hemakāmākṣīdaṇḍakam · Chapter 1

// śrīhemakāmākṣīdaṇḍakam //
oṃkārātmaka-bhāsi-rūpyavalaye saṃśobhi hemaṃ mahaḥ
bibhratkeliśukaṃ trayīkalagiraṃ dakṣeṇa hastena ca/
vāme laṃbakaraṃ tribhaṅgi-subhagaṃ dīnārtanamratpadaṃ
svānte dīvyatu me kaṭākṣa-śubhadaṃ mandasmitodārakam //
dakṣiṇe kāmajidyasyāḥ cūḍāyāṃ kāmavallabhaḥ/
vāsaḥ kāmāyudhasyādhaḥ kāmākṣīṃ tāṃ namāmyaham //
kāmāndhā tilakaṃ yasyāḥ kāmamālī ca putrakaḥ/
kāmāndhopama-vāṇīṃ tāṃ kāmākṣīṃ praṇamāmyaham //
gāṅgamātā tu yā devī gāṅgamālā-virājitā/
gāṃ gatā rakṣituṃ martyān gāṅgadehāṃ namāmi tām //
jayaikāmreśvarārdhāṅgi jaya tañjā-vilāsini/
jaya baṅgārukāmākṣi jaya sarvārtha-dāyini //
jaya janani surāsurastoma-saṃsevyamānātipuṇyapradeśa-pramukhyāmadhiṣṭhāya
kāñcīṃ svamūlasvarūpeṇa bhakteṣṭa-sandānacintāmaṇe! mañjusaṃbhāṣaṇe!
bhāmaṇe!
mūladevītṛtīyākṣisañjāta-tejonurūpāṃ suvarṇāṃ sumūrtiṃ vidhāyāmba!
vaṇīpatistvāṃ dhruve caikadeśe pratiṣṭhāpya kāñcyāṃ
vivāhotsavaṃ cāru nirvṛtya caikāmranāthena
kāmākṣi! saṃyojayāmāsa cākāśabhūpālamevātra kartuṃ mahaṃ te sadā //
kāmakoṭī supīṭāvamardena naṣṭekṣaṇaḥ padmabhū-ścakrapūjāṃ tathārādhanaṃ te
svanuṣṭhaya cakṣuḥ prakāśaṃ prapede bhṛśaṃ //
yavanajanita-ghorakarnāṭakānīka-kāle nu
durvāsasaśśiṣyamukhyair-varasthānikai-rāśu śeñciṃ
prapadyāmba! santānabhūpālasaṃpūjitā'bhūḥ//
tataścoḍyārpālaya-svāminā tvaṃ samārādhitā''sī-ścirāyā'tha
gatvā bahūn grāmadeśānmudā hāṭakakṣetra-saṃśobhamānā sudīrghāssamā-statra
nītvā'tha, tañjāpurādhīśa-bhāgyaprakarṣeṇa
saṃprāpya tañjāṃ ca pūtāṃ, suhṛttūlajendrākhyarājenasaṃsthāpitā'smin
śubhe mandire rāmakṛṣṇālayābhyantarābhāsi tena pradattāṃ bhuvaṃ cāpi
labdhvā'tra durvāsasā''diṣṭa-
saubhāgyacintāmaṇiproktapūjāṃ nu kurvanti te sādhavaḥ//
śarabhamahipa-vardhitānekabhāgaṃ ca te mandiraṃ
kāñcīpīṭhādhināthaprakāṇḍairatho dharmakartṛ-
pramukhyaiśca devālayānalpavittavyayenātinūtnīkṛtaṃ tat //
śśāṅkāvataṃse, sugatyā jitonmattahaṃse, rucātītahaṃse, natāṃse //
tulāmīnamāsāttasatphalgunīṛkṣa śobhādineṣvatra janmodvahādyutsavaṃ,
śārade rātrikāle pramukhyotsavaṃ
cātisaṃbhārapūrveṇa divyābhiṣekeṇa saṃbhāvantyamba!
te bhaktavṛndāḥ//sadānandakande! sumātaṅganande!
acchakundābhadante! śubhe! gandhamārjārareto-'bhisaṃvāsite!
jānakījāni-saṃvandite! jāmadagnyena sannandite!
madhura-sukavimūkasaṃślādhite! pūjyadurvāsa-sārādhite!
dhaumyasadbhakta-saṃbhāvite! śaṅkarācārya-saṃsevite!
kāñcipīṭheśvaraiḥ pūjite! śyāmaśāstrīti-vikhyāta-saṅgītarāṭ-kīrtite!
tañjapūrvāsi-saubhāgyadātrīṃ pavitrīṃ sadā bhāvaye tvāṃ varākāḥ //
kṛpāsāndra-dṛṣṭiṃ kuruṣvāmba! śīghraṃ manaḥ
śuddhimacchāṃ ca dehyātmavidyāṃ kṣamasvāparādhaṃ
mayā yatkṛtaṃ te, prayacchātra-saukhyaṃ paratrāpi nityaṃ,
vidhehyaṅghripadme dṛḍhāṃ bhaktimārāt,
namaste śive dehi me maṅgalaṃ, pāhi kāmākṣi māṃ, pāhi kāmākṣi mām //
// ॐ tatsat //