Mahāparinirvāṇasūtra · Chapter 16

(sa māraḥ pāpīyān yena bhagavāṃs tenopasaṃkrāntaḥ ||) upetya bhagavatpādau śirasā vanditvaikānte 'sthāt || ekāntasthito māra(ḥ pāpīyān bhagavantam idam avocat ||)

(parinirvāhi bhagavan parinirvāṇasamayaḥ sugatasya ||)

(kasmāt tvaṃ pāpīya)nn evaṃ vadasi || parinirvāhi bhagavan parinirvāṇasamayaḥ sugatasya ||

(eko 'yaṃ bhadanta samayaḥ || bhagavān uruvilvāyāṃ viharati nadyā nairañjanāyās tīre bodhimūle 'cirābhisaṃbuddhaḥ ||) so 'haṃ yena bhagavāṃs tenopasaṃkrāntaḥ ||

upetya bhagavantam evaṃ vad(āmi || parinirvāhi bhagavan parinirvāṇasamayaḥ sugatasya ||)

(bhagavān evam āha ||)

(na tāvat pāpīyan parinirvā)sy(ā)mi yāvan na me śrāvakāḥ paṇḍitā bhaviṣyanti vyaktā medhāvinaḥ || alam u(tpannotpannānāṃ parapravādināṃ saha dharmeṇa nigrahītāraḥ || alaṃ svasya vādasya pa)ryavadātāro bhikṣavo bhikṣuṇya upāsakā upāsikā vaistārikaṃ ca me bra(hmacaryaṃ cariṣyanti bahujanyaṃ pṛthubhūtaṃ yāvad devamanuṣyebhyaḥ samyaksaṃpra)kāśitam ||

etarhi bhadanta bhagavataḥ śrāvakāḥ paṇḍitā vyaktā medhāvinaḥ || a(lam utpannotpannānāṃ parapravādināṃ saha dharmeṇa nigrahītāraḥ svasya vādasya pa)ryavadātāro bhikṣavo bhikṣuṇya upāsakā upāsikā vaistārikaṃ ca te brahma(caryaṃ bāhujanyaṃ pṛthubhūtaṃ yāvad devamanuṣyebhyaḥ samyaksaṃprakāśitam ||)

(tasmād aham e)vaṃ vadāmi parinirvāhi bhagavan parinirvāṇasamayaḥ sugatasya ||

alpotsukas tvaṃ pāpīyan bhava na cirasyedānīṃ tathāgatasya trayāṇāṃ māsānām atyayād anupadhiśeṣe ni(r)v(ā)ṇadhātau parin(i)rvāṇaṃ bhaviṣyati ||

atha mārasya pāpīyasa etad abhavat || parinirvāsy(ate) śramaṇo gautama iti viditvā hṛṣṭas tuṣṭa udagraḥ prītisaumanasyajātas tatraivāntarhitaḥ ||

atha bhagavata etad abhavat || yan nv ah(aṃ) tadrūpān ṛddhyabhisaṃskārān abhisa(ṃ)skuryāṃ (ya)thā samāhite citte jīvitasaṃskārān adhiṣṭhāyāyuḥsaṃskārān utsṛjeyam ||

atha bhagavāṃs tadrūpān ṛddhyabhisaṃskārān abhisaṃskaroti yathā samāhite citte jīvita(saṃskārān adhi)ṣṭhāyāyuḥsaṃskārān utsṛjati || samananta(r)ots(ṛ)ṣṭāyuḥsaṃskāreṣv atyarthaṃ tasmin samaye mahāpṛthivīcālaś cābhūd ulkāpā(tā) d(i)śodāhā (antarīkṣe devadun)dubhayo 'bhinadanti ||

atha bhagavāṃs tasmāt samādher vyutthā(ya ta)syā(ṃ) velāyāṃ (gā)thā(ṃ) babhāṣe ||
tulyam atulyaṃ ca saṃbhavaṃ
(bhavasaṃskāram apotsṛjan muniḥ ||
adhyātmarataḥ samāhi)to
h(y abhinat ko)śam ivāṇḍa(saṃbhavaḥ |)