ઇન્દ્રકૃતશ્રીરામસ્તોત્રમ્ · અધ્યાય 1

ઇન્દ્ર ઉવાચ
ભજેઽહં સદા રામમિન્દીવરાભં ભવારણ્યદાવાનલાભાભિધાનમ્ ।
ભવાનીહૃદા ભાવિતાનન્દરૂપં ભવાભાવહેતું ભવાદિપ્રપન્નમ્

સુરાનીકદુઃખૌઘનાશૈકહેતું નરાકારદેહં નિરાકારમીડ્યમ્ ।
પરેશં પરાનન્દરૂપં વરેણ્યં હરિં રામમીશં ભજે ભારનાશમ્

પ્રપન્નાખિલાનન્દદોહં પ્રપન્નં પ્રપન્નાર્તિનિઃશેષનાશાભિધાનમ્ ।
તપોયોગયોગીશભાવાભિભાવ્યં કપીશાદિમિત્રં ભજે રામમિત્રમ્

સદા ભોગભાજાં સુદૂરે વિભાન્તં સદા યોગભાજામદૂરે વિભાન્તમ્ ।
ચિદાનન્દકન્દં સદા રાઘવેશં વિદેહાત્મજાનન્દરૂપં પ્રપદ્યે

મહાયોગમાયાવિશેષાનુયુક્તો વિભાસીશ લીલાનરાકારવૃત્તિઃ ।
ત્વદાનન્દલીલાકથાપૂર્ણકર્ણાઃ સદાનન્દરૂપા ભવન્તીહ લોકે

અહં માનપાનાભિમત્તપ્રમત્તો ન વેદાખિલેશાભિમાનાભિમાનઃ ।
ઇદાનીં ભવત્પાદપદ્મપ્રસાદાત્ત્રિલોકાધિપત્યાભિમાનો વિનષ્ટઃ

સ્ફુરદ્રત્નકેયૂરહારાભિરામં ધરાભારભૂતાસુરાનીકદાવમ્ ।
શરચ્ચન્દ્રવક્ત્રં લસત્પદ્મનેત્રં દુરાવારપારં ભજે રાઘવેશમ્

સુરાધીશનીલાભ્રનીલાઙ્ગકાન્તિં વિરાધાદિરક્ષોવધાલ્લોકશાન્તિમ્ ।
કિરીટાદિશોભં પુરારાતિલાભં ભજે રામચન્દ્રં રઘૂણામધીશમ્

લસચ્ચન્દ્રકોટિપ્રકાશાદિપીઠે સમાસીનમઙ્કે સમાધાય સીતામ્ ।
સ્ફુરદ્ધેમવર્ણાં તડિત્પુઞ્જભાસાં ભજે રામચન્દ્રં નિવૃત્તાર્તિતન્દ્રમ્

॥ ઇતિ શ્રીમદધ્યાત્મરામાયણે યુદ્ધકાણ્ડે ત્રયોદશસર્ગે
ઇન્દ્રકૃતશ્રીરામસ્તોત્રં સમ્પૂર્ણમ્ ॥