ગોપાલસ્તોત્રમ્ · અધ્યાય 1

શ્રી ગણેશાય નમઃ ।
શ્રીનારદ ઉવાચ ।
નવીનનીરદશ્યામં નીલેન્દીવરલોચનમ્ ।
બલ્લવીનન્દનં વન્દે કૃષ્ણં ગોપાલરૂપિણમ્

સ્ફુરદ્બર્હિદલોદ્બદ્ધનીલકુઞ્ચિતમૂર્ધજમ્ ।
કદમ્બકુસુમોદ્બદ્ધવનમાલાવિભૂષિતમ્

ગણ્ડમણ્ડલસંસર્ગિચલત્કુઞ્ચિતકુન્તલમ્ ।
સ્થૂલં મુક્તાફલોદારહારોદ્યોતિતવક્ષસમ્

હેમાઙ્ગદતુલાકોટિકિરીટોજ્જ્વલવિગ્રહમ્ ।
મન્દમારુતસંક્ષોભચલિતામ્બરસઞ્ચયમ્

રુચિરૌષ્ઠપુટન્યસ્તવંશીમધુરનિઃસ્વનૈઃ ।
લસદ્ગોપાલિકાચેતો મોહયન્તં પુનઃ પુનઃ

બલ્લવીવદનામ્ભોજમધુપાનમધુવ્રતમ્ ।
ક્ષોભયન્તં મનસ્તાસાં સસ્મેરાપાઙ્ગવીક્ષણૈઃ

યૌવનોદ્ભિદેહાભિઃ સંસક્તાભિઃ પરસ્પરમ્ ।
વિચિત્રામ્બરભૂષાભિર્ગોપનારીભિરાવૃતમ્

પ્રભિન્નાઞ્જનકાલિન્દીજલકેલિકલોત્સુકમ્ ।
યોધયન્તં ક્વચિદ્ગોપાન્ વ્યાહરન્તં ગવાં ગણમ્

કાલિન્દીજલસંસર્ગિશીતલાનિલસેવિતે ।
કદમ્બપાદપચ્છાયે સ્થિતં વૃન્દાવને ક્વચિત્

રત્નભૂધરસંલગ્નરત્નાસનપરિગ્રહમ્ ।
કલ્પપાદપમધ્યસ્થહેમમણ્ડપિકાગતમ્

વસન્તકુસુમામોદસુરભીકૃતદિઙ્મુખે ।
ગોવર્ધનગિરૌ રમ્યે સ્થિતં રાસરસોત્સુકમ્

સવ્યહસ્તતલન્યસ્તગિરિવર્યાતપત્રકમ્ ।
ખણ્ડિતાખણ્ડલોન્મુક્તમુક્તાસારઘનાઘનમ્

વેણુવાદ્યમહોલ્લાસકૃતહુઙ્કારનિઃસ્વનૈઃ ।
સવત્સૈરુન્મુખૈઃ શશ્વદ્ગોકુલૈરભિવીક્ષિતમ્

કૃષ્ણમેવાનુગાયદ્ભિસ્તચ્ચેષ્ટાવશવર્તિભિઃ ।
દણ્ડપાશોદ્યતકરૈર્ગોપાલૈરૂપશોભિતમ્

નારદાદ્યૈર્મુનિશ્રેષ્ઠૈર્વેદવેદાઙ્ગપારગૈઃ ।
પ્રીતિસુસ્નિગ્ધયા વાચા સ્તૂયમાનં પરાત્પરમ્

ય એવં ચિન્તયેદ્દેવં ભક્ત્યા સંસ્તૌતિ માનવઃ ।
ત્રિસન્ધ્યં તસ્ય તુષ્ટોઽસૌ દદાતિ વરમીપ્સિતમ્

રાજવલ્લભતામેતિ ભવેત્સર્વજનપ્રિયઃ ।
અચલાં શ્રિયમાપ્નોતિ સ વાગ્મી જાયતે ધ્રુવમ્

॥ ઇતિ શ્રીનારદપઞ્ચરાત્રે ગોપાલસ્તોત્રં સમાપ્તમ્ ॥