Jātakamālā · Verses 59-17

ālambya plavam iva te 'tha taccharīraṃ bāṣpāmbuvyatikarapāṭalāntanetrāḥ |
utterur makarakarakṣatormicakraṃ tasyaiva praṇidhibalāśrayāt samudram

tad evam atiduṣkarāṇi bhagavān asau bhūtaye
cakāra jagatāṃ kṛpāparigatāmalādhyāśayaḥ |
prasādayata tatra mānasam ato jagadbāndhave
samagrabhuvanopakārakaraṇaikavīre jine

prasādya ca mano munau sucaritaikaratnākare
vaco 'vitathavādinaḥ śrutirasāyanaṃ śrūyatām |
tadaśravaṇavañcitaṃ jagad idaṃ bhramaty āturaṃ
bhavādhvani nirāśraye vyasanakaṇṭakāndhācite

iti śrīsārthavāhajātakaṃ samāptam ||
14. Sarvaṃdada
paraduḥkhaduḥkhitāḥ svajīvitam api nāpekṣante sādhavaḥ |
tadyathānuśrūyate |
bodhisattvo 'nyatamaṃ svakulakramāgataṃ mahīmaṇḍalaṃ samanuśaśāsa | tasyārthijanamanoharair aviṣamapravṛttimadhuratarair anatikrāntakālābhilaṣitaiḥ phalāśākārpaṇyopaśamasvacchaśobhair vibhavavisargair lokān saṃtarpayataḥ sarvaṃdada ity evaṃ yathārthaṃ nāma prathitam āsīt |
jagaddhitādhānasamutsukatvāt sa rājyabhāraṃ bibharāṃ babhūva |
kṣitīśvaraḥ pūrvakṛtānavadyapuṇyaprabhāvopanataṃ krameṇa

na tasya kiṃpākaphalopamāś calā mano manovibhramamātrabhadrikāḥ |
svabhāgadheyopanatā vibhūtayo babandhur āryaprakṛter mahātmanaḥ

pariśramas tasya babhūva yautako mahākṛpādhīnamater mahīpateḥ |
prabhutvam āsīj jagatāṃ tv abādhithaṃ vibhūtisaṃbhogasukheṣu bhūriṣu

na tasya mātsaryatamo'vaguṇṭhanaṃ babhūva gātreṣv api mānasaṃ yadā |
tadā kathaivoparatāsukhāgate tṛṇopame śokanibandhane dhane

taṃ kila mahātmānam anyatamaḥ pārthivo 'tṛptaḥ svarājyaśriyā parityaktadharmayaśāḥ sukhasādhanopāyadāruṇaḥ svarājyād uccālayitum upacakrame |
saṃprāpya bhogān mahato 'py anāryāḥ panthānam āryācaritaṃ vilaṅghya |
tṛṣṇāparītāḥ karuṇātmakeṣu sādhuṣv api krodhaviṣaṃ vamanti

bhaiṣajyavṛkṣā iva ye kadā cit kva cit kathaṃ cij jagato hitāya |
bhavanti tān apy upataptacittāḥ krodhāgninā kāpuruṣā dahanti

kurvīta ko nāma manuṣya āryaḥ sacetanas teṣu manaḥpradoṣam |
yeṣāṃ yaśobhiḥ kumudāvadātair udbhāsitānīva digantarāṇi

atha dharaṇirajobhiḥ śārikākaṇṭhadhūmrais turagakhuranipātaprodgataiś chādayan kham |
sa nṛpatir upatasthe mattamātaṅgasainyair upavanatarupūgān ārujan meghanīlān

udadhir iva yugānte plāvayaṃl lokam antarlulitamakarapucchacchinnacañcattaraṅgaḥ |
sa nṛpabalasamūho nagnanistriṃśapattrasphuritaravimayūkhas tatpuraṃ saṃrurodha

upanatam api puṇyair vipralambhāvasānaṃ dhig anupaśamakāri śrīsukhaṃ pārthivānām |
piśitam iva vipūti kravyabhugmaṇḍalānāṃ yad iha bhavati puṃsāṃ vairavairasya mūlam

atha bodhisattvaḥ prāg eva viditaviṣayadoṣavairavairaḥ saṃrambhavipralabhādyanarthabhūyiṣṭhaṃ rājyam atimanyamānaḥ svasukhasaṃbhogābhiṣvaṅgadainyānupakliṣṭamānasaś cintayāṃ babhūva |
dhig astv anāryaṃ viṣayāśrayaṃ sukhaṃ samīraṇoddhūtalatāntacañcalam |
upāsate yatra nibaddhamānasā narā daśāṃ bandhujanopatāpinīm

vātoddhūtataraṅgitadhvajaśikhāpratyāhatāmbhodharaṃ
dānaprasrutisiktadantamusalakrūradvipendrākulam |
śakto 'rātibalaṃ vihantum akhilaṃ bāhudvitīyo 'py ahaṃ
rakṣed akṣatacāriṇī yadi kṛpā māteva māṃ nāpadi

yā vā śrīr adhigamyate paravadhavyāsaṅgadagdhātmanā
tāṃ vāñched bhramaropagītakusumāṃ ko vadhyamālām iva |
yo 'pi svārhanibandhanapraṇayinā saṃprasthito vartmanā
prāg eva vyasanāturasya jagato yo 'haṃ hitāyodyataḥ

api ca
rājye 'paro yadi mama praṇayaṃ karoti pūjyo mayā nanu viśeṣata eva rājā |
rājyāśrayaṃ khalu parārtham ahaṃ bibharmi saṃkleśabhāram imam āyataduḥkhahetum

atithir iva yato 'yaṃ mānanīyo narendro madupahitavibhūtiprārthanākṛṣṭacetāḥ |
upacitakuśalatvāc cānukampāviśeṣāt suta iva vinayārthaṃ ko 'tra kopāvakāśaḥ

unmocayaty eva balāc ca yo māṃ rājyābhidhānād vyasanapratānāt |
yady atra kuryāṃ manasaḥ prakopaṃ pāpo 'paraḥ ko 'tha mayā samaḥ syāt

rājyasya doṣāvayave niveśaṃ prakhyāpayan hanti yaśaḥsukhāni |
mām arthataḥ śikṣayate narendro rājyābhidhāne tamasi bhramantam