Mahāpratisarāmahāvidyārājñī · Chapter 12
[50] na tasya mṛtyur na jarā na rogo
na cāpriyaṃ nāpi ca viprayogaḥ |
yasyeyaṃ vidyā subhāṣitātmā
bhaviṣyati mṛtyugaṇena pūjitaḥ
yamo 'pi tasya varadharmarājā
kariṣyate pūjāṃ sagauraveṇa |
kathayiṣyate devapuraṃ hi gaccha
kṣaṇikaṃ mamedaṃ narakaṃ kariṣyasi
tato vimānaiś ca bahuprakārair
maharddhiko yāti surālayaṃ śubham |
evaṃ hy asau kiṃnarayakṣarākṣasaiḥ
saṃpūjitas tatra sadā bhaviṣyati
Original text: Mahāpratisarāmahāvidyārājñī · Edition: Gergely Hidas: Mahāpratisarā-Mahāvidyārājñī, The Great Amulet, Great Queen of Spells. Introduction, Critical Editions and Annotated Translation, New Delhi : International Academy of Indian Culture and Aditya Prakashan 2012 (Śata-Piṭaka Series : Indo-Asian Literatures, 636). · Data entry Gergely Hidas · GRETIL (Göttingen) · CC BY-NC-SA 4.0