate kṛtā tāvat samadhikaṃ kāryaṃ karaṇaṃ samamicchata

ekaikaṃ śatamadhyardhaṃ tadūtaṃ ṣaḍabhiraṅgulaiḥ iṣṭakānāṃ parimāṇaṃ vaikṛtaṃ yadato'nyathā

navāṅgulasahasrāṇi dve śate ṣoḍaśottare aṅgulānāṃ parimāṇaṃ vyāyāmasya tu nirdiśet

itareṣāṃ tu dhiṣṇyānāṃ sarveṣāmeva niścayaḥ ekaikasya sahasraṃ syācchate ṣaṇṇavatiḥ parā

ekādaśa sahasrāṇi aṅgulānāṃ śatāni ṣaṭ śataṃ caiva sahasrāṇāṃ kṣetramagnervidhīyate

prākṛtaṃ vaikṛtaṃ vāpi kṣetramardhāṣṭamāntare pañcaviṃśaṃ śiraḥ kṛtvā tataḥ kṣetre samāvapet

śatānyaṣṭau padonāni padānāmiha kīrtyante sāṅgasya saśiraskasya kṣetraṃ kṣetravido viduḥ

ātmā catuḥśataḥ kāryaḥ pakṣau triṃśacchatau smṛtau daśa pucche śataṃ caiva śiraḥ syāt pañcaviṃśakam

ekatriṃśastrayastriṃśairvargaiḥ pañcāśakairapi asaṃbhavatsu vargeṣu dvidhā bhidyeta iṣṭakā

iṣṭakāhrāsavṛddhibhyāṃ dṛḍhāsu śatakeṣu ca matimāniṣṭakā bhāgairmantrātsaṃnāśayediti

caturaśre pṛṣṭau vāpi pakṣapucchaśireṣṭakāḥ dikto'padhānaṃ lokācca tathā lokastu lupyate

adhyātmani ha vijñeyamupadhānaṃ vijānatā rathantarabṛhallokairanyaṃ gāyatrayājñiyaiḥ

yajuṣmatīnāṃ saṃkhyā tu sarvāsāṃ caiva niścitā ekaikasyāṃ citau vāpi tāṃ me nigadataḥ śṛṇu

ṣaḍaśītiḥ śataṃ tvādyā dvitīyā daśa saptatiḥ trayodaśa tṛtīyā syācchataṃ cāhurmanīṣiṇaḥ caturthī śatamekā syāttisraścaiveṣṭakāḥ smṛtāḥ śatāni trīṇi pañcāśatṣaṭcaiva citiruttamā

etāḥ sarvā yajuṣmatyo yābhiragniḥ prasūryate śeṣaṃ lokaṃpṛṇābhistu citīnāmabhipūrayet

etāḥ sarvā samāmnātāḥ yajuryāvatpravartate tadetaddhi sahasraṃ syāccharkarābhiḥ sahocyate

etā upahitāḥ samyagdhenavastu prajāyante amuṣminyajamānāya kāmānduhyati sarvaśaḥ

ṣaṣṭiṃ prajāpatiṃ veda yo hi saṃvatsaraḥ smṛtaḥ gacchati brahmaṇo lokaṃ nākaṃ bradhnasya viṣṭapam

vaiṣṇave yā prameyāya śulbavidbhiśca sarvaśaḥ saṃkhyātṛbhyaḥ pravaktṛbhyo namo bharanto yo mase idaṃ bhūmya bhajāmahe yā no mānakṛtāmiva yajñiyaṃ mānamuttamaṃ vardhamānaṃ sve dame

spaṣṭā bhūmiṛjuḥ śaṅkurmauñjaṃ śulbamabandhuram citrādau nākṛtiḥ kāryā tithyṛkṣaṃ varuṇaśubham

sarvāḥ prāgāyatā vedyaḥ karaṇaṃ yaskadehikam ardhenārvasamaṃ sarvamucchedo jānu pañcakam

madhyame'rdhamṛtavyānāṃ nākasatpañcacūḍayoḥ karaṇādyarthamuddiśya kṣetramardhāṣṭamāntaraḥ

anaḥsiddhaṃ havirdhānaṃ pātrasiddhāḥ kharāḥ kharāḥ cātvālaḥ paśubhiḥ siddho havirbhiḥ sāgnikāḥ kharāḥ

maṇḍalārdhaṃ catuḥsrakti ratnināṃ vihitāḥ kharāḥ aratnirghana eteṣāṃ bhūyastve bhūyasībidhau

pūrvaścaturviṃśatibhāge lekhyaścaturvaṃśairālikhitastu paścimaḥ syāddakṣiṇe'ṣṭadviguṇena lekhyastriṃśadbhirāyamya haretturāyam

udakprakramya cātvālaṃ śāmitraṃ prakrame tataḥ bhūyastatpaśubhūyastve vṛddhiruttarato bhavet

āyāmabāhuṃ nikṣipya vistarastu tathā pṛthak so'dhyardhaṃ guṇayedrāśiṃ sa sarvaguṇito ghanaḥ

āyāmamāyāmaguṇaṃ vistāraṃ vistareṇa tu samasya vargamūlaṃ yattatkarṇaṃ tadvido viduḥ

śravaṇābhijitorbahulātiṣyayorvā citrāsvātyorantare'psvagninā vā

naktaṃ prācībhāskaraśrāyamāhuḥ / śaṅkulipte maṇḍale prākparākceti

janmanā rogahīno vā yajamāno bhavedyadi kathaṃ tatra pramāṇāni prayoktavyāni kartṛbhiḥ

yadyurutantuḥ keśovāstṛtaḥ sarṣapo yavaścaiva ṣaḍguṇitaḥ ṣaḍguṇito bhavati narasyāṅgulaṃ māne taddvādaśakaṃ prādeśamityāhuḥ

taddvayaṃ smṛto'ratniḥ prakramo'ratnisamaḥ sa dviḥprādeśo bhaveccitiṣu

adhyardhāṅgulahīnāścatvāraḥ prakramā bhavenniyatāḥ

tatraikādaśa yūpāścatvāraścaturuttarāḥ sattresattre

ekasyāṃ vedyāmagnidvayamiṣṭakāriktaṃ bhavati pṛthagato vediḥ cetpṛthagagniḥ kḷptaḥ

viṃśatyaṅgulaḥ śataṃ niyataḥ pañcāratnirnaro daśapado vā / hīnātiriktayuktyā dehedehe pramāṇaṃ tu

ṣaḍaśītiryugamuktaṃ sāṣṭādaśa ucyate tvakṣastantrasamasamastaṃ dvyujaṃ rathamīṣāṃ vyavāsyanti

maṇḍalamatha caturaśraṃ maṇḍalaṃ ca yaḥ kurjāttasyemaṃ karaṇavidhiṃ tadvidāmudāhṛtaṃ śṛṇuta

maṇḍalaviṣkambhārdhasamastribhujādavalambakaścatuḥsraktiḥ prāgāyatāttribhāgātkarṇāt sa maṇḍalaṃ bhavati

puruṣaḥ puruṣaṃ kuryāttasyākṣṇayā dvipuruṣaṃ bhaveccaturastasyāpyakṣṇayā dvābhyāṃ vā syāścatuḥpuruṣam

dvipuruṣaḥ karaṇī śroṇī bāhustu dviguṇo bhavettriṃkuṣṭhavattryavalambakastato yaścaturaśre dvāṣṭamāḥ puruṣāḥ

viṣkambhaḥ pañcabhāgaśca viṣkambhastriguṇaśca yaḥ sa maṇḍalaparikṣepo na vālamatiricyate

daśadhā chidya viṣkambhaṃ tribhāgānuddharettataḥ tena yaccaturaśraṃ syānmaṇḍale tadapaprathiḥ

caturaśraṃ navadhā kuryāddhanuḥkoṭyastridhātridhā utsedhātpañcamaṃ lumpetpurīṣeṇeha tāvatsamaṃ

caturaratnirvā naraḥ sikatākaraṇe tvardhaṃ bhujaḥ pradiśyate

karaṇāni tato'syāḥ kārayettricatuḥpañcatrirabhiparyasya yacchubhaṃ cayaneṣu vidhiḥ purātanairṛṣibhiryo'bhihitaśca nityaśaḥ

parilekhanamānasaṃcayairvyatyāsyaiḥ parimāṇasaṃpadā vedyaḥ sarvāḥ pramāṇairāyāmena ca vistareṇa ca mimīyāt

caturaśrasaṃpadādvyāyāmasamāpanāḥ smṛtā pañcāṅgyātha vā purātanairyāḥ pūrvairṛṣibhiḥ pradarśitāḥ

yaścaiṣa vidhirmaryākṛtastatraiṣā mithunātsamaṃ pañcāṅgī tāvatī rajjuryayā sarvaṃ mimīmahe ṛte kaṅkālajaśyenāṃ steṣāṃ vakṣyāmi lakṣaṇam

iyaṃ mitā yā samayārdhalakṣaṇā tataścaturthe bhavennirāñchanaṃ tato'rdhaśiṣṭā vistārasamā cayasya / yattataścatuḥkuṣṭhamihānayā caret

prācītathāyāmasamā nidadhyātpāśau nikhanyādatha madhyaṃ ca

unmucya paścādatha madhyame tatprāgdakṣiṇāyamya nirāñchanena vistārato'rdhe nikhaneta śaṅkum / pratyaktathottaramadhyame ca / sa vāsuvedīṣu

atha mānametacchroṇyāṃ tu pāśoddharaṇaṃ kriyeta

aṃsaśroṇyorlikhet dikṣu lekhāḥ / śaṅkū nihanyātsamareṣu teṣu / tebhyaḥ samantātparilekhayet

yadyaiṣṭikā nobhau likheta śiṣṭau

pūrve tribhāge tvapare ca siddhopasthitāvutkaradakṣiṇāgnī

athānyadasya parilekhanaṃ tu madhye bhaveddikṣu navāṅguleneti

pramāṇārdhaṃ tu ṣaṣṭayūnaṃ viśeṣa iti saṅjñitam viśeṣaśca pramāṇaṃ ca pramāṇasyākṣṇayā bhavet

pramāṇārdhamanyatsyāt pāśaṣaṣṭhe sacaturviṃśe lakṣaṇaṃ karoti tannirāñchanamakṣṇayā tiryaṅmānī śeṣaḥ pāśādardhaśaye śroṇī dva

cāgnīdhramihopadiśyate

agneryadakṣṇayāmānaṃ tasya caiva tadakṣṇayā tadāśvamedhikaṃ vidyādekaviṃśadvidhau'thavā

puruṣastiryagbhavedyadanudaśadhā yo mitaḥ tasya karṇena yatkṣetraṃ vidyādekādaśaṃ tu tat

ubhau bāhū naśakṣṇāṃ tu narastiryaktadakṣṇayā ekoccatānaikaśatādbāhuvṛddhayā vivardhayet

avalambakakuṣṭhe tu yo bhavetṣoḍaśāṅgule sautrāmaṇyā bhavedeṣa prakramo mānakarmaṇi

prakramasya tṛtīyena saumikī sārparājñikī saṃtṛtīyaistribhiścānyaiḥ siddhamauttaravedikam

caturdaśāṅgulo vā syātprakramastena saumikī śatairdvādaśabhirvāpi minuyātpāśukāmiva

sacaturthe vanaṃ ṣaḍbhirnavabhirvātha saptabhiḥ navabhirvāparaṃ cakraṃ karaṇādhe na lekhayet

caturṣu nivapedeṣāṃ sāvitrādiṣu yo vidhiḥ aruṇe jānudaghne nikhanyādadbhistu pūrayet

caturaśramathāpi maṇḍalaṃ dvividhaṃ gārhapatyalakṣaṇaṃ vyāyāmamitaṃ caturbhujaṃ puruṣārdhena tu maṇḍalaṃ parilikhet

vyāyāmatṛtīyamāyāntaṃ caturaśraṃ saptamabhāgavistṛtaṃ prāgācitamuttarācitaṃ vyatyāse tadathaikaviṃśakam

puruṣasya tṛtīyamāyāntaṃ caturaśraṃ ṣaḍbhāgavistṛtam / prathikaśca tadāyato bhavenmadhye tena samāyato bhavenmadhye tena samāstike śeṣau / koṇau prathikamitau samau tadvistārakṛtau viśākhaḥ

ṣaḍbhāgakṛtāyāmo bhaveddvyardhe tu trikoṇasaṃsthite

caturaśravipāṇakaḥ prathiko'rdhaṃ prathikaśca yo mitaḥ

karaṇāni bhavanti maṇḍale catvāri pramitāni bhāgaśaḥ

madhye'sya catasra iṣṭakāḥ tatpūrvāparayordvayordvayam / prathiko'rdha viṣāṇikadvayaṃ punareva punaraiti maṇḍalamardhaprathikadvaye samaṃ saṃpūrṇam / tadathaikaviṃśakam

vyatyāsamudaṅmukhena saha vyatyasyedvetyuttarottaram

adhyardhaṃ padyaṃ ca padyārdhapadyapādavatpadyārdhotsedhamityāhurgāyatre karaṇāni ca

caturguṇāṃ dvipuruṣāṃ rajjuṃ kṛtvā samāhitām / saṃbhāgajñātṛtodāntāṃ pañcāṅgīṃ tadvido viduḥ

madhyamātpāśayostodo gāyatramānamucyate / sāratnāvardhapuruṣe / catu raśrastayā mitaḥ / pakṣapucchāntayorvṛddhyā gāyatreṇetareṣubhiḥ

iṣṭakā śoṣapākābhyāṃ triṃśanmānāttu hīyate

tataḥ kṣetraṃ tricaturbhāgaṃ niruhyādāpayecchivam

aṃsa uttareṃ'se ca prācyo'dhyardhāstu viṃśatirdaśa pucche dvirdvādaśakau pakṣayorabhitaḥ pucche tu pañca deyāḥ pañca prācīḥ pañcadaśa dadyācchirasi / caturaśītī pakṣayoḥ pañcāśataṃ triṃśatamātmani padyā bhavanti śatamekonaṃ puccheṃ'saśroṇyorviṃśatirviṃśatiḥ pucche pakṣayordaśadaśāhuḥ

adhyardhā daśa śirasi prācyudīcyo bhavanti

pūrvopahitā prathamā padayujaḥ sarvā / dvitīyāvāgyujo'śvinī

vyatyāsaṃ cinuyādevaṃ jānunāsya vartmasu

tripadā alpakṣetrā ekacitikāścatuḥ karaṇayuktāḥ dhiṣṇyā bhavanti sāgnicityamantrāḥ sātiriktāśca

adhyardhāstu catasro dve madhye nakulaścaturbhāgaḥ

aśmā navamo'gnīdhre

hotrīyamataḥ saṃvakṣyāmo / aṃsaśroṇyoḥ padyāśrayā nakulakā bahistisṛṣu dikṣvantaścaturdaśa padakacaturthāḥ sa yaḥ pratidiśamaṣṭau padyā dikṣu vidikṣu

brāhmaṇācchaṃsye daśa caikā syurmadhye dvau dvau caturthyau nakulaśca

abhitastisraḥ padyā dve madhye'dhyardhe śiṣṭeṣvaṣṭau

adhyardhāḥ ṣaṇmārjālīyeṃ'sa mārjālīyaṃ syāddakṣiṇapārśvena śāmitraṃ cātvālasya ca paścād vabhṛthakalpe'pyevaṃ padamekatastripadastisro'tirikteṣviti

saptatriṃśatsārdhāḥ pakṣaḥ savyaśca śirasi catvāraḥ ṣaḍviṃśakastathātma śyene pañcadaśakaṃ puccham / saptadaśakaṃ pucchaṃ dvayaṃ śirasyātmapakṣayoḥ kḷptamalajasya / bhāgasaṃdhāntayajñaiḥ pramitānnaracaturthe

aṣṭau bhāgāḥ pucchaṃ kaṅkacite bhavanti pādayoścaturaḥ śirasi tu sapta jñeyāḥ śyenavadātmā ca pakṣau ca

śyenālajakaṅkānāmaṣṭau sārdhā vistṛtaṃ pucchaṃ catvārotmā dvau ca śiraḥ sarveṣāṃ pañcakau pakṣau

śyenālajakaṅkānāṃ dvitricatuḥ kuṣṭhamityucyate puccham / pañcākṣṇāḥ pakṣapātrāstvakṣṇābhiḥ pariśritāḥ

pucche dvau bhāgāvānayetpucchamalajena trikuṣṭhavattrīnśyenapucchācchirasi kaṅke pādau tu haret

prācīrdvādaśa sārdhā viṃśatirudīcīrbhavenmitā bhāgā / daśa pañca kaṅkacitāvalaja udīcīstrayodaśa sārdhāśca

tricaturbhāgamānī syādrajjurardhatrayodaśī madhye ca lakṣaṇaṃ tasyāścaturbhāgairnirāñchanam

bhāgikāścatvārastodā ardhaṣaṣṭhe'paraḥ smṛtaḥ ardhāśca me'ṣṭame caiva navame daśame'paraḥ ardhadvādaśo vānyaḥ

tataḥ prācīḥ prasārya tu tasyā nikhānayecchaṅkum / pāśayormadhyame'ṣṭame / caturthe vāhatya pāśam / āsajya madhyame nirāñchanam

nirāyamya vinudyonmucya madhyamāt / abhito daśama āyamya bhāgā dvikacatuṣkāḥ / ardhaṣaṣṭhe'pi cāhatya pūrvādevaṃ samācaret / tulyaṃ śaṅkuṃ turye

tataḥ prācīḥ prasārya tu ardhaṣaṣṭhakayoḥ pāśau / śaṅkū ardhāṣṭame'ṣṭame / pragṛhya paścimaśaṅkū / dvikayorvotsṛjettataḥ

caturthanavamau śaṅkū pravṛhedantimāvubhau

aṣṭame pāśamāsṛjya aṣṭamenaiva nigrahaḥ / bhāgebhāge tataḥ śaṅkū tayoḥ

aṣṭame pāśamāsṛjya ādiśaṅkau nigṛhya ca daśame śaṅkumāhanyātpucchārdhe alajasya tu

syārdhāṣṭame śaṅkuḥ kaṅkasya darśane smṛtaḥ

trike pāśaṃ samāsṛjya daśakena nigṛhya ca etābhyāmeva todābhyāṃ śaṅkū deyau tathottarau

ardhadvādaśame pāśastriko nigrahaṇo bhavet ādipāśe dvike caiva śaṅkū deyau tathottarau

uttare dvikamāsajya dakṣiṇaṃ samayorharet

caturthe śaṅkumāhanyādviparītaṃ samācaret caturthe tu tadarthena nirgṛhya ca

iti śyenasya rajjurdvādaśalakṣaṇā

catvāri karaṇānyeṣāṃ tricaturthena kārayet navabhāgā akṣṇārdhākṣṇāḥ pañcakoṇāḥ ca bhāgaśaḥ

prācīne pañcakoṇe dve athārdhākṣṇādvayaṃ nyaset aṃsāgrayorathaikaikā evaṃ pakṣavipakṣayoḥ

navabhāgaiścitaṃ madhyamakṣṇābhiḥ pariṣiñcate pakṣāgre pañca patrāṇyevaṃ cākṣṇā vidhīyate

vyatyāsākṣṇādvayaṃ tunde pañcakoṇe pratyaksthite ardhākṣṇe kaṇṭhasaṃdhyośca pūrayedamitaṃ śiraḥ

dve pakṣasaṃdhyorardhākṣṇe pucchasaṃdhyostathāpare daśa pañca ca pucchāgre pakṣāgra ekaviṃśatim

aupamāne cayane caiṣāṃ vyatyāse karaṇeṣu ca rajjvāścāvapanaṃ hrāso śyenasiddhiriti sthitiḥ

avakrapakṣamalajaṃ ca pūrvapakṣe tathāyutam madhyāt prasiddhaṃ pucchaṃ śyene dāmnā prasidhyata iti

navamātprāgbhāge śaṅkū turīyasya karaṇam alaje pakṣārdhamavakratāddhyevaṃ bhavet

puruṣasya tṛtīyapañcamau bhāgau tatkaraṇaṃ punaściteḥ tasyārdhamathāparaṃ bhavettricitikamagnicitiścet

aṣṭāvaṣṭau raṃmitā citiraṣṭaikādaśikā ca madhyamā vyatyāsavatīrupanya sedaṣṭau dvādaśa cottamā citiḥ

pañcadaśanaraṃ kṣetraṃ praugacittatastvardham madhyāddaśake trikuṣṭhametattathā karaṇam

bāhvorekaviṃśa ubhakaraṇe tathārdho'nyaśca aṃsaśroṇyośchedastasyobhayato bhavet praugaḥ

cātvālebhyaścaturbhyastu samūhyo'gniraniṣṭakaḥ digbhyaḥ purīṣaiḥ samūhyo bhāgaśo yuktito vidhiḥ

maṇḍalacaturaśro'dya parivāryaḥ śmaśānacit droṇacittsarumāneṣāṃ daśabhāgo bhavettsaruḥ

maṇḍale caturaśraṃ tu kuryādgārhapatyavat bāhvorviṃśatibhāgena vāruṇaṃ sārdhameva tu

prasiddhaṃ daśadhā kuryādbahirantaśca yuktitaḥ trikuṣṭhaśca viṣāṇaḥ syātsaṃdhau vyatyāsa eva saḥ

caturaśrasya karaṇaṃ bāhvordvātriṃśadbhāgikam caturaśramathādhyardhaṃ tābhyāṃ gāyatravadvidhiḥ

sāhasrasya karaṇaṃ bāhvoḥ pañcadaśabhāgaṃ caturaśram adhyardhāstu tataḥ syurdviśatāścitayaḥ smṛtāḥ

pañca pañcāśatamadhyardhāstisraḥ pañcāśataṃ caturaśrāḥ sahasrācchataṃ pakṣāḥ syuruṣā sahasratamī

bāhvorekatriṃśo bhāgaḥ karaṇaṃ citistathottarayoḥ caturasrānāṃ sāhasraṃ savanike vyavāsyanti

ardhaikādaśapuruṣaṃ ghanaṃ bhavedbhavenmaṇḍalaṃ rathacakram / nābhirarā vivaradhā nemirarebhyo yadyatiriktam

tadardhāḥ puruṣāyāmāḥ puruṣāṣṭabhāgavistṛtāḥ caturviṃśatistrinaranāyāḥ

vivarakaraṇamataḥ saṃpravakṣyāmi / dvisaptamena nemyasrakaraṇaṃ bhavedarasyāṣṭabhāgena vaikṛtaścaturviṃśatibhāgena nābhyāmantaramantaro'ṣṭamabhāgena praugavadbhavet

dvīṣṭakāṃ cinuyānnābhiṃ caturbhiścinuyādarān tribhirnemiṃ yathābhāgaṃ vyatyāsaḥ kūpavat smṛtaḥ

viṣkambhasya caturthena nābhyāstu vivaraṃ likhet tricatvāriṃśāṅgulāṃ nemiṃ sārdhacaturaṅgulām

siddhamanyadyathā yuktiścayane yāśca saṃpadaḥ

ya idamapi yathātathaṃ smṛtiṃ vidhiṃ yadādhītya mimīte rauravaṃ samavati khalu kṛtsnasaṃmato brajati ca śulbakṛtāṃ salokatām

rathacakrasya cityasya saṃkṣepoktasya viṣṇunā atha dhāturnirviṣṭhasya triguṇānyaṃ bahirbahiḥ līyante maṇḍale yasya sapta sārdhā narā budhaiḥ

mucyante vivareṣvanye kṣetrādabhyadhikāstrayaḥ

tasya cakravidhānaṃ tu nemirarebhyo vistaraḥ maṇḍalānāṃ ca viṣkambhaḥ tribhāgaḥ karaṇāni ca

narārdhenābhilikhennābhistataḥ prastāragocarā arebhyo'bhyadhikā nemistriṣaṣṭhenākṣarāgāram triṃśatena saviṃśena adhikaiścārdhapañcamaiḥ mimāyāṅgulairvā madhyaṃ kuryādviṃśena parilekhanam

prathame prastare rathacakrasya sṛṇuteṣṭakāḥ caturbhiradhikaṃ vettha catvāriṃśacchatatrayam

dvitīye'bhyadhikā yāntu caturviṃśatiriṣṭakāḥ pañcakoṇāstrikoṇāśca nemyarebhyaḥ ca saṃdhiṣu

iṣṭakānāṃ sahasreṇa śataiḥ saptabhireva ca aṣṭaṣaṣṭyā ca cakrasya citayaḥ pañca pūritāḥ

iti śulbasūtraṃ samāptam

srotam
[http://vedicreserve.mum.edu/kalpa/shulba/manava_shulba_sutra.pdf mānavaśulbasūtram] (pītara pheṇḍa)