kirātāṣṭakam · Chapter 1

pratyarthi vrātavakṣaḥsthalarudhirasurā-
pānamattampṛṣatkaṃ
cāpe sandhāya tiṣṭhan hṛdayasarasije
māmake tāpahantā /
piñchottaṃsaḥ śaraṇyaḥ paśupatitanayo
sāvadhānaḥ sadā naḥ

ākheṭāya vanecarasya girijā-
saktasya śambhoḥsutaḥ
trātuṃ yo bhuvanaṃ purā samajani
khyātaḥ kirātākṛtiḥ /
kodaṇḍaḥ churikādharo ghanaruciḥ
piñchāvataṃsojvalaḥ
sa tvaṃ māmava sarvadā ripugaṇa
trastaṃ dayāvāridhe

yo māṃ pīḍayati prasahya satataṃ
dehī tvadekāśrayaṃ
bhitvā tasya riporuraḥ churikayā
śātāgrayā durmateḥ /
deva tvatkarapaṅkajolasitayā
śrīman kirātākṛte
tatprāṇān vitarāntakāya bhagavan
kālāriputrāñjasā

viddho marmamasu durvacobhirasatāṃ
santaptaśalyopamaiḥ
dṛptānāṃ dviṣatāmaśāntamanasāṃ
khinno'smi yāvad bhṛśaṃ
tāvat tvaṃ churikāśarāsanadharaḥ
citte mamāvirbhavan
svāmin deva kirātarūpa śamaya
pratyarthivargaṃ kṣaṇāt

hartuṃ vittadharmato mama ratāḥ-
chorāśca ye durjanāḥ
teṣāṃ marmasu tāḍayāśu viśikhai-
stvatkārmukānniḥsṛtaiḥ /
śāstāraṃ dviṣatāṃ kirātavapuṣaṃ
sarvārthadaṃ tvāmṛte
paśyāmyatra purāriputra śaraṇaṃ
nānyaṃ prapanno'smyaham

yakṣapretapiśācabhūtanivahāḥ
duḥkhapradā bhīṣaṇāḥ
bādhānte naraśoṇitotsukadhiyo
ye tāṃ ripupreritāḥ /
cāpajyāninadaistvamīśa sakalān
saṃhṛtya duṣṭagrahān
gaurīśātmaja daivateśvara kirā-
tākāra saṃrakṣa mām

drogdhuṃ ye niratāstvadīyapadapa-
dmaikāntabhaktāya me
māyāḥchannakaḻebarāśca viṣadā
nādyaiḥsudā karmabhiḥ /
vaśyastambhanamāraṇādi kuśala-
prārambha dakṣānarīn
duṣṭānsaṃhara devadeva śabarā-
kāra trilokeśvara

tanvā vā manasā girā'pi satataṃ
doṣāṃ cikīrṣantyalaṃ
tvatpādapraṇatasya me niraparā-
dhasyāpi ye mānavāḥ /
sarvān sahera tān girīśasuta me
tāpatrayaughānapi
tvāmekaṃ śabarākṛte bhayaharaṃ
nāthaṃ prapanno'smyaham

kṛṣṭo rājabhaṭaiḥ sadā'pi paribhūtoaṃ
khalairvairibhi-
ścānyarghoratarairvi pajjalanidhau
magno'smi duḥkhāturaḥ
hā hā kiṃ karavai vibho śabaraveṣaṃ
tvāmabhīṣṭārthadaṃ
vande'haṃ paradaivataṃ kuru kṛpāṃ
nāthārtha bandho mayi

stotraṃ yaḥ prajapet praśāntakaraṇair-
nityaṃ kirātāṣṭakaṃ
sa kṣipraṃ vaśagān karoti nṛpatī-
nābaddhavairānapi /
saṃhṛtyātma virodhinaḥ khalajanān
duṣṭagrahānapyasau
yātyante yamadūtabhītirahito-
divyāṃ gatiṃ śāśvatīm