kātyāyanaśulbasūtram · Chapter 1

kātyāyanaśulbasūtram
rajjusamāsaṃ vakṣyāmaḥ

same śaṅkuṃ nikhāya śaṅkusammitayā rajjvā maṇḍalaṃ parilikhya yatra lekhayoḥ śaṅkvagracchāyā nipatati tatra śaṅkū nihanti sā prācī / tadantaraṃ rajjvābhyasya pāśau kṛtvā śaṅkvoḥ pāśau pratimucya dakṣiṇāyamya madhye śaṅkumevamuttarataḥ sodīcī

rajjvantayoḥ pāśau karoti / śroṇyaṃsanirañchanasaṃkhyāsamāsabhaṅgeṣu lakṣaṇāni / prācyantayoḥ śaṅku nihanti / śroṇyoraṃsayośca / śaṅkvoḥ pāśau pratimucya nirañchanena gṛhītvā dakṣiṇapūrvāṃ diśaṃ haranti / evamuttarataḥ / viparyasyetarataḥ / sa samādhiḥ sarvatra

pramāṇamabhyasyābhyāsacaturthe lakṣṇaṃ karoti tannirañchanam / akṣṇayā tiryaṅmānīśeṣa

pramāṇārdhaṃ vābhyasyābhyāsaṣaṣṭhe lakṣaṇaṃ karoti tannirañchanam / akṣṇayā tiryaṅmāniśeṣaḥ

pramāṇārdhe samacaturaśrasya śaṅkuḥ / śāstravadardhe dīrghacaturaśrasya / śakaṭamukhasya caivam

etena prāgvaṃśavedimānāni vyākhyātāni / śālāmānaṃ ca / tatrodīcī prācīvat / sadasaścaivam

aparimitaṃ pramāṇādbhūyaḥ

pramāṇe śāstraṃ pramāṇaṃ nirhāsavivṛddhyoḥ / yogaśca

itarasyavitṛtīye dakṣiṇata ityetadvakṣyāmaḥ / gārhapatyāhavanīyayorantarālaṃ ṣaḍhdhā saptadhā vāgantusamaṃ tredhā vibhajyāparavitṛtīyalakṣaṇena dakṣiṇāyamya tasminnagniḥ / viparyasyottarata utkaraḥ

apivāntaratribhāgo'nayā rajjvā purvārdhe samacaturaśraṃ kṛtvā śroṇyāmagniḥ / viparyasyottarāṃsa utkaraḥ

aṅgulai rathasaṃmitāyāḥ pramāṇam / tatrāṣṭāśītiśatamīṣā / catuḥśatamakṣaḥ / ṣaḍaśītiryugam / catvāro'ṣṭakāḥ śamyā

paitṛkyāṃ dvipuruṣaṃ samacaturaśraṃ kṛtvā karaṇīmadhye śaṅkavaḥ sa samādhiḥ

karaṇī tatkaraṇī tiryaṅmānī pārśvamānyakṣṇayā ceti rajjavaḥ

padaṃ tiryaṅmānī tripadā pārśvamānī tasyākṣṇyā rajjurdaśakaraṇī

evaṃ dvipadā tiryaṅmānī ṣaṭpadā pārśvamānī tasyākṣṇayā rajjuścatvāriṃśatkaraṇī

upadiṣṭaṃ yugapramāṇaṃ śamyāpramāṇaṃ ca darśanāt

dīrghacaturaśrasyākṣṇayā rajjustiryaṅmānī pārśvamānī ca yatpṛthagbhūte kurutastadubhayaṃ karotīti kṣetrajñānam

samacaturaśrasyākṣṇayā rajjurdvikaraṇī

karaṇīṃ tṛtīyena vardhayettacca svacaturthenātmacatustṛṃśonena saviśeṣa iti viśeṣaḥ

pramāṇaṃ tiryak dvikaraṇyāyāmastasyākṣṇayā rajjustrikaraṇī

tṛtīyakaraṇyetena vyākhyātā / pramāṇavibhāgastu navadhā karaṇītṛtīyaṃ navabhāgaḥ / navabhāgāstrayastṛtīyakaraṇī

sautrāmaṇyāṃ prakramārthā / tṛtīyakaraṇī samāsārthā

tulyapramāṇānāṃ samacaturasrāṇāmuktaḥ samāsaḥ / nānāpramāṇasamāse hrasīyasaḥ karaṇyā varṣīyaso'pacchindyāttasyākṣṇayā rajjurubhe samasyatīti samāsaḥ

caturaśrāccaturaśraṃ nirjihīrṣanyāvannirjihīrṣettāvadubhayato'pacchidya śaṅkū nikhāya pārśvamānīṃ kṛtvā pārśvamānīsammitāmakṣṇayāṃ tatropasaṃharati sa samāse'pacchedaḥ sā karaṇyeṣa nirhrāsaḥ

dīrghacaturaśraṃ samacaturaśraṃ cikīrṣan madhye tiryagapacchidyānyataradvibhajyetaratpurastāddakṣiṇataścopadadhyāccheṣamāgantunā purayettasyokto nirhrāsaḥ

atidīrghaṃ cettiryaṅmānyāpacchidyāpacchidyaikasamāsena samasya śeṣaṃ yathāyogamupasaṃharedityekaḥ samāsaḥ

samacaturaśraṃ dīrghacaturaśraṃ cikīrṣanmadhye'kṣṇayā'pacchidya tacca vibhajyānyataratpurastāduttarataścopadadhyādviṣamaṃ cedyathāyogamupasaṃharediti vyāsaḥ

pramāṇaṃ caturaśramādeśādanyat

dvipramāṇā catuḥkaraṇī tripramāṇa navakaraṇī catuḥpramāṇā ṣoḍaśakaraṇī

yāvatpramāṇā rajjurbhavati tāvantastāvanto vargā bhavanti tānsamasyet

ardhapramāṇena pādapramāṇaṃ vidhīyate / tṛtīyena navamaॐ'śaḥ / caturthena ṣoḍaśī kalā

eṣa nirhrāsastasya purastāduktaṃ śāstram

yāvatpramāṇā rajjurbhavatīti vivṛddhe hrāso bhavati

caturaśraṃ maṇḍalaṃ cikīrṣanmadhyādaṃse nipātya pārśvataḥ parilikhya tatra yadatiriktaṃ bhavati tasya tṛtīyena saha maṇḍalaṃ parilikhet sa samādhiḥ

maṇḍalaṃ caturaśraṃ cikīrṣan viṣkambhaṃ pañcadaśabhāgān kṛtvā dvāvuddhareccheṣaḥ karaṇī

droṇacidrathacakracitkaṅkacitpraugacidubhayataḥ praugaḥ samuhyapurīṣa ityagnayaḥ

droṇe yāvānagniḥ sapakṣapucchaviśeṣastāvaccaturaśraṃ kṛtvā droṇadaśamavibhāgo vṛntamityeke / taddaśamenāpacchidyāpacchidyaikasamāsena samasya nirhṛtya sarvamagniṃ tathākṛtiṃ kṛtvā purastātpaścādvopadadhyāt / maṇḍale'pyevam

prauge yāvānagniḥ sapakṣapucchaviśeṣastāvaddviguṇaṃ caturaśraṃ kṛtvā yaḥ purastātkaraṇīmadhye śaṅkuryau ca śroṇyoḥ so'gniḥ

ubhayataḥ prauge tāvadeva dīrghacaturaśraṃ kṛtvā karaṇīmadhyeṣu śaṅkavaḥ sa samādhiḥ

praugaṃ caturaśraṃ cikīrṣanmadhye prāñcamapacchidya viparyasyetarata upadhāya dīrghacaturaśrasamāsena samasyet sa samādhiḥ

ubhayataḥ praugaṃ cenmadhye tiryagapacchidya pūrvavatsamasyet

etenaiva trikarṇasamāso vyākhyātaḥ / pañcakarṇānāṃ ca / prauge'pacchidyaikakarṇānāṃ / dvikarṇānāṃ samacaturaśre'pacchidya

uttareṣu puruṣoccayenaikaśatavidhādityetadvakṣyāmaḥ

ādyo'gnirdviguṇastriguṇo bhavatīti sarvasamāsaḥ

ekaviṃśatividho bhavatīti puruṣābhyāsaḥ

puruṣābhyāse yāvānagniḥ sapakṣapucchaviśeṣastāvaccaturaśraṃ kṛtvā tasminpuruṣapramāṇamavadadhyāt

samastaṃ pañcadaśabhāgānkṛtvā dvāvekasamāsena samasyet sa puruṣaḥ

pañcavibhāgena bṛhatī tasya daśamavibhāgena pādamātrī bhavati

puruṣaṃ vā pañcamenobhayato'pacchidya pañcavibhāgansamasya tṛtīyaṃ nirhṛtya tasminpuruṣapramāṇe'vadadhyādityaparam

pañcadaśavibhāgo'ṣṭāṅgulam

pañcāratnirdaśavitastirviṃśatiśatāṅgulaḥ puruṣa ityetasmāddvādaśāṅgulaṃ padamiti ca

puruṣaṃ vā saptamenobhayato'pacchidya saptabhāgānsamasya sasaptamabhāgamaṅgulaṃ nirhṛtya puruṣapramāṇe'vadadhyādityaparam

nāratnivitastīnāṃ samāso vidyate saṃkhyāyogāditi śruteḥ

yathāgni vedīṣṭakāpramāṇaṃ varddhata ityetadvakṣyāmaḥ

yākaraṇī caturdaśaprakramānsaṅkṣipati triṃśca prakramasaptamabhāgān sa ekaśatavidhe prakramaḥ

dvitīye vā saptasu prakrameṣu prakramamavadhāya tasya saptamabhāgena prakramārthaḥ

prakrameṇa vā saptamabhāgena prakramārthaḥ

evamaikaśatavidhāt

nāntaḥpātyagārhapatyayorvṛddhirbhavati tāvadeva yonirbhavati na vai jātaṃ garbhaṃ yoniranuvardhata iti śrutervṛddheratyantaṃ pratiṣedhaḥ

yāvatpramāṇāni samacaturaśrāṇyekīkartuṃ cikīrṣedekonāni tāni bhavanti tiryagdviguṇānyekata ekādhikāni tryasrirbhavati tasyeṣustatkaroti

yathāyūpaṃ vedivarddhanamityetadvakṣyāmaḥ

yā rajjurekādaśoparavānsaṅkṣipati daśa ca rathākṣāṃstasyā yaścaturviṃśo bhāgaḥ sa prakramaḥ

tena vediṃ nirmāya dvādaśāṅgulaṃ purastādapacchidya tadyūpāvatyācchaṅkoḥ purastātprāñcamavadhāya tasmin yūpānminoti

pārśvayorvā'rdhamantarvedīti śruterarddhakāniti

eke prathamottamau prakṛtivat

saiṣā śikhaṇḍinī vediḥ

bhavanti cātra ślokāḥ
dvihaste lakṣaṇaṃ kuryāt trihasto madhyamaḥ śiraḥ

śiraḥpaścādvitastiḥ syāt pūrvārdhe hasta eva ca
sārdhahaste ca pāśaḥ syāt vediḥ syāt paurṇamāsikī

saṃkhyājñaḥ parimāṇajñaḥ samasūtranirañchakaḥ
samabhūmau bhavedvidvāñchulbavit paripṛcchakaḥ

na jalāt samamanyat syānnānyadvātāt pramā bhavet
nānyaddūraṃ bhramādūrdhvaṃ nānyat sūtrādṛjurbhavet

tiryaṅmānyāśca sarvārthaiḥ pārśvamānyāśca yogavit
karaṇīnāṃ vibhāgajño nityodyuktaśca karmasu

śāstrabudhyā vibhāgajñaḥ paraśāstrakutūhalaḥ
śilpibhyaḥ sthapatibhyaśca ādadīta matīḥ sadā

ṣaḍaṅgulaparīṇāhaṃ dvādaśāṅgulamucchritam
jaraṭhaṃ cāvraṇaṃ caiva śaṅkuṃ kuryādviśeṣataḥ

dvivitastipramāṇastu khādiro mudgarastathā
śaṅkustena nikhātavyastasmāttasya parigrahaḥ

ekatastu ṛjustīkṣṇaḥ khādiraḥ samamāyataḥ
śaṅkuḥ kāryastu śulbajñaistasyārdhaṃ gamayenmahīm

prādeśamātro haviryajñe pūrvalakṣaṇalakṣitaḥ
śaṅkurāmaśirāḥ kāryastasyāpyardhaṃ nikhāpayet

caturasramudgaraṃ syāt ṣoḍaśāṅgulamāyatam
aviddhaṃ ramaṇīyaṃ ca dārumadhyācca nirmitam

ajīrṇā'granthinī sūkṣmā samā ślakṣṇā tvaromaśā
rajjurmānādhikā kāryā adhvare yogamicchatā

śāṇī vā bālvajī caiva vaiṇavī vā vidhīyate
rajjustūbhayataḥpāśā trivṛtā yajñakarmaṇi

rajjurmuñjamayī kāryā śaṇaistu parimiśritā
kātyāyano vadatyevamakhaṇḍā kuśabalbajaiḥ

navake lakṣaṇaṃ kuryāt trīṇi kuryāt triṣu triṣu
uttamo navakaḥ pāśaḥ sadaso mānamucyate

pañcadaśamathaikaviṃśatikamaparaṃ parastrikaṃ ca
dvādaśasu pāśa uttama iti some rajjumānametat

padasyākṣṇayā tiraścī tayorakṣṇayā bhavet
sautrāmaṇyāṃ vimātavyā vediḥ syāt somavattayā

nīhāreṇa ghanairvāpi jyotiṣāmabhradarśane
apsu dīpaṃ pragṛhṇīyādyāvattamasi darśane

pramāṇaṃ ca prameyaṃ ca yaccānyadvastusaṃjñakam
sarvaṃ tacchāstrato jñātvā yajñe sidhyanti yājñikāḥ

yathā na kṣīyate mānaṃ yathā ca na vivardhate
yathā ca ramate dṛṣṭistathā yogaṃ samācaret

aratniścaturasrastu pūvasyāgneḥ kharo bhavet
rathacakrākṛtiḥ paścāccandrārdha iva dakṣiṇaḥ

agnīnāṃ tu kharaḥ kāryo mekhalātrayasaṃyutaḥ
dvādaśāṅgula ucchrāye vistāre caturaṅgulaḥ

tantuḥ puṣkaranālasya ṣaḍguṇaḥ pariveṣṭitaḥ
vatsataryāstrihāyaṇyā bālena sadṛśo bhavet

trayastrihāyaṇībālāḥ sarṣapārdhaṃ pracakṣate
dviguṇaṃ sarṣapaṃ vidyādyavaḥ pañca tu sarṣapāḥ

aṅgulasya pramāṇaṃ tu ṣaḍyavāḥ pārśvasaṃsthitāḥ
caturviṃśāṅgulo'ratnirvitastirdvādaśāṅgulā

vyāmasyātra pramāṇaṃ tu caturnyūnaṃ śataṃ bhavet
puruṣasya pramāṇaṃ vai viṃśatistu śatādhikā

hiraṇyaśakalārthe tu hiraṇyaṃ yasya nocyate
kṛṣṇalenaiva tadvyākhyā yajñe sidhyati yājñikī

kṛṣṇalaṃ triyavaṃ mānaṃ tāmrāyasamataḥ param
suvarṇādardhaṃ ca māṣāṇāṃ suvarṇāśca trisaptatiḥ

trīṇi caiva sahasrāṇi dadyādbahusuvarṇake
bhūyaḥ sthapatito jñātvā saṃjñāsvanyāsu mānavit
svarṇakāro yathā'bhyāsāttathā bhūyo vivardhate

hrasate śoṣapākābhyāṃ dvātriṃśadbhāgamiṣṭakā
tasmādārdrapramāṇaṃ tu kuryānmānādhikaṃ budhaḥ

ajñātvā śulbasadbhāvaṃ yajñe sautrāmaṇīsute
vediṃ ye kartumicchanti giriṃ bhindanti te nakhaiḥ

daṇḍarajjvardhamabhyasya ṣaṣṭhe tvardhasya lakṣaṇam
tathaiva cetaratrāpi tiryaṅmānaṃ yadṛcchayā

yāvatpramāṇā rajjuḥ syāttāvānevāgamo bhavet
āgamārdhe bhavecchaṅkustadardhe ca nirañchanam

ādhāne padikaṃ kuryāt dvipadaḥ saumiko bhavet
agnau ca tripadaṃ kuryāt prakramaṃ yājñiko budhaḥ

kṛttikā śravaṇaḥ puṣyaścitrāsvātyoryadantaram
etatprācyā diśo rūpaṃ yugamātrodite puraḥ

pañcāśaccharkarāḥ paścāt pūrve deyāstrisaptatiḥ
dakṣiṇe tu pradātavyā daśa pañca ca sapta ca

śaṃsyaścaturviṃśatipārśvabhāgaścaturdaśabhiḥ parilekhyastu naryam
tathaiva cāṣṭadviguṇairatharyyastriṃśadbhirāyamya harettṛtīyam

agnerudaksārdhanavāṅgule madhyaṃ tato likhet
vṛttamekonaviṃśatyā prācījyā madhyagā bhavet
udagardhaṃ vihāyārvāk kharāgnerdakṣiṇasya tu

sūtradoṣadaridrasya gūḍhamantrasya dhīmataḥ
samāpteyaṃ kriyā śaulbī kātyāyanamahātmanaḥ