lakṣmīnārāyaṇastotram · Chapter 1

// lakṣmīnārāyaṇastotram//
śrīnivāsa jagannātha śrīhare bhaktavatsala/
lakṣmīpate namastubhyaṃ trāhi māṃ bhavasāgarāt

rādhāramaṇa goviṃda bhaktakāmaprapūraka
nārāyaṇa namastubhyaṃ trāhi māṃ bhavasāgarāt

dāmodara mahodāra sarvāpattinivāraṇa/
hṛṣīkeśa namastubhyaṃ trāhi māṃ bhavasāgarāt

garuḍadhvaja vaikuṃṭhanivāsinkeśavācyuta/
janārdana namastubhyaṃ trāhi māṃ bhavasāgarāt

śaṃkhacakragadāpadmadhara śrīvatsalāṃchana/
meghaśyāma namastubhyaṃ trāhi māṃ bhavasāgarāt

tvaṃ mātā tvaṃ pitā baṃdhuḥ sadgurustvaṃ dayānidhiḥ/
tvatto%nyo na paro devastrāhi māṃ bhavasāgarāt

na jāne dānadharmādi yogaṃ yāgaṃ tapo japam/
tvaṃ kevalaṃ kuru dayāṃ trāhi māṃ bhavasāgarāt

na matsamo yadyapi pāpakartā na tvatsamo%thāpi hi pāpahartā/
vijñāpitaṃ tvetadaśeṣasākṣin māmuddharārtaṃ patitaṃ tavāgre

// iti śrī. pa. pa. śrīvāsudevānandasarasvatīviracitaṃ śrīlakṣmīnārāyaṇastotram saṃpūrṇam //