Mahabharata · Chapter 12.375
sa cāmantryoragaśreṣṭhaṃ brāhmaṇaḥ kṛtaniścayaḥ /
dīkṣākāṅkṣī tadā rājaṃścyavanaṃ bhārgavaṃ śritaḥ //
sa tena kṛtasatkāro dharmamevādhitasthivān /
tathaiva ca kathāmetāṃ rājankathitavāṃstadā //
bhārgaveṇāpi rājendra janakasya niveśane /
kathaiṣā kathitā puṇyā nāradāya mahātmane //
nāradenāpi rājendra devendrasya niveśane /
kathitā bharataśreṣṭha pṛṣṭenākliṣṭakarmaṇā //
devarājena ca purā kathitaiṣā kathā śubhā /
samastebhyaḥ praśastebhyo viprebhyo vasudhādhipa //
yadā ca mama rāmeṇa yuddhamāsītsudāruṇam /
vasubhiśca tadā rājankatheyaṃ kathitā mama //
pṛcchamānāya tattvena mayā caivottamā tava /
katheyaṃ kathitā puṇyā dharmyā dharmabhṛtāṃvara //
tadeva paramo dharmo yanmāṃ pṛcchasi bhārata /
āsīddhīro hyanākāṅkṣī dharmārthakaraṇe nṛpa //
sa ca kila kṛtaniścayo dvijo bhujagapatipratidaśitātmakṛtyaḥ /
yamaniyamasaho vanāntaraṃ parigaṇitoñchaśilāśanaḥ praviṣṭaḥ //
śaratalpe mahātmānaṃ śayānamaparājitam / yudhiṣṭhira upāgamya praṇipatyedamabravīt //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0