herambastotraṃ gaurikṛtam · Chapter 1

// herambastotraṃ gaurikṛtam //
śrī gaṇeśāya namaḥ /
gauryuvāca /
gajānana jñānavihārakārinna māṃ ca jānāsi parāvamarṣām /
gaṇeśa rakṣasva na ceccharīraṃ tyajāmi sadyastvayi bhaktiyuktā

vighneśa heramba mahodara priya lambodara premavivardhanācyuta /
vighnasya hartā'surasaṅghahartā māṃ rakṣa daityātvayi bhaktiyuktām

kiṃ siddhibuddhiprasareṇa mohayukto'si kiṃ vā niśi nidrito'si /
kiṃ lakṣalābhārthavicārayuktaḥ kiṃ māṃ ca vismṛtya susaṃsthito'si

kiṃ bhaktasaṅgena ca devadeva nānopacāraiśca suyantrito'si /
kiṃ modakārthe gaṇapāddhṛto'si nānāvihāreṣu ca vakratuṇḍa

svānandabhogeṣu parihṛto'si dāsīṃ ca vismṛtya mahānubhāva /
ānantyalīlāsu ca lālaso'si kiṃ bhaktarakṣārthasusaṅkaṭasthaḥ

aho gaṇeśāmṛtapānadakṣāmaraistathā vā'surapaiḥ smṛto'si /
tadarthanānāvidhisaṃyuto'si visṛjya māṃ dāsīmananyabhāvām

rakṣasva māṃ dīnatamāṃ pareśa sarvatra citteṣu ca saṃsthitastvam /
prabho vilambena vināyako'si brahmeśa kiṃ deva namo namaste

bhaktābhimānīti ca nāma mukhyaṃ vede tvabhāvān nahi cenmahātman /
āgatya hatvā'ditijaṃ sureśa māṃ rakṣa dāsīṃ hṛdi pādaniṣṭhām

aho na dūraṃ tava kiñcideva kathaṃ na buddhīśa samāgato'si /
sucintyadeva prajahāmi dehaṃ yaśaḥ kariṣye viparītamevam

rakṣa rakṣa dayāsindho'parādhānme kṣamasva ca /
kṣaṇe kṣaṇe tvahaṃ dāsī rakṣitavyā viśeṣataḥ

stuvatyāmeva pārvatyāṃ śaṅkaro bodhasaṃyutaḥ /
babhūva gaṇapānāṃ vai śrutvā hāhāravaṃ vidheḥ

gaṇeśaṃ manasā smṛtvā vṛṣārūḍhaḥ samāyayau /
kṣaṇena daityarājaṃ taṃ dṛṣṭvā ḍamaruṇāhanat

tataḥ so'pi śivaṃ vīkṣyāliṅgituṃ dhavito/ābhavat /
śivasya śūlikādīni śastrāṇi kuṇṭhitāni vai

taṃ dṛṣṭvā paramāścaryaṃ bhayabhīto maheśvaraḥ /
sasmāra gaṇapaṃ so'pi nirvighnārthaṃ prajāpate

pārvatyāḥ stavanaṃ śrutvā gajānanaḥ samāyayau /
iti mudgalapurāṇoktaṃ herambastotraṃ sampūrṇam /