Mahabharata · Chapter 14.13

na bāhyaṃ dravyamutsṛjya siddhirbhavati bhārata /
śārīraṃ dravyamutsṛjya siddhirbavati vā na vā //

bāhyadravyavimuktasya śārīreṣu ca gṛhyataḥ /
yo dharmo yatsukhaṃ caiva dviṣatāmastu tattava //

dvyakṣarastu bhavenmṛtyustryakṣaraṃ brahma śāśvatam /
mameti dvyakṣaro mṛtyurnamameti ca śāśvatam //

brahmamṛtyū tato rājannātmanyeva vyavasthitau /
adṛśyamānau bhūtāni yodhayetāmasaṃśayam //

avināśo'sya tattvasya niyato yadi bhārata /
bhittvā śarīraṃ bhūtānāmahiṃsāṃ pratipadyate //

labdhvā hi pṛthivīṃ kṛtsnāṃ sahasthāvarajaṅgamām /
mamatvaṃ yasya naiva syātkiṃ tayā sa kariṣyati //

athavā vasataḥ pārtha vane vanyena jīvataḥ /
mamatā yasya vitteṣu mṛtyorāṃsye sa vartate //

brāhyāntarāṇāṃ śatrūṇāṃ svabhāvaṃ paśya bhārata /
yanna paśyati tadbhūtaṃ mucyate sa mahābhayāt //

kāmātmānaṃ na praśaṃsanti loke nehākāmā kācidasti pravṛttiḥ /
sarve kāmā manaso'ṅga prabhūtā yānpaṇḍitaḥ saṃharate vicintya / bhūyobhūyo janmano'bhyāsayogā- dyogī yogaṃ sāramārgaṃ vicintya //

dānaṃ ca vedādhyayanaṃ tapaśca kāmyāni karmāṇi ca vaidikāni /
vrataṃ yajñānniyamāndhyānayogā- nkāmena yo nārabhate viditvā / yadyaccāyaṃ kāmayate sa dhamo nayo dharmo niyamastasya mūlam //

atra gāthāḥ kāmagītāḥ kīrtayanti purāvidaḥ /
śṛṇu saṅkīrtyamānāstā akhilena yudhiṣṭhira //
kāma uvāca /

nāhaṃ śakyo'nupāyena hantuṃ bhūtena kenacit //

yo māṃ prayatate hantuṃ jñātvā praharaṇe balam /
tasya tasminpraharaṇe punaḥ prādurbhavāmyaham //

yo māṃ prayatate hantuṃ yajñairvividhadakṣiṇaiḥ /
jaṅgameṣviva dharmātmā punaḥ prādurbhavāmyaham //

yo māṃ prayatate hantuṃ vedairvedāntasādhanaiḥ /
sthāvareṣviva bhūtātmā tasya prādurbhavāmyaham //

yo māṃ prayatate hantuṃ dhṛtyā satyaparākramaḥ /
bhāvo bhavāmi tasyāhaṃ sa ca māṃ nāvabudhyate //

yo māṃ prayatate hantuṃ tapasā saṃśitavrataḥ /
tataspapasi tasyatha punaḥ prādurbhavāmyaham //

yo māṃ prayatate hantuṃ mokṣamāsthāya paṇḍitaḥ / tasya mokṣaratisthasya nṛtyāmi ca hasāmi ca /
avadhyaḥ sarvabhūtānāmahamekaḥ sanātanaḥ //

tasmāttvamapi taṃ kāmaṃ yajñairvividhadakṣiṇaiḥ /
dharme kuru mahārāja tatra te sa bhaviṣyati //

mā te vyathā'stu nihatānbandhūnvīkṣya punaḥpunaḥ /
na śakyāste punardraṣṭraṃ ye'hatāsminraṇājire //

sa tvamiṣṭvā mahāyajñaiḥ samṛddhairāptadakṣiṇaiḥ /
kīrtiṃ loke parāṃ prāpya gatimagryāṃ gamiṣyasi //