Mahabharata · Chapter 2.7

śakrasya tu sabhā divyā bhāsvarā karmanirmitā /
svayaṃ śakreṇa kauravya nirjitārkasamaprabhā //

vistīrṇā yojanaśataṃ śatamadhyardhamāyatā / vaihāyasī kāmagamā pañcayojanamucchritā /

jarāśokaklamāpetā nirātaṅkā śivā śubhā /
veśmāsanavatī ramyā divyapādapaśobhitā //

tasyāṃ deveśvaraḥ pārtha sabhāyāṃ paramāsane / āste śacyā mahendrāṇyā śriyā lakṣmyā ca bhārata /

bibhradvapuranirdeśyaṃ kirīṭī lohitāṅgadaḥ /
virajombaraścitramālyo hrīkīrtidyutibhiḥ saha //

tasyāmupāsate nityaṃ mahātmānaṃ śatakratum /
marutaḥ sarvaśo rājansarve ca gṛhamedhinaḥ //

siddhā devarṣayaścaiva sādhyā devagaṇāstathā /
maruttvantaśca sahitā bhāsvanto hemamālinaḥ //

ete sānucarāḥ sarve divyarūpāḥ svalaṅkṛtāḥ /
upāsate mahātmāna devarājamarindamam //

tathā devarṣayaḥ sarve pārte śakramupāsate /
amalā dhūtapāpmāno dīpyamānā ivāgnayaḥ //

tejasvinaḥ somasuto viśokā vigatajvarāḥ /
parāśaraḥ parvataśca tathā sāvarṇigālavau //

ekataśca dvitaścaiva tritaścaiva mahāmatiḥ / śaṅkhaśca likhitaścaiva tathā gauraśirā muniḥ /
durvāsāḥ krodhanaḥ śyenastathā dīrghatamā muniḥ //

pavitrapāṇiḥ sāvarṇiryājñavalkyo'tha bhālukiḥ /
uddālakaḥ śvetaketustāṇḍo bhāṇḍāyanistathā //

haviṣmāṃśca gariṣṭhaśca hariścandraśca pārthivaḥ //
hṛdyaścodaraśāṇḍilyaḥ pārāśaryaḥ kṛṣīvalaḥ //

vātaskandho viśākhaśca vidhātā kāla eva ca /
karāladantastvaṣṭā ca viśvakarmā ca tumburuḥ //

ayonijā yonijāśca vāyubhakṣā hutāśinaḥ /
īśānaṃ sarvalokasya vajriṇaṃ samupāsate //

sahadevaḥ sunīthaśca vālmīkiśca mahātapāḥ /
samīkaḥ satyavākcaiva pracetāḥ satyasaṅgaraḥ //

medhātithirvāmadevaḥ pulastyaḥ pulahaḥ kratuḥ /
maruttaśca marīciśca sthāṇuścātra mahātapāḥ //

kakṣīvāngautamastārkṣyastathā vaiśvānaro muniḥ /
muniḥ kālakavṛkṣīya āśrāvyo'tha hiraṇmayaḥ //

saṃvarto devahavyaśca viṣvaksenaśca vīryavān /
divyā āpastathauṣadhyaḥ śraddhā medhā sarasvatī //

artho dharmaśca kāmaśca vidyutaścaiva pāṇḍava /
jalavāhāstathā meghā vāyavaḥ stanayitnavaḥ //

prācīdigyajñavāhāśca pāvakāḥ saptaviṃśatiḥ /
agnīṣomau tathendrāgnī mitraśca savitā'ryamā //

bhago viśve sādhyāśca guruḥ śukrastathaiva ca /
viśvāvasuścitrasenaḥ sumanastaruṇastathā //

yajñāśca dakṣiṇāścaivaṃ grahāstobhāśca bhārata /
yajñavāhāśca ye mantrāḥ sarve tatra samāsate //

tathaivāpsaraso rājan rambhorvaśyatha menakā /
ghṛtācī pañcacūḍā ca vipracittipurogamāḥ //

vidyādharāśca rājendra gandharvāśca manoramāḥ /
nṛtyavāditragītaiśca hāsyaiśca vividhairapi //

ramayanti sma nṛpate devarājaṃ śatakratum /
stutibhirmaṅgalaiścaiva vastuvantaḥ karmabhistathā //

vikramaiśca mahātmānaṃ balavṛtraniṣūdanam /
brahmarājarṣayaścaiva sarve devarṣayastathā //

vimānairvividhairdivyairdīpyamānā ivāgnayaḥ /
sragviṇo bhūṣitāḥ sarve yānti cāyānti cāpare //

bṛhaspatiśca śukraśca nityamāstāṃ hi tatra vai //
ete cānye ca bahavo mahātmāno yatavratāḥ //

vimānaiścandrasaṅkāśaiḥ somavatpriyadarśanāḥ /
brahmaṇo vacanādrājanbhṛguḥ saptarṣayastathā //

eṣā sabhā mayā rājandṛṣṭā puṣkaramālinī /
śatakratormahābāho yāmyāmapi sabhāṃ śṛṇu //