Scripture Library

Mānavagṛhyasūtra · Chapter 2.9

2.9.1

iti dvitīyapuruṣe 'ṣṭamaḥ khaṇḍaḥ //8//
navamaḥ khaṇḍaḥ
uttamāyāḥ pradoṣe catuṣpathe 'ṅgaśo gāṃ kārayet

2.9.2

yo ya āgacchettasmai tasmai dadyāt

2.9.3

śvo 'nyāṃ kārayet

2.9.4

tasyāvapāṃ juhuyāt--
vaha vapāṃ jātavedaḥ pitṛbhyo yatraitānvettha nihitānparāke medaso ghṛtasya kulyā abhiniḥsravantu satyāḥ santu yajamānasya kāmāḥ svāhā /
iti

2.9.5

athāsyā vakṣasā udagodanaṃ śrapayati

2.9.6

tasyāṣṭakāhomakalpena śeṣo vyākhyātaḥ

2.9.7

avaśiṣṭaṃ bhaktaṃ randhayati

2.9.8

śvo 'vaśiṣṭaṃ bhaktaṃ randhayitvā piṇḍānāmāvṛtā trīnmāṃsaudanapiṇḍānnidadhāti

2.9.9

śrāddhamaparapakṣe pitṛbhyo dadyāt

2.9.10

anuguptamannaṃ brāhmaṇān bhojayen nāvedavidbhuñjīteti śrutiḥ

2.9.11

yadi gavā paśunā vā kurvīta prokṣaṇamupapāyanaṃ paryagnikaraṇamulmukaharaṇaṃ vapāhomamiti

2.9.12

traidhaṃ vapāṃ juhuyāt sthālīpākamavadānāni ca

2.9.13

somāya pitṛmate svadhā nama iti
juhoti yamāyāṅgirasvate pitṛmate svadhā nama iti dvitīyām /
agnaye kāvyavāhanāya svadhā nama iti tṛtīyām

2.9.14

evaṃ māsi māsi niyataṃ tantraṃ piṇḍapitṛyajñe

Original text: Mānavagṛhyasūtra (= Maitrāyaṇīyamānavagṛhyasūtra) · Edition: Ramakrishna Harshaji Sastri: Mānavagṛhyasūtra of the Mitrāyaṇīya Śākhā, Baroda : Central Library 1926 (Gaekwad's Oriental Series, 35) · Data entry members of the Sansknet Project · GRETIL (Göttingen) · CC BY-NC-SA 4.0