Garuda Purana · Chapter 1.197

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe ṣaṇṇavatyadhikaśatatamo 'dhyāyaḥ
śrīgaruḍamahāpurāṇam- 197
dhanvantariruvāca /
gāruḍaṃ saṃpravakṣyāmi garuḍena hyudīritam /
kaśyapāya sumitreṇa viṣahṛdyena gāruḍaḥ

pṛthivyāpastathā tejo vāyurākāśamevaca /
kṣityādiṣveva vargāśca hyete vai maṇḍalādhipāḥ

pañcatattve sthitā devāḥ prāpyante viṣṇusevakaiḥ /
dīrghasvaravibhinnāśca napuṃsakavivarjitāḥ

saṣaḍaṅgaḥ śivaḥ prokto hṛcchiraśca śikhā kramāt /
kavacaṃ netramastraṃ syānnyāsaḥ svasthalasaṃsthitiḥ

sarvasiddhipradasyānte kālavahnira dho 'nilaḥ /
ṣaṣṭhasvarasamāyuktamardhendusaṃyutaṃ param

parāparavibhinnāśca śivasyordhvādha īritāḥ /
repheṇāṅgeṣu sarvatra nyāsaṃ kuryādyathāvidhi

hṛdi pāṇitale dehe karṇe netre karoti ca /
japāttu sarvasiddhiḥ syāccaturvaktrasamāyutām

caturaśrāṃ suvistāraṃ pītavarṇāntu cintayet /
pṛthivīṃ cendradevatyāṃ madhye varuṇamaṇḍalam

madhye padmaṃ tathāyuktamardhacandraṃ suśītalam /
indranīladyutiṃ saumyamathavāgneyamaṇḍalam

trikoṇaṃ svasthikairyuktaṃ jvālāmā lānalaṃ smaret /
bhinnāñjananibhākāraṃ svavṛttaṃ bindubhūṣitam

kṣīrormisadṛśākāraṃ śuddhasphaṭikavarcasam /
plāvayantaṃ jagatsarvaṃ vyomāmṛtamanuṃsmaret

vāsukiḥ śaṅkhapālaśca sthitau pārthivamaṇḍale /
karkoṭaḥ padmanābhaśca vāruṇe tau vyavasthitau

āgneye cāpi kulikastakṣaścaiva mahābjakau /
vāyumaṇḍalasaṃsthau ca pañca bhūtāni vinyaset

aṅguṣṭhādikaniṣṭhāntamanulomavilomataḥ /
parvasandhiṣu ca nyasyā jayā ca vijayā tathā

āsyādisvapurasthāne nyasyācchivapaḍaṅgakam /
kaniṣṭhādau hṛdādau ca śikhāyāṃ karayornyaset

vyāpakantu tatvapūrvaṃ kramādaṅguliparvasu /
bhūtānāñca punarnyāsaḥ śivāṅgāni tathaiva ca

praṇavādinamaścānte nāmnaiva ca samanvitaḥ /
sarvamantreṣu kathito vidhiḥ sthāpanapūjane

ādyākṣaraṃ tannāmnaśca mantro 'yaṃ parikīrtitaḥ /
aṣṭānāṃ nāgajātīnāṃ mantraḥ sānnidhyakārakaḥ

oṃ svāhā kramaśaścaiva pañcabhūtapurogatam /
eṣa sākṣādbhavettārkṣyaḥ sarvakarmaprasādhakaḥ

karanyāsaṃ svaraiḥ kṛtvā śarīre tu punarnyaset /
jvalantaṃ cintayetprāṇamātmasaṃśuddhikārakam

bījantu cintayetpaścādvarṣāntamamṛtātmakam /
evañcāpyāyanaṃ kṛtvā mūrdhni sañcintya cātmanaḥ

pṛthivīṃ pādayordadyāttaptakāñcanasaprabhām /
aśeṣabhuvanākīrṇāṃ lokapālasamanvitām

etāṃ bhagavatīṃ pṛthvīṃ svadehe vinyased budhaḥ /
śyāmavarṇamayaṃ dhyāyetpṛthivīdviguṇaṃ bhavet

jvālāmālākulaṃ dīptamābrahmabhuvanāntakam /
nābhigrīvāntare nyasya trikoṇaṃ maṇḍalaṃ raveḥ

bhinnāñjananibhākāraṃ nikhilaṃ vyāpya saṃsthitam /
ātmamūrtisthitaṃ dhyāyedvāyavyaṃ tīkṣṇamaṇḍalam

sikhopari sthitaṃ divyaṃ śuddhasphaṭikavarcasam /
apramāṇamahāvyomavyāpakaṃ cāmṛtopamam

bhūtanyāsaṃ purā kṛtvā nāgānāñca yathākramam /
lakārāntā binduyutā mantrā bhūtakrameṇa tu

śivabījaṃ tato dadyāttato dhyāyecca maṇḍalam /
yoyasya kramākhyāto maṇḍalasya vicakṣaṇaḥ /
tasya taccintayedvarṇaṃ karmakāle vidhānavit

pādapakṣaistathā cañcatkṛṣṇanāgairvibhūṣitam /
tārkṣyaṃ dhyāyettato nityaṃ viṣe sthāvarajaṅgame

grahabhūtapiśāce ca ḍākinīyakṣarākṣase /
nāgairviveṣṭitaṃ kṛtvā svadehe vinyasecchivam

dvidhā nyāsaḥ samākhyāto nāgānāṃ caiva bhūtayoḥ /
evaṃ dhyātvā karma kuryādātmatattvādikaṃ kramāt

tritattvaṃ pratham dattvā sivatattvaṃ tataḥ param /
yathā dehe tathā deve aṅgulīnāṃ ca parvasu

dehe nyāsaṃ purā kṛtvā hyanulomavilomataḥ /
kandaṃ nālaṃ tathā padmaṃ dharmaṃ jñānādimeva ca

dvitīyasvarasambhinnaṃ vargāntena tu pūjayet /
śaumiti karṇikāmadhye mūrdhni repheṇa saṃyutam

akacaṭatapayaśā vargāḥ pūrvādike nyaset /
patrāntakesarānte tu dvau dvau pūrvādikau tathā

keśare tu svarānnyasyādīśāntānṣoḍaśārcayet /
vāmādyāḥ śaktayaḥ proktāstritattvantu tato nyaset

āvāhayettato mardhni śivamaṅgaṃ tataḥ param /
karṇikāyāṃ nyaseddevaṃ sāṃgaṃ tatra puraḥ saram

pṛtivī paścime patre āpaścottarasaṃsthitāḥ /
tejastu dakṣiṇe patre vāyuṃ pūrveṇa pūjayet

svabījaṃ mūrtirūpantu prāguktaṃ pārakalpayet /
yaṃ vāyumūlaṃ nairṛtye rephastvanalasaṃsthitaḥ

vaṃ ca tvīśe sadā pūjya oṃ hṛdisthañca pūjayet /
tanmātrānbhūtamātrāṃstānbahireva prapūjayet

śivāṅgāni tataḥ paścāddhyātvā saṃpūjayettataḥ /
āgneyyāṃ hṛdayaṃ pūjya śira īśānagocare

nairṛtye tu śikhāṃ dadyādvāyavyāṃ kavacaṃ nyaset /
astrantu bāhyato dadyānnetramuttarasaṃsthitam

patrāgre karṇikagre tu bījāni paripūjayet /
anantādikulīrāntā aṣṭau nāgāḥ kramātsthitāḥ

pūrvādikakrameṇaiva tvīśaparyantameva ca /
pūjayecca sadā mantrī vidhānena pṛthakpṛthak

hṛdi padme vidhānena śilādau dattamaṇḍale /
etatkāryaṃ samuddiṣṭaṃ nityanaimittike 'pi ca

ātmānaṃ cintayennityaṃ kāmarūpaṃ manoharam /
plāvayantaṃ jagatsarvaṃ sṛṣṭisaṃhārakārakam

jvālāmālābhiruddīptaṃ ābrahmabhuvanāntakam /
daśabāhuṃ caturvaktraṃ piṅgākṣaṃ śūlapāṇinam

daṃṣṭrākarālamatyugraṃ trinetraṃ śaśiśekharam /
bhairavantu smaretsiddhyai garuḍaṃ sarvakarmasu

nāgānāṃ nāśanārthāya garuḍaṃ bhīmabhīṣaṇam /
pādau pātālaṃ saṃsthau ca diśaḥ pakṣāstu saṃśritāḥ

sapta svargā urasi ca brahmāṇḍaṃ kaṇṭhamāśritam /
pūrvādīśānaparyantaṃ śirastasya vicintayet

sadāśivaśikhāntasthaṃ śaktitritayameva ca /
parātparaṃ śivaṃ sākṣāttārkṣyaṃ bhuvananāyakam

trinetramugrarūpañca viṣanāgakṣayaṅkaram /
grasanaṃ bhīmavaktraṃ ca garuḍaṃ mantravigraham

kālāgnimiva dīptaṃ ca cintayetsarvakarmasu /
evaṃ nyāsavidhiṃ kṛtvā yadyanmanasi cintayet

tattadeva bhavetsādhyaṃ naro vai garuḍāyate /
pretā bhūtāstathā yakṣā nāgā gandharvarākṣasāḥ /
darśanāttasya naśyanti jvarāścāturthikādayaḥ

dhanvantariruvāca /
evaṃ sa garuḍaṃ proce garuḍaḥ kaśyapāya ca /
maheśvaro yathā gaurīṃ prāha vidyāṃ tathā śṛṇu