Mahabharata · Chapter 5.111

yasmāduttāryate pāpādyasmānniśreyaso'śrute /
asmāduttāraṇabalāduttaretyucyate dvija // 1 //

uttarasya hiraṇyasya parivāpasya gālava /
mārgaḥ paścimapūrvābhyāṃ digbhyāṃ vai madhyamaḥ smṛtaḥ //

asyāṃ diśi variṣṭhāyāmuttarāyāṃ dvijarṣabha /
nāsaumyo nāvidheyātmā nādharmo vasate janaḥ //

atra nārāyaṇaḥ kṛṣṇo jiṣṇuścaiva narottamaḥ /
badaryāmāśramapade tathā brahmā ca śāśvataḥ //

atra vai himavatpṛṣṭhe nityamāste maheśvaraḥ /
prakṛtyā puruṣaḥ sārdhaṃ yugāntāgnisamaprabhaḥ //

na sa dṛśyo munigaṇaistathā devaiḥ savāsavaiḥ /
gandharvayakṣasiddhairvā naranārāyaṇādṛte //

atra viṣṇuḥ sahasrākṣaḥ sahasracaraṇo'vyayaḥ . sahasraśirasaḥ śrīmānekaḥ paśyati māyayā //

atra rājyena viprāṇāṃ candramāścābhyaṣicyata /
atra gaṅgāṃ mahādevaḥ patantīṃ gaganāccyutām //

pratigṛhya dadau loke mānuṣe brahmavittama /
atra devyā tapastaptaṃ maheśvaraparīpsayā //

atra kāmaśca roṣaśca śailaścomā ca sambabhuḥ /
atra rākṣasayakṣāṇāṃ gandharvāṇāṃ ca gālava //

ādhipatyena kailāse dhanado'pyabhiṣecitaḥ /
atra caitrarathaṃ ramyamatra vaikhānasāśramaḥ //

atra mandākinī caiva mandaraśca dvijarṣabha /
atra saugandhikavanaṃ nairṛtairabhirakṣyate //

śādvalaṃ kadalīskandhamatra santānakā nagāḥ /
atra saṃyamanityānāṃ siddhānāṃ svairacāriṇām //

vimānānyunurūpāṇi kāmabhogyāni gālava /
atra te ṛṣayaḥ sapta devī cārundhatī tathā //

atra tiṣṭhati vai rātrindivāpyatrāvatiṣṭhate /
atra yajñaṃ samāsādya dhruvaṃ sthātā pitāmahaḥ //

jyotīṃṣi candrasūryau ca parivartanti nityaśaḥ /
atra gaṅgāmahādvāraṃ rakṣanti dvijasattama //

dhāmā nāma mahātmāno munayaḥ satyavādinaḥ /
na teṣāṃ jñāyate mūrtirnākṛtirna tapaścitam //

parivartasahasrāmi kāmabhojyānani gālava . yathāyathā praviśati tasmātparataraṃ naraḥ /

tathātathā dvijaśreṣṭha pravilīyati gālava /
naitatkenacidanyena gatapūrvaṃ dvijarṣabha //

ṛte nārāyaṇaṃ devaṃ naraṃ vā jiṣṇumavyayam /
atra kailāsamityuktaṃ sthānamailavilasya tat //

atra vidyutprabhā nāma jajhire'psaraso daśa /
atra viṣṇupadaṃ nāma kramatā viṣṇunā kṛtam //

trilokavikrame brahmannuttarāṃ diśamāśritam /
atra rājñā marutena yajñeneṣṭaṃ dvijottama //

uśīrabīje viprarṣe yatra jāmbūnadaṃ saraḥ /
jīmūtasyātra viprarṣerupatasthe mahātmanaḥ //

sākṣāddhaimavataḥ puṇyo vimalaḥ kanakākaraḥ /
brāhmaṇeṣu ca yatkṛtsnaṃ svantaṃ kṛtvā dhanaṃ mahat //

vavre dhanaṃ maharṣiḥ sa jaimūtaṃ taddhanaṃ tataḥ /
atra nityaṃ diśāmpālāḥ sāyamprātardvijarṣabha //

kasya kāryaṃ kimiti vai parikrośānti gālava /
evameṣā dvijaśreṣṭha guṇairanyairdiguttarā //

uttareti parikhyātā sarvakarmastu cottarā /
etā vistaraśastāta tava śaṅgīrtitā diśaḥ //

catasraḥ kramayogena kāmāśāṃ gantumicchasi / udyato'haṃ dvijaśreṣṭha tava darśayituṃ diśaḥ /
pṛthivīṃ cākhilāṃ brahmaṃstasmādāroha māṃ dvija //