હેમકામાક્ષીદણ્ડકમ્ · અધ્યાય 1

॥ શ્રીહેમકામાક્ષીદણ્ડકમ્ ॥
ઓંકારાત્મક-ભાસિ-રૂપ્યવલયે સંશોભિ હેમં મહઃ
બિભ્રત્કેલિશુકં ત્રયીકલગિરં દક્ષેણ હસ્તેન ચ।
વામે લંબકરં ત્રિભઙ્ગિ-સુભગં દીનાર્તનમ્રત્પદં
સ્વાન્તે દીવ્યતુ મે કટાક્ષ-શુભદં મન્દસ્મિતોદારકમ્ ॥
દક્ષિણે કામજિદ્યસ્યાઃ ચૂડાયાં કામવલ્લભઃ।
વાસઃ કામાયુધસ્યાધઃ કામાક્ષીં તાં નમામ્યહમ્ ॥
કામાન્ધા તિલકં યસ્યાઃ કામમાલી ચ પુત્રકઃ।
કામાન્ધોપમ-વાણીં તાં કામાક્ષીં પ્રણમામ્યહમ્ ॥
ગાઙ્ગમાતા તુ યા દેવી ગાઙ્ગમાલા-વિરાજિતા।
ગાં ગતા રક્ષિતું મર્ત્યાન્ ગાઙ્ગદેહાં નમામિ તામ્ ॥
જયૈકામ્રેશ્વરાર્ધાઙ્ગિ જય તઞ્જા-વિલાસિનિ।
જય બઙ્ગારુકામાક્ષિ જય સર્વાર્થ-દાયિનિ ॥
જય જનનિ સુરાસુરસ્તોમ-સંસેવ્યમાનાતિપુણ્યપ્રદેશ-પ્રમુખ્યામધિષ્ઠાય
કાઞ્ચીં સ્વમૂલસ્વરૂપેણ ભક્તેષ્ટ-સન્દાનચિન્તામણે! મઞ્જુસંભાષણે!
ભામણે!
મૂલદેવીતૃતીયાક્ષિસઞ્જાત-તેજોનુરૂપાં સુવર્ણાં સુમૂર્તિં વિધાયામ્બ!
વણીપતિસ્ત્વાં ધ્રુવે ચૈકદેશે પ્રતિષ્ઠાપ્ય કાઞ્ચ્યાં
વિવાહોત્સવં ચારુ નિર્વૃત્ય ચૈકામ્રનાથેન
કામાક્ષિ! સંયોજયામાસ ચાકાશભૂપાલમેવાત્ર કર્તું મહં તે સદા ॥
કામકોટી સુપીટાવમર્દેન નષ્ટેક્ષણઃ પદ્મભૂ-શ્ચક્રપૂજાં તથારાધનં તે
સ્વનુષ્ઠય ચક્ષુઃ પ્રકાશં પ્રપેદે ભૃશં ॥
યવનજનિત-ઘોરકર્નાટકાનીક-કાલે નુ
દુર્વાસસશ્શિષ્યમુખ્યૈર્-વરસ્થાનિકૈ-રાશુ શેઞ્ચિં
પ્રપદ્યામ્બ! સન્તાનભૂપાલસંપૂજિતાઽભૂઃ॥
તતશ્ચોડ્યાર્પાલય-સ્વામિના ત્વં સમારાધિતાઽઽસી-શ્ચિરાયાઽથ
ગત્વા બહૂન્ ગ્રામદેશાન્મુદા હાટકક્ષેત્ર-સંશોભમાના સુદીર્ઘાસ્સમા-સ્તત્ર
નીત્વાઽથ, તઞ્જાપુરાધીશ-ભાગ્યપ્રકર્ષેણ
સંપ્રાપ્ય તઞ્જાં ચ પૂતાં, સુહૃત્તૂલજેન્દ્રાખ્યરાજેનસંસ્થાપિતાઽસ્મિન્
શુભે મન્દિરે રામકૃષ્ણાલયાભ્યન્તરાભાસિ તેન પ્રદત્તાં ભુવં ચાપિ
લબ્ધ્વાઽત્ર દુર્વાસસાઽઽદિષ્ટ-
સૌભાગ્યચિન્તામણિપ્રોક્તપૂજાં નુ કુર્વન્તિ તે સાધવઃ॥
શરભમહિપ-વર્ધિતાનેકભાગં ચ તે મન્દિરં
કાઞ્ચીપીઠાધિનાથપ્રકાણ્ડૈરથો ધર્મકર્તૃ-
પ્રમુખ્યૈશ્ચ દેવાલયાનલ્પવિત્તવ્યયેનાતિનૂત્નીકૃતં તત્ ॥
શ્શાઙ્કાવતંસે, સુગત્યા જિતોન્મત્તહંસે, રુચાતીતહંસે, નતાંસે ॥
તુલામીનમાસાત્તસત્ફલ્ગુનીઋક્ષ શોભાદિનેષ્વત્ર જન્મોદ્વહાદ્યુત્સવં,
શારદે રાત્રિકાલે પ્રમુખ્યોત્સવં
ચાતિસંભારપૂર્વેણ દિવ્યાભિષેકેણ સંભાવન્ત્યમ્બ!
તે ભક્તવૃન્દાઃ॥સદાનન્દકન્દે! સુમાતઙ્ગનન્દે!
અચ્છકુન્દાભદન્તે! શુભે! ગન્ધમાર્જારરેતો-ઽભિસંવાસિતે!
જાનકીજાનિ-સંવન્દિતે! જામદગ્ન્યેન સન્નન્દિતે!
મધુર-સુકવિમૂકસંશ્લાધિતે! પૂજ્યદુર્વાસ-સારાધિતે!
ધૌમ્યસદ્ભક્ત-સંભાવિતે! શઙ્કરાચાર્ય-સંસેવિતે!
કાઞ્ચિપીઠેશ્વરૈઃ પૂજિતે! શ્યામશાસ્ત્રીતિ-વિખ્યાત-સઙ્ગીતરાટ્-કીર્તિતે!
તઞ્જપૂર્વાસિ-સૌભાગ્યદાત્રીં પવિત્રીં સદા ભાવયે ત્વાં વરાકાઃ ॥
કૃપાસાન્દ્ર-દૃષ્ટિં કુરુષ્વામ્બ! શીઘ્રં મનઃ
શુદ્ધિમચ્છાં ચ દેહ્યાત્મવિદ્યાં ક્ષમસ્વાપરાધં
મયા યત્કૃતં તે, પ્રયચ્છાત્ર-સૌખ્યં પરત્રાપિ નિત્યં,
વિધેહ્યઙ્ઘ્રિપદ્મે દૃઢાં ભક્તિમારાત્,
નમસ્તે શિવે દેહિ મે મઙ્ગલં, પાહિ કામાક્ષિ માં, પાહિ કામાક્ષિ મામ્ ॥
॥ ૐ તત્સત્ ॥