Mahabharata · Chapter 5.63

sadṛśānāṃ manuṣyeṣu sarveṣāṃ tulyajanmanām /
kathamekāntatasteṣāṃ pārthānāṃ manyase jayam //

vayaṃ ca te'pi tulyā vai vīryeṇa ca parākramaiḥ /
samena vayasā caiva prātibhena śrutena ca //

astreṇa yodhayugyā ca śīghratve kauśale tathā /
sarve sma samajātīyāḥ sarve mānuṣayonayaḥ //

pitāmaha vijānīṣe pārtheṣu vijayaṃ katham /
nāhaṃ bhavati na droṇe na kṛpe na ca bāhlike //

anyeṣu ca narendreṣu parākramya samārabhe /
ahaṃ vaikartanaḥ karṇo bhrātā duḥśāsanaśca me //

pāṇḍavānsamare pañca haniṣyāmaḥ śitaiḥ śaraiḥ /
tato rājanmahāyajñairvividhairbhūridakṣiṇaiḥ //

brāhmaṇāṃstarpayiṣyāmi gobhiraśvairdhanena ca . yadā parikariṣyanti aiṇeyāniva tantunā /
ataritrāniva jale bāhubhirmāmakā raṇe //

paśyantaste parāṃstatra rathanāgasamākulān /
tadā darpaṃ vimokṣyanti pāṇḍavāḥ sa ca keśavaḥ //

sukhānyavāpya sahitāḥ kṛtvā karma sudustaram /
visrabdhāstu bhaviṣyāmaḥ prāpte kāle gatajvarāḥ //
vaiśampāyana uvāca /

athābravīnmahārājo dhṛtarāṣṭraḥ sudurmanāḥ /
viduraṃ viduṣāṃ śreṣṭhaṃ sarvapārthivasannidhau //
dhṛtarāṣṭra uvāca /

mohito mṛtyupāśena kālasya vaśamāgataḥ / tāta karṇena sahitaḥ putro duryodhano mama //
vidura uvāca /

iha niḥśreyasaṃ prāhurvṛddhā niścitadarśinaḥ /
brāhmaṇasya viśeṣeṇa damo dharmaḥ sanātanaḥ //

tasya dānaṃ kṣamā siddhiryathāvadupapadyate /
damo dānaṃ tapo jñānamadhītaṃ cānuvartate //

damastejo vardhayati pavitraṃ dama uttamam /
vipāpmā vṛddhatejāstu puruṣo vindate mahat //

kravyādbhya iva bhūtānāmadāntebhyaḥ sadā bhayam /
yeṣāṃ ca pratiṣedhārthaṃ kṣatraṃ sṛṣṭaṃ svayambhuvā //

āśrameṣu caturṣvāhurdamamevottamaṃ vratam /
tasya liṅgaṃ pravakṣyāmi yeṣāṃ samudayo damaḥ //

kṣamā dhṛtirahiṃsā ca samatā satyamārjavam /
indriyābhijayo dhairyaṃ mārdavaṃ hrīracāpalam //

akārpaṇyamasaṃrambhaḥ santoṣaṃ śraddadhānatā /
etāni yasya rājendra sa dāntaḥ puruṣaḥ smṛtaḥ //

kāmo lobhaśca darpaśca manyurnidrā vikatthanam / māna īrṣyāṃ ca śokaśca naitaddānto niṣevate /
ajihmamaśaṭhaṃ śuddhametaddāntasya lakṣaṇam //

alolupastathā'lpepsuḥ kāmānāmavicintitā /
samudrakalpaḥ paruṣaḥ sa dāntaḥ parikīrtitaḥ //

suvṛttaḥ śīlasampannaḥ prasannātmā'tmavidbudhaḥ /
prāpyeha loke sammānaṃ sugatiṃ pretya gacchati //

abhayaṃ yasya bhūtebhyaḥ sarveṣāmabhayaṃ yataḥ /
sa vai pariṇataprajñaḥ prakhyāto manujottamaḥ //

sarvabhūtahito maitrastasmānnodvijate janaḥ /
samudra iva gambhīraḥ prajñātṛptaḥ praśāmyati //

karmaṇā'caritaṃ pūrvaṃ sadbhirācaritaṃ ca yat /
tadevāsthāya modante dāntāḥ śamaparāyaṇāḥ //

naiṣkarmyaṃ vā samāsthāya jñānatṛpto jitendriyaḥ /
kālākāṅkṣī caram̐lloke brahmabhūyāya kalpate //

śakunīnāmivākāśe padaṃ naivopalabhyate /
evaṃ prajñānatṛptasya munervartma na dṛśyate //

utsṛjyaiva gṛhānyastu mokṣamevābhimanyate /
lokāstejomayāstasya kalpante śāśvatā divi //