indrakṛtaśrīrāmastotram · Chapter 1

indra uvāca
bhaje'haṃ sadā rāmamindīvarābhaṃ bhavāraṇyadāvānalābhābhidhānam /
bhavānīhṛdā bhāvitānandarūpaṃ bhavābhāvahetuṃ bhavādiprapannam

surānīkaduḥkhaughanāśaikahetuṃ narākāradehaṃ nirākāramīḍyam /
pareśaṃ parānandarūpaṃ vareṇyaṃ hariṃ rāmamīśaṃ bhaje bhāranāśam

prapannākhilānandadohaṃ prapannaṃ prapannārtiniḥśeṣanāśābhidhānam /
tapoyogayogīśabhāvābhibhāvyaṃ kapīśādimitraṃ bhaje rāmamitram

sadā bhogabhājāṃ sudūre vibhāntaṃ sadā yogabhājāmadūre vibhāntam /
cidānandakandaṃ sadā rāghaveśaṃ videhātmajānandarūpaṃ prapadye

mahāyogamāyāviśeṣānuyukto vibhāsīśa līlānarākāravṛttiḥ /
tvadānandalīlākathāpūrṇakarṇāḥ sadānandarūpā bhavantīha loke

ahaṃ mānapānābhimattapramatto na vedākhileśābhimānābhimānaḥ /
idānīṃ bhavatpādapadmaprasādāttrilokādhipatyābhimāno vinaṣṭaḥ

sphuradratnakeyūrahārābhirāmaṃ dharābhārabhūtāsurānīkadāvam /
śaraccandravaktraṃ lasatpadmanetraṃ durāvārapāraṃ bhaje rāghaveśam

surādhīśanīlābhranīlāṅgakāntiṃ virādhādirakṣovadhāllokaśāntim /
kirīṭādiśobhaṃ purārātilābhaṃ bhaje rāmacandraṃ raghūṇāmadhīśam

lasaccandrakoṭiprakāśādipīṭhe samāsīnamaṅke samādhāya sītām /
sphuraddhemavarṇāṃ taḍitpuñjabhāsāṃ bhaje rāmacandraṃ nivṛttārtitandram

// iti śrīmadadhyātmarāmāyaṇe yuddhakāṇḍe trayodaśasarge
indrakṛtaśrīrāmastotraṃ sampūrṇam //