herambopasthānam · Chapter 1

// herambopasthānam //
prathamaḥ khaṇḍaḥ (śaśivadanāvṛttam)
śriyamasamānāṃ mama śubhanāmā /
diśatu gaṇānāṃ patiratidhāmā

vijitajarādhiṃ vinihatarogam /
dviradamukho me vitaratu yogam

vitaratu mahyaṃ nijapadabhakttim /
gaṇapatiragrayāmapi bhujaśakttim

haratanayo me vibhuratihṛdyam /
vitaratu bhūtapravimalavidyām

mama karivaktraḥ prabhuranavadyām /
diśatu bhaviṣyadvidamuḍuvidyām

nijaviṣayājiṣvaghahimabhāno /
imamavijeyaṃ kuru harasūno

sumadhuramādhvīdharapadajātam /
karimukha dāsaṃ kuru kavimetat

gaṇapatirūpaṃ manasi karomi /
gaṇapatikirtīṃ vacasi tanomi

mama gaṇanāthaḥ śamayatu pāpam /
sapadi vimuṣṇātvapi paraśāpam

śaśivadanānāṃ navakṛtireṣā /
bhajatu gaṇeśaṃ patimiva yoṣā

dvitīyaḥ khaṇḍaḥ (madalekhāvṛttam)
āha prājñajanastvāṃ mūlādhāraniśāntam /
mande suptamibhāsya jñe yuktte vilasantam

asti vyomni gururyastasyaiva tvamihāsi /
vidhneśānavivartaḥ sadbhakteṣu vibhāsi

ko'pi prābhavaśālī mūlādhāravihārī /
prajñāsiddhivadhūbhyaṃ śliṣṭo bhātyaghahārī

āśā me tava śakttiṃ dehe draṣṭumapārām /
pātuṃ ceśvarasūno mūrdhanyāmṛtadhārām

yā cit sā tava mātā yaḥ śreṣṭhaḥ sa pitā te /
siddhirbāhyamatirye te nātha pramade te

yā lipsā hṛdaye me tāṃ pūrṇāṃ kuru mā vā /
eṣāṅgīkriyatāṃ me mattebhānana sevā

nā khe yāti suro vā tvaṃ cet kiñcidudāsyam /
ādhāre vidadhāsi skandasyāgraja lāsyam

na svārthe mama yatno niḥsvārthe mama so'yam /
udyogaḥ śivasūno sadyo dehi sahāyam

māhātmyaṃ nanu vakttuṃ kaḥ śakttaḥ puruṣaste /
hastīndrānana bhāgyaṃ sarveṣāṃ tava haste

etaḥ sammadakatrīrhairambīrmadalekhāḥ /
sevantāṃ kavibhṛṅgāścāndrīrbhā iva lekhāḥ

tṛtīya khaṇḍaḥ (indravajrāvṛttam)
ekādaśānāṃ pravaraṃ sutānāṃ rudrasya mantradhipatiṃ namāmi /
śāstrāṇi sarvāṇyapi yasya kīlāḥ sūryānapohyaṃ timiraṃ haranti

prājñena buddhayā yadakāri padyaṃ sadhāraṇastatra tavopakāraḥ /
heramba yanmantramṛṣiścakāra vyaktoviśiṣṭastava tatra yatra

jihvāsthalaṃ nātha vigāhamānaṃ tvāmāhurucchiṣṭamayi chaloktyā /
ucchiṣṭatā cettava rudrasūno svādhyāyaniṣṭhīvanatorbhidā kā

sarvāṇi dhānyāni ca bhakṣayantaṃ dantaiḥ śitairdeva sahāyavantam /
etaṃ bilasthaṃ rasanāhvayaṃ te vāhaṃ vido mūṣikamāmananti

ādhāracakre vasato gaṇeśa jyotirmayāṇorjvalataḥ sadāte /
ekaḥ pacatyannamaśeṣamūṣmā samprrerayantya imāstu vācaḥ

vaiśvānaro'gniḥ sakalasya jīvo vāgindriyāgniḥ śivanandana tvam /
yo veda naiva yuvayorvibhedaṃ piṇḍeṣu nā muhyati sa prasaṅge

tvāṃ brahmaṇaspatyabhidhānamāhuḥ kecidvibhorīśapadasya putram /
anyairbṛhaspatyabhidhāna ukto dhīrairvibhorindrapadasya mantrī

jihvaiva vedistava toyapūtā lokaprasaṅgastava tatra dhūmaḥ /
jvālā jagannāthakathā pavitrā ceto ghṛtaṃ juhyati yatra santaḥ

vidyunmayīmūrtiragādi jiṣṇoryā maunibhiḥ saiva tava svarūpam /
indrasya bhedastava codito yaḥ sa prāṇavidyuttanubhedamūlaḥ

divyāgrigātraṃ dhiṣaṇā kalatraṃ bhargasya putraṃ praṇatasya mitram /
divyāgriruco bhajantāmetāḥ karīndrānanamindravajrāḥ

caturthaḥ khaṇdaḥ (vasantatilakavṛttam)
kiṃ bṛṃhitāni kuruṣe kaluṣeṇa bhagne
magne mahāvipadi deva nije vivarte /
nidrāmi cedvarada bodhaya hastaghātā -
dgacchāmi cedapathamāśu nivartayasva

veṣastvāyamaparo yadi deva nāṭya-
mārabhyatāṃ taducittaṃ kimupaiṣi maunam /
etāṃ prabho yavanikāmapasārayantu
sakṣādgaṇāstava kutaḥ kriyate vilambaḥ

etattamo nayanaśakttiharaṃ guhāyaṃ
margaṃ ruṇaddhi na vilokitumasmi śakttaḥ /
sreho'sti kācana daśāsti vibho kaṭākṣa-
jyotirlava sadaya dehi puro vrajeyam

ghoraṃ karomi na tapo yadi te'parādhaḥ
kiṃ preraṇaṃ na kṛtavānasi rudrasūno /
sampreritaśca bhavatā yadi nācareyaṃ
sampreraṇasya tava kā gajavaktra śakttiḥ

kāryaṃ na me kimapi tat khalu nirjarāṇāṃ
rūpaṃ na me kimapi tattava ko'pi veṣaḥ /
iṣṭaṃ nu kaṣṭamatha kasya karīndravaktra
śiṣṭaṃ tu me kimapi nāma narāṅgasaṅgi

nāmāpi tattava bhavatyathavā gajāsya
carcā vinaśvaratame tanukañcuke kā /
viṣṇorivendudhavalaṃ bhavitā yaśaścet
taddantakāntiṣu tavaiva layaṃ prayātu

sthūlāṃ tanūmasumaśeṣamanorathānāṃ
sthānaṃ manaśca dhiṣaṇāṃ pramadaṃ ca mūlam /
ākramya kośamakhilaṃ ca vibho khalāre
vidhnādhirāja mayi darśaya te vibhūtim

devī matirjalapatraviśālanetrā
devī ca siddhirakalaṅkasudhākarāsyā /
chayoṣṇatā ca dinanāthamiva jvalantaṃ
nityaṃ bhavantamibhavaktra vibho bhaje te

siddhendraveṣabhṛti bhūmihitāya rudre
kailāsaśailamadhitiṣṭhati vajrapāṇiḥ /
dhṛtvā gajendramukhaveṣamamuṣya putro
bhūtvā vibhurnayati pāriṣadānaśeṣān

sammodayantu hṛdayaṃ dviradānanasya
devasya siddhidhiṣaṇā hṛdayeśvarasya /
etā vasantatilakāḥ kavikuñjareṇa
gītāḥ kayā'pyamalabhāvanayā yutena

// iti śrībhagavanmaharṣiramaṇāntevāsino vāsiṣṭhasya narasiṃhasūnoḥ gaṇapateḥ kṛtirherambopasthānaṃ samāptam //