Jātakamālā · Verses 87-106

api ca mahārāja ||
yeṣām asmīty ayam apagataś cetaso vipralambho
yair adhyastaṃgamitam aśivaṃ skandhasaṃtānabījaṃ |
ye paśyanti vyasanadahanair ā bhavāgrāt pradīptaṃ
lokaṃ teṣāṃ na bhavati mano lokacitrānupāti

nityasrāviṇam agnimadhyanihitaṃ kumbhaṃ yathā medasāṃ
ye lokārtham anarthabhāravirasaṃ santo vahanty āśrayaṃ |
teṣāṃ ratnaśilālavālavalayāḥ kalpadrumā nandane
lūtātantuvitānadhūmaśikharaiḥ kāntāravṛkṣaiḥ samāḥ

āvir bhavanti tanavo 'pi paropakārā yasmiṃs tad eva ramaṇīyam upaiti sādhuḥ |
duḥkheṣv anātmasu caleṣv aparāyaṇeṣu kiṃ vā bhaveṣu ratikāraṇam asti rājan

svārthānurāgakṛpaṇā matayo narāṇāṃ tucche 'pi vastuni ratiṃ parikalpayanti |
utpāda eva mahatāṃ hi jagaddhitāya yeṣāṃ purandarapure 'pi na te ramante

prakṛticañcalākulaprasaraṃ yaiś cittam etad vaśīkṛtaṃ |
ratir udeti nānyatas teṣāṃ adhyātmacintāvihāriṇām

ramayanty anuddhṛtavikalpasāyakān saritaḥ sarāṃsi girayo vanāni ca |
avikalpagocaravicāriṇo yater vanam eva śāntam iti niścitā matiḥ

ajitātmanām anupatanti buddhayo vividhān bahirmukhamanonibandhanān |
adhicittayogaviduṣāṃ tu yogināṃ atimānuṣe carati gocare matiḥ

rajasāṃ vipūyapariṇāhimaṇḍalaṃ paramām avāpya vaśitāṃ svacetasi |
anapāyinīm anubhavanti ye ratiṃ bhavanaṃ vanaṃ ca samam eva tān prati

viṣayāntarāntaritavibhramaṃ manaḥ praśame rameta katham ity ato yateḥ |
upadiśyate vanatarupratiśrayo mahatāṃ samaṃ tu viṣayaṃ manaḥsukhaṃ

ramaṇīyam etad iti vikṛtaṃ mateḥ pravadanty a vandhya vacasaḥ purātanāḥ |
kṛtināṃ mano hatavikalpavāsanaṃ na samādhijeṣv api sukheṣu rajyate

jagatāṃ hiteṣu caratāṃ mahīpate karuṇaikatānamanasāṃ manasvinām |
bhavati vyathātanupariśramais tanor na ca kāyajīvitanikāntividviṣām

gaganopamānamanasāṃ spṛśanty amī na manaḥ sukhārativikalpareṇavaḥ |
sukham anyad eva tad apākṛtopamaṃ yad upāsate sukṛtino raṇaṃjahāḥ

vratinām adūraparisarpiṇī manaḥsthitir eva nāma jananīva vatsalā |
sukham ādadhāti tad atītamānuṣaṃ na marutpater api yad asti vajriṇaḥ

vihatapriyāpriyavikalpavibhramaḥ pṛthivīsamena viharanti cetasā |
nṛpa yatra tatra bhavabhoganiḥspṛhā munayo 'tiśāntasukhamaunalābhinaḥ

aniketasaṃstavaparigrahāgrahāḥ svajane jane ca samatāvihāriṇaḥ |
tribhavopapattigahanāntadarśino himavadvaneṣu ratim āpnuyuḥ kathaṃ

sukhaduḥkhayor aviṣamapravṛttayo nṛpa yena tena parituṣṭamānasāḥ |
satataṃ mṛgā iva nisargatāpasā viharanty anāvṛtavihāragocarāḥ

visṛtāṃ bhavadrumaśikhāvalambinīṃ vividhopatāpaparuṣāṃ viṣaktikāṃ |
upahātya ye padam upāsate śivaṃ tridive 'pi te narakavāsasaṃjñinaḥ

anubandhiniṃ pratinivārya saṃhatiṃ tamasāṃ kim apy anubhavanti ye sukhaṃ |
na sanatkumārabhavane 'pi te ratiṃ viratopasargaratayaḥ prakurvate

vanarājayaḥ kusumacitrapādapāḥ girayaḥ kadambatarucumbitāmbudāḥ |
saritaś ca haṃsakulabhinnavīcayaḥ paridurbale manasi labdhapravṛttayaḥ

śiraḥkaṃpollasaccārukuṇḍalaḥ sa mahīpatiḥ |
sādhu sādhv iti saṃrādhya pratijagrāha tadvacaḥ