jīvanmuktānandalaharī · Chapter 1

pure paurānpaśyannarayuvatināmākṛtimayān
suveṣānsvarṇālaṅkaraṇakalitāṃścitrasadṛśān /
svayaṃ sākṣāddṛṣṭetyapi ca kalayaṃstaiḥ saha raman
munirna vyāmohaṃ bhajati gurudīkṣākṣatatamāḥ

vane vṛkṣānpaśyandalaphalabharānnamrasuśikhān
ghanacchāyācchannānbahulakalakūjaddvijagaṇān /
bhajanghasrorātrādavanitalakalpaikaśayano
munirna vyāmohaṃ bhajati gurudīkṣākṣatatamāḥ

kadācitprāsāde kvacidapi ca saudheṣu dhanināṃ
kadā kāle śaile kvacidapi ca kūleṣu saritām /
kuṭīre dāntānāṃ munijanavarāṇāmapi vasan
munirna vyāmohaṃ bhajati gurudīkṣākṣatatamāḥ

kvacidbālaiḥ sārdhaṃ karatalajatālaiḥ sahasitaiḥ
kvacittāruṇyālaṅkṛtanaravadhūbhiḥ saha raman /
kvacidvṛddhaiścintākulita hṛdayaiścāpi vilapan
munirna vyāmohaṃ bhajati gurudīkṣākṣatatamāḥ

kadācidvidvadbhirvividiṣubhiratyantanirataiḥ
kadācitkāvyālaṃkṛtirasarasālaiḥ kavivaraiḥ /
kadācitsattarkairranumitiparastārkikavarair
munirna vyāmohaṃ bhajati gurudīkṣākṣatatamāḥ

kadā dhyānābhyāsaiḥ kvacidapi saparyāṃ vikasitaiḥ
sugaṃdhaiḥ satpuṣpaiḥ kvacidapi dalaireva vimalaḥ /
prakurvandevasya pramuditamanāḥ saṃnatiparo
munirna vyāmohaṃ bhajati gurudīkṣākṣatatamāḥ

śivāyāḥ śaṃbhorvā kvacidapi ca viṣṇorapi kadā
gaṇādhyakṣasyāpi prakaṭitavarasyāpi ca kadā /
paṭhanvai nāmāliṃ nayanaracitānandasarito
munirna vyāmohaṃ bhajati gurudīkṣākṣatatamāḥ

kadā gaṅgāmbhobhiḥ kvacidapi ca kūpotthasalilaiḥ
kvacitkāsārotthaiḥ kvacidapi saduṣṇaiśca śiśiraiḥ /
bhajansnānaṃ bhūtyā kvacidapi ca karpūranibhayā
munirna vyāmohaṃ bhajati gurudīkṣākṣatatamāḥ

kadācijjāgartyāṃ viṣayakaraṇaiḥ saṃvyavaharan
kadācitsvapnasthānapi ca viṣayāneva ca bhajan /
kadācitsauṣuptaṃ sukhamanubhavanneva satataṃ
munirna vyāmohaṃ bhajati gurudīkṣākṣatatamāḥ

kadāpyāśāvāsāḥ kvacidapi ca divyāmbaradharaḥ
kvacitpañcāsyotthāṃ tvacamapi dadhānaḥ kaṭitaṭe /
manasvī niḥsaṅgaḥ sujanahṛdayānandajanako
munirna vyāmohaṃ bhajati gurudīkṣākṣatatamāḥ

kadācitsattvasthaḥ kvacidapi rajovṛttisugata
stamovṛttiḥ kvāpi tritayarahitaḥ kvāpi ca punaḥ /
kadācitsaṃsārī śrutipathavihārī kvacidaho
munirna vyāmohaṃ bhajati gurudīkṣākṣatatamāḥ

kadācinmaunasthaḥ kvacidapi ca vāgvādanirataḥ
kadācitsvānaṃdaṃ hasitarabhasastyaktavacanaḥ  /
kadācillokānāṃ vyavahṛtisamālokanaparo
munirna vyāmohaṃ bhajati gurudīkṣākṣatatamāḥ

kadācicchaktīnāṃ vikacamukhapadmeṣu kamalaṃ
kṣipaṃstāsāṃ kvāpi svayamapi ca gṛhṇansvamukhataḥ /
tadadvaitaṃ rūpaṃ nijaparavihīnaṃ prakaṭayan
munirna vyāmohaṃ bhajati gurudīkṣākṣatatamāḥ

kvacicchaivaiḥ sārthaṃ kvacidapi ca śāktaiḥ saha vasan
kadā viṣṇorbhaktaiḥ kvacidapi ca sauraiḥ saha vasan /
kadā gāṇāpatyairgatasakalabhedo'dvayatayā
munirna vyāmohaṃ bhajati gurudīkṣākṣatatamāḥ

nirākāraṃ kvāpi kvacidapi ca sākāramamalaṃ
nijaṃ śaiva rūpaṃ vividhaguṇabhedena bahudhā /
kadāścaryaṃ paśyankimidamiti hṛṣyannapi kadā
munirna vyāmohaṃ bhajati gurudīkṣākṣatatamāḥ

kadā dvaitaṃ paśyannakhilamapi satyaṃ śivamayaṃ
mahāvākyārthānāmavagatisamabhyāsavaśataḥ /
gatadvaitābhāsaḥ śiva śiva śivetyeva vilapan
munirna vyāmohaṃ bhajati gurudīkṣākṣatatamāḥ

imāṃ muktāvasthāṃ paramaśivasaṃsthāṃ gurukṛpā
sudhāpāṅgāvāpyāṃ sahajasukhavāpyāmanudinam /
muhurmajjanmajjanbhajati sukṛtaiścennaravaraḥ
tadā tyāgī yogī kaviriti vadantīha kavayaḥ

iti śrīmatparamahaṃsaparivrājakācāryasya
śrīgovindabhagavatpūjyapādaśiṣyasya
śrīmacchaṅkarabhagavataḥ kṛtau
jīvanmuktānandalaharī sampūrṇā //