gopālastotram · Chapter 1

śrī gaṇeśāya namaḥ /
śrīnārada uvāca /
navīnanīradaśyāmaṃ nīlendīvaralocanam /
ballavīnandanaṃ vande kṛṣṇaṃ gopālarūpiṇam

sphuradbarhidalodbaddhanīlakuñcitamūrdhajam /
kadambakusumodbaddhavanamālāvibhūṣitam

gaṇḍamaṇḍalasaṃsargicalatkuñcitakuntalam /
sthūlaṃ muktāphalodārahārodyotitavakṣasam

hemāṅgadatulākoṭikirīṭojjvalavigraham /
mandamārutasaṃkṣobhacalitāmbarasañcayam

rucirauṣṭhapuṭanyastavaṃśīmadhuraniḥsvanaiḥ /
lasadgopālikāceto mohayantaṃ punaḥ punaḥ

ballavīvadanāmbhojamadhupānamadhuvratam /
kṣobhayantaṃ manastāsāṃ sasmerāpāṅgavīkṣaṇaiḥ

yauvanodbhidehābhiḥ saṃsaktābhiḥ parasparam /
vicitrāmbarabhūṣābhirgopanārībhirāvṛtam

prabhinnāñjanakālindījalakelikalotsukam /
yodhayantaṃ kvacidgopān vyāharantaṃ gavāṃ gaṇam

kālindījalasaṃsargiśītalānilasevite /
kadambapādapacchāye sthitaṃ vṛndāvane kvacit

ratnabhūdharasaṃlagnaratnāsanaparigraham /
kalpapādapamadhyasthahemamaṇḍapikāgatam

vasantakusumāmodasurabhīkṛtadiṅmukhe /
govardhanagirau ramye sthitaṃ rāsarasotsukam

savyahastatalanyastagirivaryātapatrakam /
khaṇḍitākhaṇḍalonmuktamuktāsāraghanāghanam

veṇuvādyamahollāsakṛtahuṅkāraniḥsvanaiḥ /
savatsairunmukhaiḥ śaśvadgokulairabhivīkṣitam

kṛṣṇamevānugāyadbhistacceṣṭāvaśavartibhiḥ /
daṇḍapāśodyatakarairgopālairūpaśobhitam

nāradādyairmuniśreṣṭhairvedavedāṅgapāragaiḥ /
prītisusnigdhayā vācā stūyamānaṃ parātparam

ya evaṃ cintayeddevaṃ bhaktyā saṃstauti mānavaḥ /
trisandhyaṃ tasya tuṣṭo'sau dadāti varamīpsitam

rājavallabhatāmeti bhavetsarvajanapriyaḥ /
acalāṃ śriyamāpnoti sa vāgmī jāyate dhruvam

// iti śrīnāradapañcarātre gopālastotraṃ samāptam //