mahāvākyopaniṣat · Chapter 1

mahāvākyopaniṣat
yanmahāvākyasiddhāntamahāvidyākalevaram /
vikalevarakaivalyaṃ rāmacandrapadaṃ bhaje //
ॐ bhadraṃ karṇebhiḥ śruṇuyāma devāḥ
bhadraṃ paśyemākṣabhiryajatrāḥ /
sthirairaṅgaistuṣṭuvāsastanūbhiḥ
vyaśema devahitaṃ yadāyuḥ //
ॐ śāntiḥ śāntiḥ śāntiḥ //
hariḥ ॐ //
atha hovāca bhagavānbrahmāparokṣānubhavaparopaniṣadaṃ
vyākhyāsyāmaḥ / guhyādguhyaparameṣā na prākṛtāyopadeṣṭavyā /
sātvikāyāntarmukhāya pariśuśrūṣave / atha
saṃsṛtibandhamokṣayorvidyāvidye cakṣuṣī upasaṃhṛtya
vijñāyāvidyālokāṇḍastamodṛk / tamo hi
śārīraprapañcamābrahmasthāvarāntamanantākhilājāṇḍabhūtam /
nikhilanigamoditasakāmakarmavyavahāro lokaḥ /
naiṣo'ndhakāro'yamātmā /vidyā hi kāṇḍāntarādityo
jyotirmaṇḍalaṃ grāhyaṃ nāparam / asāvādityo brahmetyajapayopahitaṃ
haṃsaḥ so'ham / prāṇāpānābhyāṃ pratilomānulomābhyāṃ
samupalabhyaivaṃ sā ciraṃ labdhvā trivṛdātmani
brahmaṇyabhidhyāyamāne saccidānandaḥ paramātmāvirbhavati /
sahasrabhānumacchuritāpūritatvādalipyā pārāvārapūra iva /
naiṣā samādhiḥ / naiṣā yogasiddhiḥ / naiṣā manolayaḥ /
brahmaikyaṃ tat / ādityavarṇaṃ tamasastu pāre /
sarvāṇi rūpāṇi vicitya dhīraḥ / nāmāni kṛtvā'bhivadanyadāste /
dhātā purastādyamudājahāra / śakraḥ pravidvānpradiśaścatasraḥ /
tameva vidvānamṛta iha bhavati / nānyaḥ panthā ayanāya vidyate /
yajñena yajñamayajanta devāḥ / tāni dharmāṇi prathamānyāsan /
te ha nākaṃ mahimānaḥ sacante / yatra pūrve sādhyāḥ santi devāḥ /
so'hamarkaḥ paraṃ jyotirarkajyotirahaṃ śivaḥ /
ātmajyotirahaṃ śukraḥ sarvajyotirasāvadom /
ya etadatharvaśiro'dhīte / prātaradhīyāno rātrikṛtaṃ
pāpaṃ nāśayati / sāyamadhīyāno divasakṛtaṃ pāpaṃ nāśayati /
tatsāyaṃ prātaḥ prayuñjānaḥ pāpo'pāpo bhavati /
madhyandinamādityābhimukho'dhīyānaḥ
pañcamahāpātakopapātakātpramucyate /
sarvavedapārāyaṇapuṇyaṃ labhate /
śrīmahāviṣṇusāyujyamavāpnotītyupaniṣat //
ॐ bhadraṃ karṇebhiḥ śruṇuyāma devāḥ
bhadraṃ paśyemākṣabhiryajatrāḥ /
sthirairaṅgaistuṣṭuvāsastanūbhiḥ
vyaśema devahitaṃ yadāyuḥ //
ॐ śāntiḥ śāntiḥ śāntiḥ / hariḥ ॐ tatsat
iti mahāvākyopaniṣatsamāptā //
adhikādhyayanāya