Jātakamālā · Verses 10-29

iti tenoditaṃ śrutvā prathamaḥ sa upāsakaḥ |
karṇau pidhāya hastābhyāṃ tam evaṃ paryabhāṣata

dhik tvām asadbuddhim asatpralāpinam [!] evaṃ hy api tvaṃ pratibhāṣase 'tra |
kasmān muneḥ śāstur upāsako 'pi saddharmamūrtiṃ pratinindase 'dya

kathaṃ na jihvā patitā tavānanād asatpralāpāpahatā tapasvinī |
apuṇyarāśir bhagavān iti bruvan kathaṃ na magnas tvam are rasātale

dhig apraśastām asatāṃ duratyayāṃ pṛthagjanānāṃ prakṛtiṃ calācalām |
vimarśam aprāpya yatheṣṭacāriṇī karoti yā lokam apāyagocaram

sudāruṇair āyudhabhīmadarśanair arātibhiḥ sārdham aho varaṃ gatam |
tvayā suhṛcchadmanigūḍhapāpmanā padaṃ na caikaṃ vitathapralāpinā

namanti yaṃ brahmavido maharṣayaḥ punāti yo viśvam idaṃ vṛṣāṃśubhiḥ |
apuṇyarāśir yadi sa vratīśvaras tathāgataḥ puṇyanidhiḥ kuto 'paraḥ

muneḥ paroddhāranimittamātram apy upaiti yasyoddhṛtakalmaṣo 'pi san |
sa yogaparyantavidāṃ dhuri sthito na puṇyarāśir yadi ko nv ihāparaḥ

na yasya buddhiḥ pratihanyate kva cin na ca praheyāvayavo 'vaśiṣyate |
na cāsti saṅgo jagadarthasādhane sa puṇyarāśir na kathaṃkathāntaśaḥ

taduktaṃ sa samākarṇya dvitīyopāsakas [!] tataḥ |
prāgalbhavacasā bhūya āyuṣmantaṃ tam abravīt

hitakāmyatayā niratyayaṃ vacanaṃ kāmam idaṃ sakhe tava |
anuyujya tathāpi śobhate vitathaṃ sādhur udīrayan bhavān

mama bhaktir udāraśāsane sugate yā paramānukampake |
viditā tava sā tathāpi māṃ sahasā saumya kathaṃ vigarhase

āpātālpasukhābhimānarasikaṃ paryantariktāśrayaṃ
sāyāsaṃ sabhayaṃ prasaṅgavirasaṃ dhig laukikaṃ saṃgatam |
yan nāmaivam akāraṇoddhataruṣo mithyāvikalpair hataṃ
gacchaty ekapade kṣayaṃ paricayaṃ vikṣipya mūrdhno 'ntikam

etat tenoditaṃ śrutvā prathamaḥ sa upāsakaḥ |
anyathā tadvaco matvā manasaivaṃ vyacintayat

aho hy anyad anenoktam anyan mayā vikalpitam |
iti cintāviṣaṇṇātmā tasthau lajjāhatāśayaḥ

dṛṣṭvā sa ca sahāyas taṃ lajjāvanamitānanam |
tadabhiprāyam ājñātuṃ prasahya caivam abravīt

sādho kiṃ manyase hy atra yat te lajjāhataṃ mukham |
tāvat te yad abhiprāyaṃ tat pracakṣva mamāgrataḥ

tasyaitad vacanaṃ śrutvā sa āyuṣmān upāsakaḥ |
tanmano'ntargataṃ sarvam abhiprāyaṃ vyamuñcata

cittaṃ yatra prasādya kṣaṇam api manujo 'nuttame dakṣiṇīye
śrīsaubhāgyaprakarṣaṃ bhavagatiṣu paraṃ prāpya nirdvandvaramyam |
paścād ālokya lokaṃ vitathavilapitaṃ pratyayagrāhamātraṃ
jñātvā prāpnoti śāntaṃ katham iva na mahān puṇyarāśir bhavet saḥ

dattvā palālaśakalasrajam agrasattve lebhe bhavopaśamaśāntisukhāni nārī |
yasminn acintyacaritātiśayaprabhāve kiṃ puṇyarāśir ayam ity avidagdham etat

kośātakīkusumam api pradāya stūpe muneḥ paramakāruṇikasya yasya |
bhuktvālaye guṇavibhūtisukhaprakarṣaṃ lebhe 'ṅganāmṛtapurapratipatsamṛddhim