kṛṣṇasahasranāmastotram · Chapter 1

śrīnārada uvāca /
kathitaṃ me tvayā deva harināmānukīrtanam /
pāpāpahaṃ mahāsaukhyaṃ bhagavadbhaktikāraṇam

tatrāhaṃ yāni nāmāni kīrtayāmi surottama /
tānyahaṃ jñātumicchāmi sākalyena kutūhalāt

śrīśiva uvāca /
bhūmyambutejasāṃ ye vai paramāṇūnapi dvija /
śakyante gaṇituṃ bhūyo janmabhirna harerguṇān

tathāpi mukhyaṃ vakṣyāmi śrīviṣṇoḥ paramādbhutam /
nāmnāṃ sahasraṃ pārvatyai yadihoktaṃ kṛpālunā

samādhiniṣṭhaṃ māṃ dṛṣṭvā pārvatī varavarṇinī /
apṛcchatparamaṃ devaṃ bhagavantaṃ jagadgurum

tadā tasyai mayā prokto matparo jagadīśvaraḥ /
nāmnāṃ sahasraṃ ca tathā guṇakarmānusārataḥ

tadahaṃ te'bhivakṣyāmi mahābhāgavato bhavān /
yasyaikasmaraṇenaiva pumān siddhimavāpnuyāt

udyannavīnajaladābhamakuṇṭhadhiṣṇyaṃ vidyotitānalamanoharapītavāsam /
bhāsvanmayūkhamukuṭāṅgadahārayuktaṃ kāñcīkalāpavalayāṅgulibhirvibhātam

brahmādidevagaṇavanditapādapadyaṃ śrīsevitaṃ sakalasundarasaṃniveśam /
gogopavanitāmunivṛndajuṣṭaṃ kṛṣṇaṃ purāṇapuruṣaṃ manasā smarāmi

oṃ namo vāsudevāya kṛṣṇāya paramātmane /
praṇatakleśasaṃhartre paramānandadāyine

oṃ śrīkṛṣṇaḥ śrīpatiḥ śrīmān śrīdharaḥ śrīsukhāśrayaḥ /
śrīdātā śrīkaraḥ śrīśaḥ śrīsevyaḥ śrīvibhāvanaḥ

paramātmā paraṃ brahma pareśaḥ parameśvaraḥ /
parānandaḥ paraṃ dhāma paramānandadāyakaḥ

nirālambo nirvikāro nirlepo niravagrahaḥ /
nityānando nityamukto nirīho nispṛhapriyaḥ

priyaṃvadaḥ priyakaraḥ priyadaḥ priyasañjanaḥ /
priyānugaḥ priyālambī priyakīrtiḥ priyātpriyaḥ

mahātyāgī mahābhogī mahāyogī mahātapāḥ /
mahātmā mahatāṃ śreṣṭho mahālokapatirmahān

siddhārthaḥ siddhasaṅkalpaḥ siddhidaḥ siddhasādhanaḥ /
siddheśaḥ siddhamārgāgraḥ siddhalokaikapālakaḥ

iṣṭo viśiṣṭaḥ śiṣṭeṣṭo mahiṣṭho jiṣṇuruttamaḥ /
jyeṣṭhaḥ śreṣṭhaśca sarveṣṭo viṣṇurbhrājiṣṇuravyayaḥ

vibhuḥ śambhuḥ prabhurbhūmā svabhūḥ svānandamūrtimān /
prītimān prītidātā ca prītidaḥ prītivardhanaḥ

yogeśvaro yogagamyo yogīśo yogapāragaḥ /
yogadātā yogapatiryogasiddhividhāyakaḥ

satyavrataḥ satyaparaḥ trisatyaḥ satyakāraṇaḥ /
satyāśrayaḥ satyaharaḥ satpāliḥ satyavardhanaḥ

sarvānandaḥ sarvaharaḥ sarvagaḥ sarvavaśyakṛt /
sarvapātā sarvasukhaḥ sarvaśrutigaṇārṇavaḥ

janārdano jagannātho jagattrātā jagatpitā /
jagatkartā jagaddhartā jagadānandamūrtimān

dharāpatirlokapatiḥ svarpatirjagatāmpatiḥ /
vidyāpatirvittapatiḥ satpatiḥ kamalāpatiḥ

caturātmā caturbāhuścaturvargaphalapradaḥ /
caturvyūhaścaturdhāmā caturyugavidhāyakaḥ

ādidevo devadevo deveśo devadhāraṇaḥ /
devakṛddevabhṛddevo deveḍitapadāmbujaḥ

viśveśvaro viśvarūpī viśvātmā viśvatomukhaḥ /
viśvasūrviśvaphalado viśvago viśvanāyakaḥ

bhūtakṛdbhūtabhṛdbhāvo bhūtātmā bhūtabhāvanaḥ /
bhūtido bhūtivistāro vibhūtirbhūtipālakaḥ

nārāyaṇo nāraśāyī nārasūrnārajīvanaḥ /
nāraikaphalado nāramuktido nāranāyakaḥ

sahasrarūpaḥ sāhasranāmā sāhasravigrahaḥ /
sahasraśīrṣā sāhasrapādākṣibhujaśīrṣavān

padmanābhaḥ padmagarbhaḥ padmī padmanibhekṣaṇaḥ /
padmaśāyī padmamālī padmāṅkitapadadvayaḥ

vīryavān sthairyavān vāgmī śauryavān dhairyavān kṣamī /
dhīmān dharmaparo bhogī bhagavān bhayanāśanaḥ

jayanto vijayo jetā jayado jayavardhanaḥ /
amānī mānado mānyo mahimāvānmahābalaḥ

santuṣṭastoṣado dātā damano dīnavatsalaḥ /
jñānī yaśasvān dhṛtimān saha ojobalāśrayaḥ

hayagrīvo mahātejā mahārṇavavinodakṛt /
madhukaiṭabhavidhvaṃsī vedakṛdvedapālakaḥ

sanatkumāraḥ sanakaḥ sanandaśca sanātanaḥ /
akhaṇḍabrahmavratavānātmā yogavivecakaḥ

śrīnārado devaṛṣiḥ karmākarmapravartakaḥ /
sātvatāgamakṛllokahitāhitaprasūcakaḥ

ādikālo yajñatattvaṃ dhātṛnāsāpuṭodbhavaḥ /
dantāgranyastabhūgolo hiraṇyākṣabalāntakaḥ

pṛthvīpatiḥ śīghravego romāntargatasāgaraḥ /
śvāsāvadhūtahemādriḥ prajāpatipatistutaḥ

ananto dharaṇībhartā pātālatalavāsakṛt /
kāmāgnijavano nāgarājarājo mahādyutiḥ

mahākūrmo viśvakāyaḥ śeṣabhuksarvapālakaḥ /
lokapitṛgaṇādhīśaḥ pitṛstutamahāpadaḥ

kṛpāmayaḥ svayaṃ vyaktirdhruvaprītivivardhanaḥ /
dhruvastutapado viṣṇulokado lokapūjitaḥ

śuklaḥ kardamasantaptastapastoṣitamānasaḥ /
mano'bhīṣṭaprado harṣabindvañcitasarovaraḥ

yajñaḥ suragaṇādhīśo daityadānavaghātakaḥ /
manutrātā lokapālo lokapālakajanmakṛt

kapilākhyaḥ sāṅkhyapātā kardamāṅgasamudbhavaḥ /
sarvasiddhagaṇādhīśo devahūtigatipradaḥ

datto'tritanayo yogī yogamārgapradarśakaḥ /
anasūyānandakaraḥ sarvayogijanastutaḥ

nārāyaṇo naraṛṣirdharmaputro mahāmanāḥ /
maheśaśūladamano maheśaikavarapradaḥ

ākalpāntatapodhīro manmathādimadāpahaḥ /
ūrvaśīsṛgjitānaṅgo mārkaṇḍeyapriyapradaḥ

ṛṣabho nābhisukhado merudevīpriyātmajaḥ /
yogirājadvijasraṣṭā yogacaryāpradarśakaḥ

aṣṭabāhurdakṣayajñapāvano'khilasatkṛtaḥ /
dakṣeśadveṣaśamano dakṣajñānapradāyakaḥ

priyavratakulotpanno gayanāmā mahāyaśāḥ /
udārakarmā bahuvinmahāguṇagaṇārṇavaḥ

haṃsarūpī tattvavaktā guṇāguṇavivecakaḥ /
dhātṛlajjāpraśamano brahmacārijanapriyaḥ

vaiśyaḥ pṛthuḥ pṛthvidogdhā sarvajīvanadohakṛt /
ādirājo janāvāsakārako bhūsamīkaraḥ

praceto'bhiṣṭutapadaḥ śāntamūrtiḥ sudarśanaḥ /
divārātrigaṇādhīśaḥ ketumānajanāśrayaḥ

śrīkāmadevaḥ kamalākāmakelivinodakṛt /
svapādaratido'bhīṣṭasukhado duḥkhanāśanaḥ

vibhurdharmabhṛtāṃ śreṣṭho vedaśīrṣo dvijātmajaḥ /
aṣṭāśītisahasrāṇāṃ munīnāmupadeśadaḥ

satyaseno yakṣarakṣodahano dīnapālakaḥ /
indramitraḥ surārighnaḥ sūnṛtādharmanandanaḥ

harirgajavaratrātā grāhapāśavināśakaḥ /
trikūṭādrivanaślāghī sarvalokahitaiṣaṇaḥ

vaikuṇṭhaśubhrāsukhado vikuṇṭhāsundarīsutaḥ /
ramāpriyakaraḥ śrīmānnijalokapradarśakaḥ

vipraśāpaparīkhinnanirjarārtinivāraṇaḥ /
dugdhābdhimathano vipro virājatanayo'jitaḥ

mandārādridharaḥ kūrmo devadānavaśarmakṛt /
jambūdvīpasamaḥ sraṣṭā pīyūṣotpattikāraṇam

dhanvantarī ruk/gśamano'mṛtadhukrukpraśāntakaḥ /
āyurvedakaro vaidyarājo vidyāpradāyakaḥ

devābhayakaro daityamohinī kāmarūpiṇī /
gīrvāṇāmṛtapo duṣṭadaityadānavavañcakaḥ

mahāmatsyo mahākāyaḥ śalkāntargatasāgaraḥ /
vedāridaityadamano vrīhibījasurakṣakaḥ

pucchāghātabhramatsindhuḥ satyavratapriyapradaḥ /
bhaktasatyavratatrātā yogatrayapradarśakaḥ

narasiṃho lokajihvaḥ śaṅkukarṇo nakhāyudhaḥ /
saṭāvadhūtajalado dantadyutijitaprabhaḥ

hiraṇyakaśipudhvaṃsī bahudānavadarpahā /
prahlādastutapādābjo bhaktasaṃsāratāpahā

brahmendrarudrabhītighno devakāryaprasādhakaḥ /
jvalajjvalanasaṅkāśaḥ sarvabhītivināśakaḥ

mahākaluṣavidhvaṃsī sarvakāmavarapradaḥ /
kālavikramasaṃhartā grahapīḍāvināśakaḥ

sarvavyādhipraśamanaḥ pracaṇḍaripudaṇḍakṛt /
ugrabhairavasantrastaharārtivinivārakaḥ

brahmacarmāvṛtaśirāḥ śivaśīrṣaikanūpuraḥ /
dvādaśādityaśīrṣaikamaṇirdikpālabhūṣaṇaḥ

vāmano'ditibhītighno dvijātigaṇamaṇḍanaḥ /
tripadavyājayāñcāptabalitrailokyasampadaḥ

pannakhakṣatabrahmāṇḍakaṭāho'mitavikramaḥ / pannagakShata?
svardhunītīrthajanano brahmapūjyo bhayāpahaḥ

svāṅghrivārihatāghaugho viśvarūpaikadarśanaḥ /
balipriyakaro bhaktasvargadogdhā gadādharaḥ

jāmadagnyo mahāvīryaḥ paraśubhṛtkārtavīryajit /
sahasrārjunasaṃhartā sarvakṣatrakulāntakaḥ

niḥkṣatrapṛthvīkaraṇo vīrajidviprarājyadaḥ /
droṇāstravedapravado maheśagurukīrtidaḥ

sūryavaṃśābjataraṇiḥ śrīmaddaśarathātmajaḥ /
śrīrāmo rāmacandraśca rāmabhadro'mitaprabhaḥ

nīlavarṇapratīkāśaḥ kausalyāprāṇajīvanaḥ /
padmanetraḥ padmavaktraḥ padmāṅkitapadāmbujaḥ

pralambabāhuścārvaṅgo ratnābharaṇabhūṣitaḥ /
divyāmbaro divyadhanurdiṣṭadivyāstrapāragaḥ

nistriṃśapāṇirvīreśo'parimeyaparākramaḥ /
viśvāmitragururdhanvī dhanurvedaviduttamaḥ

ṛjumārganimitteṣu saṅghatāḍitatāḍakaḥ /
subāhurbāhuvīryāḍhyabahurākṣasaghātakaḥ

prāptacaṇḍīśadordaṇḍacaṇḍakodaṇḍakhaṇḍanaḥ /
janakānandajanako jānakīpriyanāyakaḥ

arātikuladarpaghno dhvastabhārgavavikramaḥ /
pitṛvāktyaktarājyaśrīvanavāsakṛtotsavaḥ

virādharādhadamanaścitrakūṭādrimandiraḥ /
dvijaśāpasamucchannadaṇḍakāraṇyakarmakṛt

caturdaśasahasrograrākṣasaghnaḥ kharāntakaḥ /
triśiraḥprāṇaśamano duṣṭadūṣaṇadūṣaṇaḥ

chadmamārīcamathano jānakīvirahārtihṛt /
jaṭāyuṣaḥ kriyākārī kabandhavadhakovidaḥ

ṛṣyamūkaguhāvāsī kapipañcamasakhyakṛt /
vāmapādāgranikṣiptadundubhyasthibṛhadgiriḥ

sakaṇṭakāradurbhedasaptatālaprabhedakaḥ /
kiṣkindhādhipavālighno mitrasugrīvarājyadaḥ

āñjaneyasvalāṅgūladagdhalaṅkāmahodayaḥ /
sītāvirahavispaṣṭaroṣakṣobhitasāgaraḥ

girikūṭasamutkṣepasamudrādbhutasetukṛt /
pādaprahārasantrastavibhīṣaṇabhayāpahaḥ

aṅgadoktiparikliṣṭaghorarāvaṇasainyajit /
nikumbhakumbhadhūmrākṣakumbhakarṇādivīrahā

kailāsasahanonmattadaśānanaśiroharaḥ /
agnisaṃsparśasaṃśuddhasītāsamvaraṇotsukaḥ

kapirākṣasarājāṅgaprāptarājyanijāśrayaḥ /
ayodhyādhipatiḥ sarvarājanyagaṇaśekharaḥ

acintyakarmā nṛpatiḥ prāptasiṃhāsanodayaḥ /
duṣṭadurbuddhidalano dīnahīnaikapālakaḥ

sarvasampattijananastiryaṅnyāyavivecakaḥ /
śūdraghoratapaḥpluṣṭadvijaputraikajīvanaḥ

duṣṭavākkliṣṭahṛdayaḥ sītānirvāsakārakaḥ /
turaṅgamedhakratuyāṭśrīmatkuśalavātmajaḥ

satyārthatyaktasaumitriḥ sūnnītajanasaṅgrahaḥ /
satkarṇapūrasatkīrtiḥ kīrtyālokāghanāśanaḥ

bharato jyeṣṭhapādābjaratityaktanṛpāsanaḥ /
sarvasadguṇasampannaḥ koṭigandharvanāśakaḥ

lakṣmaṇo jyeṣṭhanirato devavairigaṇāntakaḥ /
indrajitprāṇaśamano bhrātṛmān tyaktavigrahaḥ

śatrughno'mitraśamano lavaṇāntakakārakaḥ /
āryabhrātṛjanaślāghyaḥ satāṃ ślāghyaguṇākaraḥ

vaṭapattrapuṭasthāyī śrīmukundo'khilāśrayaḥ /
tanūdarārpitajaganmṛkaṇḍatanayaḥ khagaḥ

ādyo devagaṇāgraṇyo mitastutinatipriyaḥ /
vṛtraghoratanutrastadevasanmantrasādhakaḥ

brahmaṇyo brāhmaṇaślāghī brahmaṇyajanavatsalaḥ /
goṣpadāpsugaladgātravālakhilyajanāśrayaḥ

dausvastiryajvanāṃ śreṣṭho nṛpavismayakārakaḥ /
turaṅgamedhabahukṛdvadānyagaṇaśekharaḥ

vāsavītanayo vyāso vedaśākhānirūpakaḥ /
purāṇabhāratācāryaḥ kalilokahitaiṣaṇaḥ

rohiṇīhṛdayānando balabhadro balāśrayaḥ /
saṅkarṣaṇaḥ sīrapāṇiḥ musalāstro'maladyutiḥ

śaṅkhakundenduśvetāṅgastālabhiddhenukāntakaḥ /
muṣṭikāriṣṭahanano lāṅgalākṛṣṭayāmunaḥ

pralambaprāṇahā rukmīmathano dvividāntakaḥ /
revatīprītido rāmāramaṇo balvalāntakaḥ

hastināpurasaṅkarṣī kauravārcitasatpadaḥ /
brahmādistutapādābjo devayādavapālakaḥ

māyāpatirmahāmāyo mahāmāyānideśakṛt /
yaduvaṃśābdhipūrṇendurbaladevapriyānujaḥ

narākṛtiḥ paraṃ brahma paripūrṇaḥ parodayaḥ /
sarvajñānādisampūrṇaḥ pūrṇānandaḥ purātanaḥ

pītāmbaraḥ pītanidraḥ pītaveśmamahātapāḥ /
mahorasko mahābāhurmahārhamaṇikuṇḍalaḥ

lasadgaṇḍasthalīhaimamaulimālāvibhūṣitaḥ /
sucārukarṇaḥ subhrājanmakarākṛtikuṇḍalaḥ

nīlakuñcitasusnigdhakuntalaḥ kaumudīmukhaḥ /
sunāsaḥ kundadaśano lasatkokanadādharaḥ

sumandahāso rucirabhrūmaṇḍalavilokanaḥ /
kambukaṇṭho bṛhadbrahmā valayāṅgadabhūṣaṇaḥ

kaustubhī vanamālī ca śaṅkhacakragadābjabhṛt /
śrīvatsalakṣmyā lakṣyāṅgaḥ sarvalakṣaṇalakṣaṇaḥ

dalodaro nimnanābhirniravadyo nirāśrayaḥ /
nitambabimbavyālambikiṅkiṇīkāñcimaṇḍitaḥ

samajaṅghājānuyugmaḥ sucārurucirājitaḥ /
dhvajavajrāṅkuśāmbhojaśarāṅkitapadāmbujaḥ

bhaktabhramarasaṅghātapītapādāmbujāsavaḥ /
nakhacandramaṇijyotsnāprakāśitamahāmanāḥ

pādāmbujayuganyastalasanmañjīrarājitaḥ /
svabhaktahṛdayākāśalasatpaṅkajavistaraḥ

sarvaprāṇijanānando vasudevanutipriyaḥ /
devakīnandano lokanandikṛdbhaktabhītibhit

śeṣānugaḥ śeṣaśāyī yaśodānatimānadaḥ /
nandānandakaro gopagopīgokulabāndhavaḥ

sarvavrajajanānandī bhaktavallabhavavallabhaḥ /
valyavyaṅgalasadgātro ballavībāhumadhyagaḥ

pītapūtanikāstanyaḥ pūtanāprāṇaśoṣaṇaḥ /
pūtanorasthalasthāyī pūtanāmokṣadāyakaḥ

samāgatajanānandī śakaṭoccāṭakārakaḥ /
prāptaviprāśiṣo'dhīśo laghimādiguṇāśrayaḥ

tṛṇāvartagalagrāhī tṛṇāvartaniṣūdanaḥ /
jananyānandajanako jananyā mukhaviśvadṛk

bālakrīḍārato bālabhāṣālīlādinirvṛtaḥ /
gopagopīpriyakaro gītanṛtyānukārakaḥ

navanītaviliptāṅgo navanītalavapriyaḥ /
navanītalavāhārī navanītānutaskaraḥ

dāmodaro'rjunonmūlo gopaikamatikārakaḥ /
vṛndāvanavanakrīḍo nānākrīḍāviśāradaḥ

vatsapucchasamākarṣī vatsāsuraniṣūdanaḥ /
bakāriraghasaṃhārī bālādyantakanāśanaḥ

yamunānilasañjuṣṭasumṛṣṭapulinapriyaḥ /
gopālabālapūgasthaḥ snigdhadadhyannabhojanaḥ

gogopagopīpriyakṛddhanabhṛnmohakhaṇḍanaḥ /
vidhāturmohajanako'tyadbhutaiśvaryadarśakaḥ

vidhistutapadāmbhojo gopadārakabuddhibhit /
kālīyadarpadalano nāganārīnutipriyaḥ

dāvāgniśamanaḥ sarvavrajabhṛjjanajīvanaḥ /
muñjāraṇyapraveśāptakṛcchradāvāgnidāraṇaḥ

sarvakālasukhakrīḍo barhibarhāvataṃsakaḥ /
godhugvadhūjanaprāṇo veṇuvādyaviśāradaḥ

gopīpidhānārundhāno gopīvratavarapradaḥ /
vipradarpapraśamano viprapatnīprasādadaḥ

śatakratuvaradhvaṃsī śakradarpamadāpahaḥ /
dhṛtagovardhanagirirvrajalokābhayapradaḥ

indrakīrtilasatkīrtirgovindo gokulotsavaḥ /
nandatrāṇakaro devajaleśeḍitasatkathaḥ

vrajavāsijanaślāghyo nijalokapradarśakaḥ /
suveṇunādamadanonmattagopīvinodakṛt

godhugvadhūdarpaharaḥ svayaśaḥkīrtanotsavaḥ /
vrajāṅganājanārāmo vrajasundarivallabhaḥ

rāsakrīḍārato rāsamahāmaṇḍalamaṇḍanaḥ /
vṛndāvanavanāmodī yamunākūlakelikṛt

gopikāgītikāgītaḥ śaṅkhacūḍaśiroharaḥ /
mahāsarpamukhagrastatrastanandavimocakaḥ

sudarśanārcitapado duṣṭāriṣṭavināśakaḥ /
keśidveṣo vyomahantā śrutanāradakīrtanaḥ

akrūrapriyakṛtkrūrarajakaghnaḥ suveśakṛt /
sudāmādattamālāḍhyaḥ kubjācandanacarcitaḥ

mathurājanasaṃharṣī caṇḍakodaṇḍakhaṇḍakṛt /
kaṃsasainyasamucchedī vaṇigvipragaṇārcitaḥ

mahākuvalayāpīḍaghātī cāṇūramardanaḥ / ?
raṅgaśālāgatāpāranaranārīkṛtotsavaḥ

kaṃsadhvaṃsakaraḥ kaṃsasvasārūpyagatipradaḥ /
kṛtograsenanṛpatiḥ sarvayādavasaukhyakṛt

tātamātṛkṛtānando nandagopaprasādadaḥ /
śritasāndīpanigururvidyāsāgarapāragaḥ

daityapañcajanadhvaṃsī pāñcajanyadarapriyaḥ /
sāndīpanimṛtāpatyadātā kālayamārcitaḥ

sairandhrīkāmasantāpaśamano'krūraprītidaḥ /
śārṅgacāpadharo nānāśarasandhānakovidaḥ

abhedyadivyakavacaḥ śrīmaddārukasārathiḥ /
khagendracihnitadhvajaścakrapāṇirgadādharaḥ

nandakīyadusenāḍhyo'kṣayabāṇaniṣaṅgavān /
surāsurājeyaraṇyo jitamāgadhayūthapaḥ

māgadhadhvajinīdhvaṃsī mathurāpurapālakaḥ /
dvārakāpuranirmātā lokasthitiniyāmakaḥ

sarvasampattijananaḥ svajanānandakārakaḥ /
kalpavṛkṣākṣitamahiḥ sudharmānītabhūtalaḥ

yavanāsurasaṃhartā mucukundeṣṭasādhakaḥ /
rukmiṇīdvijasaṃmantrarathaikagatakuṇḍinaḥ

rukmiṇīhārako rukmimuṇḍamuṇḍanakārakaḥ /
rukmiṇīpriyakṛtsākṣādrukmiṇīramaṇīpatiḥ

rukmiṇīvadanāmbhojamadhupānamadhuvrataḥ /
syamantakanimittātmabhaktarkṣādhipajitśuciḥ

jāmbavārcitapādābjaḥ sākṣājjāmbavatīpatiḥ /
satyabhāmākaragrāhī kālindīsundarīpriyaḥ

sutīkṣṇaśṛṅgavṛṣabhasaptajidrājayūthabhid /
nagnajittanayāsatyānāyikānāyakottamaḥ

bhadreśo lakṣmaṇākānto mitravindāpriyeśvaraḥ /
murujitpīṭhasenānīnāśano narakāntakaḥ

dharārcitapadāmbhojo bhagadattabhayāpahā /
narakāhṛtadivyastrīratnavāhādināyakaḥ

aṣṭottaraśatadvyaṣṭasahasrastrīvilāsavān /
satyabhāmābalāvākyapārijātāpahārakaḥ

devendrabalabhijjāyājātanānāvilāsavān /
rukmiṇīmānadalanaḥ strīvilāsāvimohitaḥ

kāmatātaḥ sāmbasuto'saṅkhyaputraprapautravān /
uśāyānitapautrārthabāṇabāhusasrachit

nandyādipramathadhvaṃsī līlājitamaheśvaraḥ /
mahādevastutapado nṛgaduḥkhavimocakaḥ

brahmasvāpaharakleśakathāsvajanapālakaḥ /
pauṇḍrakāriḥ kāśirājaśirohartā sadājitaḥ

sudakṣiṇavratārādhyaśivakṛtyānalāntakaḥ /
vārāṇasīpradahano nāradekṣitavaibhavaḥ

adbhutaiśvaryamahimā sarvadharmapravartakaḥ /
jarāsandhanirodhārtabhūbhujeritasatkathaḥ

nāraderitasanmitrakāryagauravasādhakaḥ /
kalatraputrasanmitrasadvṛttāptagṛhānugaḥ

jarāsandhavadhodyogakartā bhūpatiśarmakṛt /
sanmitrakṛtyācarito rājasūyapravartakaḥ

sarvarṣigaṇasaṃstutyaścaidyaprāṇanikṛntakaḥ /
indraprasthajanaiḥ pūjyo duryodhanavimohanaḥ

maheśadattasaubhāgyapurabhicchatrughātakaḥ /
dantavaktraripucchettā dantavaktragatipradaḥ

vidūrathapramathano bhūribhārāvatārakaḥ /
pārthadūtaḥ pārthahitaḥ pārthārthaḥ pārthasārathiḥ

pārthamohasamucchedī gītāśāstrapradarśakaḥ /
pārthabāṇagataprāṇavīrakaivalyarūpadaḥ

duryodhanādidurvṛttadahano bhīṣmamuktidaḥ /
pārthāśvamedhāharakaḥ pārtharājyaprasādhakaḥ

pṛthābhīṣṭaprado bhīmajayado vijayapradaḥ /
yudhiṣṭhireṣṭasandātā draupadīprītisādhakaḥ

sahadeveritapado nakulārcitavigrahaḥ /
brahmāstradagdhagarbhasthapūruvaṃśaprasādhakaḥ

pauravendrapurastrībhyo dvārakāgamanotsavaḥ /
ānartadeśanivasatprajeritamahatkathaḥ

priyaprītikaro mitravipradāridryabhañjanaḥ /
tīrthāpadeśasanmitrapriyakṛnnandanandanaḥ

gopījanajñānadātā tātakratukṛtotsavaḥ /
sadvṛttavaktā sadvṛttakartā sadvṛttapālakaḥ

tātātmajñānasandātā devakīmṛtaputradaḥ /
śrutadevapriyakaro maithilānandavardhanaḥ

pārthadarpapraśamano mṛtaviprasutapradaḥ /
strīratnavṛndasantoṣī janakelikalotsavaḥ

candrakoṭijanānandī bhānukoṭisamaprabhaḥ /
kṛtāntakoṭidurlaṅghyaḥ kāmakoṭimanoharaḥ

yakṣarāṭkoṭidhanavānmarutkoṭisvavīryavān /
samudrakoṭigambhīro himavatkoṭyakampanaḥ

koṭyaśvamedhāḍhyaharaḥ tīrthakoṭyadhikāhvayaḥ /
pīyūṣakoṭimṛtyughnaḥ kāmadhukkoṭyabhīṣṭadaḥ

śakrakoṭivilāsāḍhyaḥ koṭibrahmāṇḍanāyakaḥ /
sarvāmoghodyamo'nantakīrtiniḥsīmapauruṣaḥ

sarvābhīṣṭapradayaśāḥ puṇyaśravaṇakīrtanaḥ /
brahmādisurasaṅgītavītamānuṣaceṣṭitaḥ

anādimadhyanidhano vṛddhikṣayavivarjitaḥ /
svabhaktoddhavamukhyaikajñānado jñānavigrahaḥ

vipraśāpacchaladhvastayaduvaṃśogravikramaḥ /
saśarīrajarāvyādhasvargadaḥ svargisaṃstutaḥ

mumukṣumuktaviṣayījanānandakaro yaśaḥ /
kalikālamaladhvaṃsiyaśāḥ śravaṇamaṅgalaḥ

bhaktapriyo bhaktahito bhaktabhramarapaṅkajaḥ /
smṛtamātrākhilatrātā yantramantraprabhañjakaḥ

sarvasampatsrāvināmā tulasīdāmavallabhaḥ /
aprameyavapurbhāsvadanarghyāṅgavibhūṣaṇaḥ

viśvaikasukhado viśvasajjanānandapālakaḥ /
sarvadevaśiroratnamadbhutānantabhogavān

adhokṣajo janājīvyaḥ sarvasādhujanāśrayaḥ /
samastabhayabhinnāmā smṛtamātrārtināśakaḥ

svayaśaḥśravaṇānandajanarāgī guṇārṇavaḥ /
anirdeśyavapustaptaśaraṇo jīvajīvanaḥ

paramārthaḥ paraṃvedyaḥ parajyotiḥ parāgatiḥ /
vedāntavedyo bhagavānanantasukhasāgaraḥ

jagadbandhadhvaṃsayaśā jagajjīvajanāśrayaḥ /
vaikuṇṭhalokaikapatirvaikuṇṭhajanavallabhaḥ

pradyumno rukmiṇīputraḥ śambaraghno ratipriyaḥ /
puṣpadhanvā viśvajayī dyumatprāṇaniṣūdakaḥ

aniruddhaḥ kāmasutaḥ śabdayonirmahākramaḥ /
uṣāpatirvṛṣṇipatirhṛṣīkeśo manaḥpatiḥ

śrīmadbhāgavatācāryaḥ sarvavedāntasāgaraḥ /
śukaḥ sakaladharmajñaḥ parīkṣinnṛpasatkṛtaḥ

śrībuddho duṣṭabuddhighno daityavedabahiṣkaraḥ /
pākhaṇḍamārgapravado nirāyudhajagajjayaḥ

kalkī kaliyugācchādī punaḥ satyapravartakaḥ /
vipraviṣṇuyaśo'patyo naṣṭadharmapravartakaḥ

sārasvataḥ sārvabhaumo balitrailokyasādhakaḥ /
aṣṭamyantarasaddharmavaktā vairocanipriyaḥ

āpaḥ karo ramānātho'marārikulakṛntanaḥ /
surendrahitakṛddhīravīramuktibalapradaḥ

viṣvaksenaḥ śambhusakho daśamāntarapālakaḥ /
brahmasāvarṇivaṃśābdhihitakṛdviśvavardhanaḥ

dharmaseturadharmaghno vaidyatantrapadapradaḥ /
asurāntakaro devārthakasūnuḥ subhāṣaṇaḥ

svadhāmā sūnṛtāsūnuḥ satyatejo dvijātmajaḥ /
dviṣanmanuyugatrātā pātālapuradāraṇaḥ

daivahotrirvārhatoyo divaspatiratipriyaḥ /
trayodaśāntaratrātā yogayogijaneśvaraḥ

sattrāyaṇo bṛhadbāhurvainateyo viduttamaḥ /
karmakāṇḍaikapravado vedatantrapravartakaḥ

parameṣṭhī surajyeṣṭho brahmā viśvasṛjāmpatiḥ /
abjayonirhaṃsavāhaḥ sarvalokapitāmahaḥ

viṣṇuḥ sarvajagatpātā śāntaḥ śuddhaḥ sanātanaḥ /
dvijapūjyo dayāsindhuḥ śaraṇyo bhaktavatsalaḥ

rudro mṛḍaḥ śivaḥ śāstā śambhuḥ sarvaharo haraḥ /
kapardī śaṅkaraḥ śūlī tryakṣo'bhedyo maheśvaraḥ

sarvādhyakṣaḥ sarvaśaktiḥ sarvārthaḥ sarvatomukhaḥ /
sarvāvāsaḥ sarvarūpaḥ sarvakāraṇakāraṇam

ityetatkathitaṃ vipra viṣṇornāmasahasrakam /
sarvapāpapraśamanaṃ sarvābhīṣṭaphalapradam

manaḥśuddhikaraṃ cāśu bhagavadbhaktivardhanam /
sarvavighnaharaṃ sarvāścaryaiśvaryapradāyakam

sarvaduḥkhapraśamanaṃ cāturvargyaphalapradam /
śraddhayā parayā bhaktyā śravaṇātpaṭhanājjapāt

pratyahaṃ sarvavarṇānāṃ viṣṇupādāśritātmanām /
etatpaṭhan dvijo vidyāṃ kṣatriyaḥ pṛthivīmimām

vaiśyo mahānidhiṃ śūdro vāñchitāṃ siddhimāpnuyāt /
dvātriṃśadaparādhānyo jñānājñānāccareddhareḥ

nāmnā daśāparādhāṃśca pramādādācaredyadi /
samāhitamanā hyetatpaṭhedvā śrāvayejjapet

smaredvā śṛṇuyādvāpi tebhyaḥ sadyaḥ pramucyate /
nātaḥ parataraṃ puṇyaṃ triṣu lokeṣu vidyate

yasyaikakīrtanenāpi bhavabandhādvimucyate /
atastvaṃ satataṃ bhaktyā śraddhayā kīrtanaṃ kuru

viṣṇornāmasahasraṃ te bhagavatprītikāraṇam /
śrīnārada uvāca /
dhanyo'smyanugṛhīto'smi tvayātikaruṇātmanā /
yataḥ kṛṣṇasya paramaṃ sahasraṃ nāmakīrtitam

yadyālasyātpramādādvā sarvaṃ paṭhitumanvaham /
na śaknomi tadā deva kiṃ karomi vada prabho

śrīśiva uvāca /
yadi sarvaṃ na śaknoṣi pratyahaṃ paṭhituṃ dvija /
tadā kṛṣṇeti kṛṣṇeti kṛṣṇeti pratyahaṃ vada

etena tava viprarṣe sarvaṃ sampadyate sakṛt /
kiṃ punarbhagavannāmnāṃ sahasrasya prakīrtanāt

yannāmakīrtanenaiva pumān saṃsārasāgaram /
taratyaddhā prapadye taṃ kṛṣṇaṃ gopālarūpiṇam

iti sātvatatantre śrīkṛṣṇasahasranāmaṣaṣṭhaḥ paṭalaḥ